“Yo siz keling, yo biz boramiz”: “kitoblar karvoni” navbatdagi taʼlim maskaniga tashrif buyurdi

“Ilm izlab bormaydi, ilmni izlab keladilar” degan edi donolardan biri. Ushbu qisqa jumlalarda ne maʼno yashirin? Agarda inson yetuklikka, ilm olishga va maʼnaviy olamini boyitishga bel bogʻlasa oʻqisin, izlansin, shaxsan oʻzi harakat qilsin va koʻzlagan maqsadiga erishsin, degan mazmun bor unda. Ammo bugungi taraqqiy topgan zamonda ilm-u maʼrifat, maʼnaviyat insonni oʻzi “izlab” kelishi ham mumkin. Qanday deysizmi?! Aytaylik, maʼnaviy kamolot vositasi boʻlgan “kitoblar karvoni” siz taʼlim olayotgan maskanga yoki siz istiqomat qilayotgan mahallaga borishi mumkin.

“Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan – Uchinchi Renessans sari!” nomli grant loyihasi ana shunday imkoniyatni taqdim etmoqda.

Yaqindagina gazeta tahririyati xodimlari, loyiha ijrochilari ushbu grant loyihasi doirasida Amudaryo tumanining 2-sektori hududida joylashgan 64-sonli maktabga tashrif buyurishdi. Turli xil janrdagi adabiyotlarni oʻz ichiga olgan kitoblar jamlangan “kitoblar karvoni” maktabga va kitobsevar oʻquvchilar qalbiga ziyo taratib kirib keldi.

Tadbirda “Taraqqiyot koʻzgusi” gazetasi muxbiri Mahmudjon Shomurodov, Amudaryo televideniyesi suhandoni Aziza Madrahimova, gazeta muxbiri Shahzod Qurbonboyev, maktab direktorining maʼnaviy-maʼrifiy ishlar boʻyicha oʻrinbosari Akbar Xolniyozov hamda maktabning ilmga chanqoq 9-10-sinf oʻquvchilari ishtirok etishdi.

Tadbirni maktab direktorining oʻrinbosari Akbar Xolniyozov ochib berdi. U oʻz soʻzida oʻquvchilarning hayotida kitobning tutgan oʻrni haqida aytib oʻtdi. Kitob oʻqigan inson salomidan maʼlum ekani, keng dunyoqarashga ega boʻlish uchun ham kitoblar oʻquvchining doʻsti ekanligiga alohida urgʻu berildi. Shundan soʻng loyiha koordinatori, jurnalist Aziza Madrahimova oʻquvchilarni tahririyat qoshidagi kutubxonadan keltirilgan “kitoblar karvoni” bilan qisqacha tanishtirib oʻtdi. Mazkur kitoblar jamlanmasida badiiy, ilmiy, motivatsion yoʻnalishda yozilgan toʻplamlar borligini aytib, har bir kishi oʻz qiziqishidan kelib chiqqan holda mutolaa qilishi mumkinligini bildirdi. Shuningdek, kitob oʻqish nafaqat maʼnaviy ozuqa olish uchun kerakligini, balki, hayotda oʻz oʻrningni topish, karera qilish, hattoki nozik oilaviy munosabatlarni mustahkamlash uchun ham zarurligini taʼkidlab oʻtdi. Darhaqiqat, kitob oʻqiydigan, maʼnaviyati boy, oʻzaro hurmat, mehr-oqibat kuchli boʻlgan oila hech qachon ajrim yoqasiga kelib qolmaydi.

Jurnalist Shahzod Qurbonboyevning kitobxonlik haqidagi hayotiy kuzatuvlari bilan yoʻgʻrilgan fikrlari esa davrani jonlantirdi. Shuningdek, u oʻquvchilarning kelajakdagi rejalari bilan qiziqdi.

Tadbirda ayniqsa, 9-sinf oʻquvchilari boʻlgan Dilshoda Sultanova hamda Oltinoy Haydarovalarning bugungi globallashuv davrida kitoblarning ahamiyati toʻgʻrisidagi fikrlari tengdoshlarini mushohadaga chorladi.

Tadbir soʻngida oʻquvchilar “kitoblar karvoni”dan joy olgan adabiyotlar bilan yaqindan tanishdilar. Aksariyat oʻquvchilar tahririyat qoshida tashkil qilingan kutubxonaga aʼzo boʻlishga qiziqish bildirdi hamda grant loyihasi doirasida tashrif buyurgan ijodiy guruhga tashakkur aytib, oʻquvchi maʼnaviyatini boyitadigan bunday tadbirlarni tez-tez oʻtkazib turish kerakligini taklif qildilar.

Aziza Madrahimova