Sektorlar kesimida prokuror kubogi musobaqalari oʻtkazildi

“Besh tashabbus olimpiadasi” doirasida oʻtkazilayotgan musobaqalar Amudaryo tumanidagi sportsevar yoshlarni oʻz atrofiga jamlamoqda. Tuman sport maktabi zalida milliy kurash boʻyicha 18-30 yosh toifasida erkaklar va ayollar oʻrtasida 4 sektor kesimida “Prokuror kubogi” uchun tashkil etilgan musobaqalar ham shular jumlasidandir.

Yoshlar oʻrtasida sogʻlom turmush tarzini targʻib etish, ularni har tomonlama barkamol etib tarbiyalash, milliy sportimizni yanada rivojlantirish maqsadida tashkil etilgan musobaqa yuqori saviyada, koʻtarinki ruhda boʻlib oʻtdi.

Musobaqaning ochilish marosimida Amudaryo tumani prokurori yordamchilari Sanjar Abdullayev, Ogʻabek Erkuliyev, Amudaryo tumani sport maktabi direktori vazifasini vaqtincha bajaruvchi Zokir Yuldashev hamda murabbiy va sportchilar ishtirok etishdi.

Dastlab Oʻzbekiston va Qoraqalpogʻiston Respublikalarining davlat madhiyalari yangradi. Sportchi yoshlar va murabbiylar, tadbir ishtirokchilari qoʻllarini koʻksiga qoʻyib, yurt madhini joʻr boʻlib kuylashdi.

Musobaqani Amudaryo tumani prokurori yordamchisi Sanjar Abdullayev tantanali ravishda ochib, murabbiylar hamda sportchilarga omad tiladi. Shundan soʻng musobaqalarga start berildi.

Taʼkidlanganidek, keyingi yillarda asrlar davomida mardlik, bagʻrikenglik, oliyjanoblik va halollikning timsoli sifatida eʼzozlanib kelingan, oʻzbek xalqining tarixiy merosi – kurash milliy sport turini yanada rivojlantirish, uning xalqaro maydondagi rivojini qoʻllab-quvvatlash, zarur infratuzilmani yaratish borasida tizimli ishlar amalga oshirilmoqda. Xususan, jahonning bir qator davlatlarida kurash turnirlari, turli chempionatlar, seminar-mashgʻulotlar oʻtkazib kelinishi natijasida ushbu milliy sportning xalqaro rivojiga alohida eʼtibor qaratilyapti.

Darhaqiqat, kurash asrlar davomida oʻzbek xalqining eng ommaviy va sevimli milliy oʻyinlari qatorida eʼzozlab kelingan. Kurash – yakka kurashning qadimiy turi boʻlib, taʼrixiy maʼlumotlarga koʻra, uning yoshi 3 ming yillikdan ortiq hisoblanadi. Bugungi kunda Xalqaro Kurash assotsiatsiyasi tarkibida 130dan ziyod davlatlar milliy federatsiyalari faoliyat yuritadi.

Davlatimizning bevosita qoʻllab-quvvatlashi natijasida kurash xalqaro sport turi sifatida keng eʼtirof etildi, “kurash”, “halol”, “taʼzim”, “toʻxta”, “yonbosh” va boshqa atamalar esa xalqaro sport lugʻati tarkibidan oʻrin egalladi.

Eʼtirof etish joizki, “Kurash” milliy sport turini aholi, ayniqsa, voyaga yetmaganlar va yoshlar oʻrtasida yanada rivojlantirish hamda ommalashtirish, oʻsib kelayotgan avlodda milliy iftixor va vatanparvarlik tuygʻusini mustahkamlash, shuningdek, jamiyatda sogʻlom turmush tarzini targʻib qilish va jahon sport maydonida yuqori natijalarga erishishni taʼminlash maqsadida tashkil etilgan “Prokuror kubogi” musobaqasi tom maʼnoda kurash bayramiga aylanib ketdi.

Musobaqalar keskin va murosasiz tarzda boʻlib oʻtdi hamda belgilangan yosh va vazn toifasida gʻoliblar aniqlanib, musobaqaning tuman bosqichiga yoʻllanmani qoʻlga kiritdilar. Musobaqa yakunida gʻoliblar tashkilotchilar tomonidan diplom, medal va esdalik sovgʻalari bilan taqdirlandilar.

B. Soatov, Amudaryo tumani sport maktabi ommaviy sportni rivojlantirish va selektsiya ishlari boʻyicha direktor oʻrinbosari