Tumanimizda gʻalladan boʻshagan dalalarga takroriy ekin ekish tadbirlari boshlandi

Ayni kunlarda tumanimizda gʻallani nest-nobud qilmay oʻrib-yigʻib olish ishlari qizgʻin davom etayotgan pallada dalalar somondan peshma-pesh tozalanib, shudgor qilinib, takroriy ekinlarni ekish tadbirlari ham boshlab yuborildi.

Takroriy ekinlarni ekish nafaqat bozorlarimizni oziq-ovqat mahsulotlari bilan toʻldiradi, balki ishsiz aholining mavsumiy bandligi taʼminlanishida ham muhim omil sanaladi. Mavsum davomida ekilgan sabzavot, poliz, dukkakli hamda chorva mollari uchun ozuqa ekinlari kuzgi hosil davrida bozorlarimiz toʻkin-sochinligi va chorvaga ixtisoslashgan fermer xoʻjaliklarida moʻl yem-xashak gʻamlanishida muhim vosita boʻladi. Donishmand xalqimiz azaldan qish gʻamini yozda koʻr, deb bekorga aytishmagan. Bugun serquyosh zaminimizning har qarich yeridan samarali foydalanish orqali qish payti va keyingi hosil pishib-yutilgunga qadar xonadonlarimizdagi farovonlikka, bozorlarda narx-navo barqaror saqlanishiga erishamiz. Zero, takroriy ekinlarni ekishning afzalligi ham yil davomida xalqimiz dasturxoniga qishloq xoʻjaligi mahsulotlarini uzluksiz yetkazib berishdan iborat.

Amudaryo tumanida oʻziga xos dehqonchilik maktabiga ega boʻlgan namunali ovul-mahallar koʻp. Ana shunday mehnatkash dehqonlar-u mirishkor fermerlar istiqomat qiluvchi manzillardan biri, shubhasiz Ayoqchi mahallasi hisoblanadi. Joriy yilning 19-iyun kuni Ayoqchi mahallasi hududidagi “Sherali Avezov” fermer xoʻjaligiga qarashli boʻlgan dala-maydonlarida takroriy ekinlar ekish mavzusida seminar tashkil qilindi.

Tadbirda Oʻzbekiston fermer, dehqon xoʻjaliklari va tomorqa yer egalari kengashi raisining birinchi oʻrinbosari Shuhrat Teshayev, Qoraqalpogʻiston fermer, dehqon xoʻjaliklari va tomarqa yer egalari kengashi raisi Ilhom Yunusov, tuman hokimining oʻrinbosarlari, tijorat banklarining tuman boʻlimi rahbarlari, hududiy agronomlar va sohaga masʼul mutaxassislar ishtirok etishdi.

Mutaxassislar tomonidan seminar ishtirokchilari, fermer va dehqonlarga takroriy ekinlarning ahamiyati va gʻalladan keyin boʻshagan hosildor dalalar daromad manbai ekanligi toʻgʻrisida fikr-mulohazalar bildirilib, sifatli hosil yetishtirishga oid zarur tavsiyalar berildi. Shuningdek, mutasaddilar tomonidan mamlakatimizda xalq farovonligi yoʻlida qishloq xoʻjaligi sohasida amalga oʻshirilayotgan islohotlar, soha rivoji yoʻlida qabul qilingan qonuniy hujjatlarning mazmun-mohiyati, aholi bandligini taminlash maqsadida berilayotgan imkoniyatlar alohida batafsil maʼlumotlar berildi. Tijorat banklari tarafidan aholiga mineral oʻgʻit, koʻchat va urugʻ xarid qilish uchun 5 mln soʻmgacha 18 oy muddatga berilayotgan kredit mablagʻlari dehqonlarimizning kuchiga-kuch, gʻayratiga-gʻayrat qoʻshishi shubhasiz.

Bugungi kunda “Temir daftar”, “Ayollar daftari”, “Yoshlar daftari”da roʻyxatda turgan ehtiyojmand oilalarni yanada qoʻllab-quvvatlash va ularning bandligini taʼminlash maqsadida gʻalladan boʻshagan ekin maydonlaridan 20 sotixdan yer ajratib berilyapti. Dehqonlarga qulay tarafi shundaki, dalalar fermerlar tomonidan somondan tozalanib va shudgor qilinib, ekishga tayyor holatda topshirilmoqda. Qolaversa, fermerlarimiz ekinlarni suv bilan uzluksiz taʼminlashga koʻmaklashishni ham oʻz zimmalariga olishgan. Endi yer egalari moʻl hosil olish uchun javlon urib mehnat qilishsalar bas.

Ayoqchi mahallasida istiqomat qiluvchi dehqon va fermerlar ertaki ekin va gʻalladan boʻshagan dalalarga sabzi va mosh ekish orqali moʻl hosil yetishtirib, yuqori daromad olishni maqsad qilishgan. Mirishkor fermerlarimiz va dehqonlarimiz sabzi ekilgan dalalarning har gektaridan 40 tsentnergacha hosil olish harakatida yozning issiq kunlariga qaramay halol mehnat qilishyapti.

Seminar yakunida tumanimizga tashrif buyurgan mehmonlar ekin dalalarida mehnat qilayotgan dehqonlarimizga hormasin aytib, hosil barakasiga tilakdosh boʻlishdi.

Shohzod Qurbonboyev