Barkamol avlodning sevimli manzili – kutubxonadan taassurotlar

Yaqindagina ijodiy guruhimiz bilan birgalikda “Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan Uchinchi Renessans sari!” nomli grant loyihasi doirasida tuman “Barkamol avlod” bolalar maktabi tarbiyalanuvchilari hamrohligida Amudaryo tumani axborot-kutubxona markaziga tashrif buyurdik.

Bolalarning boʻsh vaqtini mazmunli oʻtkazish maqsadida amalga oshirilgan ushbu tashrif davlat granti loyihasining ish rejasida koʻzda tutilgan. Tuman “Barkamol avlod” bolalar maktabining bir guruh bolajonlari kitoblar olamiga sayohati davomida axborot-kutubxona markaziga qanday aʼzo boʻlish, kitoblardan foydalanish, oʻqish tartibi boʻyicha qimmatli maʼlumotlarga ega boʻlishdi.

Aytish joizki, Amudaryo tumani Axborot-kutubxona markazi tuman aholisi, ayniqsa, yoshlarining maʼnaviy yuksalishi yoʻlida munosib xizmat qilib kelmoqda. Axborot-kutubxona markazi 2022-yil dekabr oyidan buyon Oybek nomli mahalla hududidagi yangi binoda faoliyat yurityapti.

Bugungi kunda Axborot-kutubxona markazida jami 17 ming 700 nafardan ziyod abonament roʻyxatga olingan. Shundan, 8 ming 850 nafardan ziyodini erkaklar, 8 ming 840 nafardan ziyodni esa ayollar tashkil qiladi. Kitobxonlarga 13 nafar xodim sifatli xizmat koʻrsatyapti.

Sayohat davomida axborot-kutubxona markazi abonomentlar va foydalanuvchilarga xizmat koʻrsatish guruhi rahbari Nodira Oʻrazimbetova va kutubxona mutaxassisi Munojat Safarbayevalar elektron kitoblar, yangi kelgan adabiyotlar toʻplami bilan oʻquvchilarni tanishtirib oʻtdi.

Haqiqatan, kitobga mehr qoʻyib ulgʻaygan bola kelajakda kam boʻlmaydi. Bolaning qalbiga maʼrifat ziyosi esa bolalikdan turli xil ertaklar, dostonlar, hikoyalar orqali singadi. Natijada esa bolalikda ertak oʻqishni oʻziga sevimli mashgʻulot qilgan bola, kelajakda katta katta asarlarni, romanlarni mutolaa qilib, mustaqil fikrlaydigan, sogʻlom idrok yurita oladigan erkin fikrli shaxs boʻlib yetishadi. Kim biladi, balki kitobxon bolakay bir kuni kelib oʻzi yozuvchi yoki shoir boʻlar. Oʻzi asar yaratar. Sababi, mutolaa jarayonida inson oʻzi bilmagan holda ijodiy qobiliyatini ham rivojlantirishi, koʻnglidan kechgan tuygʻularini qogʻozga koʻchirishi mumkin.

Ota-onalar, ustozlar esa oʻquvchilarning, farzandining qoʻlidan yetaklab kutubxonalarga olib borsa-ku, nur ustiga aʼlo nur. Bizning maqsadimiz ham, grant loyihasining maqsadi ham barkamol avlodni tarbiyalashda kitoblarning, ilm olishning naqadar ulugʻ va keng tushunchalar ekanini yosh avlodga singdirishdan iborat. Zero, zarracha foydamiz tegsa oʻzimizni baxtiyor his etamiz.

Aziza Madrahimova