"Talabalik davrim mening davronlarning zoʻrisan..." Yohud maktabga talaba boʻlib qaytgan yoshlar diydori

Hayotda oʻz oʻrningni topish va omad... Ikkisi bir biriga bogʻliq tushunchalarday boʻlib tuyulishi mumkin ammo aslida ular orasida biroz farq bor: omadni sen yaratolmaysan, u senga taqdir tomonidan inʼom etiladi. Biroq bu bilan men omadsizman deyishga shoshilma, chunki sening yashayotganing, ayni damda bu gaplarni idrok etayotganing oʻzi bir omad. Hayotda oʻz oʻrnini topish esa bu senga va sening harakatlaringga, niyatingga bogʻliq. Axir, izlagan har doim imkon topadi. Eng muhimi esa– ezgu maqsadlaring yoʻlida sobit qadam boʻlib tura olishing!

"Taraqqiyot koʻzgusi" gazetasi tahririyatining "Bilimli va maʼnaviyatli yoshlar bilan Uchinchi Renessans sari" nomli grant loyihasi doirasida biz yoʻqlab borgan yoshlar esa bugun hayotda oʻz oʻrnini, topishga intilayotgan, ilm olishga chanqoq yoshlardan.

Yaqindagina Amudaryo tumanining 1-sektori hududida joylashgan 26-sonli maktabni tugatgan, bugungi kunda talabalik baxti nashidasini surayotgan yoshlarning ilm olish yoʻlidagi mehnatlarini qadrlab, ularning intiluvchanligini, erishgan yutuqlarini tengdoshlariga namuna qilib koʻrsatish maqsadida ularni yoʻqlab bordik.

2023-yilda ushbu maktabni 18 nafar oʻquvchilar bitirgan boʻlsa, shundan 14 nafari OTMlari talabalari boʻlishdi. Bu baxtli yoshlarning orasida Faxriddin Masharipov ham bor. Qahramonimiz 2023-yilda tumanimizdagi 26-sonli maktabni aʼlo baholarga tugatib, chuqur bilimi, zakovati hamda besamar ketmagan harakatlari natijasida Mirzo Ulugʻbek nomidagi Oʻzbekiston Milliy Universiteti kimyo fakulteti talabasi boʻldi. Faxriddin maktabda oʻqib yurgan kezlaridayoq namunali xulqi, oʻtkir zehni bilan ustozlari nazariga tushgan.

Kimyo fani boʻyicha fanlar olimpiadasida hamisha faol ishtirok etib, yaxshi natijalarni qayd etib keldi. Talaba hozirda esa, endi boʻldi, maqsadimga erishdim bemalol yurishim mumkin demasdan til oʻrganish, ingliz tilini chuqur oʻzlashtirish bilan band. Unga havas qilgan ikki nafar singlisi ham hozirda ham oʻquvchi, ham abituriyent. "Ot izini toy bosadi", yaxshi farzand ota-onaning orzu umidlarini roʻyobga chiqarish, ularga rahmat keltirish ilinjida yashaydi. Faxriddin otasi Sobirjon Madrahimov hamda onasi Hamida Ortiqovalardan oʻrnak olib, ular tanlagan ilm yoʻlidan dadil qadam tashlamoqda. Ota-ona esa farzandining kamoli uchun har doim mehnatda, 26-sonli maktabda biri oʻqituvchi, biri maktabning MMIBDOʻ boʻlib faoliyat yuritishadi. Piru badavlat bobo va buvijonisining esa qoʻllari hamisha duoda. Oq fotiha berib, nabiralar kamolini tilaydi.

Maqolamizning keyingi qahramonlari ham xuddi Faxriddin kabi tumanimizdagi ushbu maktabni oʻtgan yili tamomlab, hozirda talaba.

Nurshoda Saʼdullayeva bolalikdan xorijiy tillarga oʻzgacha mehr qoʻydi hamda maktabda oʻqib yurgan kezlarida til oʻrganib, oʻzining ingliz tili boʻyicha lugʻat boyligini oshirib bordi. Ham oʻquvchilik, ham abituriyentlik biroz qiyinchilik tugʻdirsa-da, oldiga qoʻygan maqsadidan aslo ogʻmadi. Va harakatlari zoye ketmadi. U ham 2023-yilda OʻzMU xorijiy filologiya fakultetiga davlat granti asosida oʻqishga kirdi. Bugungi kunda vaqtini mazmunli oʻtkazish, oliygohdagi olgan bilimlarini mustahkamlash maqsadida ovulning bir guruh bolajonlariga ingliz tili saboqlarini oʻtib kelmoqda.

Navbatdagi tinib-tinchimas, iqtidorli talaba qiz Shohida Nurullayevadir. Bu qizning qisqa muddat ichida erishgan va erishayotgan natijalarini koʻrib, bizning ham havasimiz keldi. Bu qizimiz ham oʻtgan yili ushbu maktabni aʼlo baholarga tugatib, talaba nomiga sazovor boʻldi. Hozirda u Toshkent Davlat Iqtisodiyot universiteti biznes boshqaruvi fakulteti, bank ishi va audit yoʻnalishi talabasi. Shohidaning omadli va xushxabarlarga boy yillari qatorasiga birin-ketin keldi. 3-yil matematikadan, 4-yil ingliz tili fanlarini chuqur oʻzlashtirgan maqolamiz qahramoni 2022-yilda matematika boʻyicha milliy sertifikat, 2023-yilda esa ingliz tili boʻyicha SEFR S1 til sertifikatiga ega boʻldi. Oddiy, kamsuqum biroq oʻta aqlli va chinakam ilm sohibasi boʻlgan bu qiz oilada oʻrtancha farzand. Opa uka, singillari jigarining erishgan bu yutuqlaridan hamisha faxru iftixor tuygʻularini his etib, ular ham Shohidaga oʻxshashga harakat qiladi.

Shohidaxonning hayotida yana bir muhim yangilik uni yaqinda yurtimizdagi nufuzli banklarning biri ishga taklif qildi.

– U yerda 25 mln soʻmgacha maosh oladigan xodimlar bor ekan, men ham kelajagimni bank bilan bogʻliq holda tasavvur etaman, masʼuliyatli xodim boʻlaman deya jilmayib qoʻyadi u.

Agar eʼtibor bergan boʻlsangiz bu uchala yoshni biz maqolamiz qahramonlari deya eʼtirof etdik. Bu bejizga emas albatta. Bugungi tahlikali davr yoshlar tarbiyasida kuchli masʼuliyatni taqozo etmoqda. Ana shunday bir paytda oʻzining yuksak aql-u, zakovati, namunali xulqi, tirishqoqligi, jamiyatda erishayotgan yutuqlari bilan ibrat boʻlayotgan bu kabi yoshlar qahramon deyishga loyiq.

Zero, mahallada yoki maktabda bir nafar ana shunday ibrat siymosi paydo boʻlsa uning ortidan yana necha-nechalab doʻstlari ergashadi. Havas qiladi. Harakat qiladi. Biz esa jamiyatimizda mana shunday qahramon yoshlar koʻpayaverishini tilab, xayrlashdik.

Aziza Madrahimova