Barcha uchastka saylov komissiyalari saylovga tayyor

Ayni kunlarda muhim siyosiy tadbir – Oliy Majlis Qonunchilik palatasi va mahalliy Kengashlarga boʻlib oʻtadigan saylovlarga tayyorgarlik jarayoni butun mamlakatimiz boʻylab yakuniy pallaga kirgan. Maʼlumki, Saylov Kodeksiga muvofiq ushbu muhim siyosiy jarayonga kamida oltmish kun qolganida saylov uchastkalari tuziladi.  Amudaryo tumanidagi uchastka saylov komissiyalari ham qonunchilikda koʻrsatilgan muddatda shakllantirilib, oʻz faoliyatlarini qonun talablari asosida olib bormoqda.

Markazi Amudaryo tumani Ixtisoslashtirilgan maktabi binosida joylashgan 93-sonli saylov uchastkasida tumanning Farovon mahallasida yashovchi 1392 nafar saylovchilar roʻyxatga olingan. Binoda komissiyasi raisi, oʻrinbosari, kotibi va aʼzolari hamda saylovchilar uchun barcha sharoitlar yaratilgan boʻlib, komissiya aʼzolari saylovni qonun talablari asosida oʻtkazishga alohida masʼuliyat bilan yondoshmoqdalar.

Uchastka saylov komissiyasi uchun maxsus xonalar ajratilgan boʻlib, ushbu xonalar va ovoz berish xonasi belgilangan talablarga muvofiq jihozlangan. Ovoz berish xonasida yashirin ovoz berish uchun yetarli miqdorda kabinalar mavjud boʻlib, saylov byulletenlarini berish uchun joylar ajratilgan hamda saylov qutilari oʻrnatilgan. Uchastka saylov komissiyasi joylashgan bino hamda ovoz berish xonasi Oʻzbekiston va Qoraqalpogʻiston Respublikalarining Davlat bayroqlari, gerblari, saylov uchastkasining tartib raqami koʻrsatilgan peshlavha, metall shkaf, yozuv anjomlari bilan taʼminlangan va yashirin ovoz berish kabinalari bilan taʼminlangan.

Qolaversa, binoda jismoniy imkoniyati cheklangan shaxslar uchun maxsus jihozlangan yashirin ovoz berish kabinasi, koʻchma saylov kabinasi, statsionar saylov qutisi, koʻchma saylov qutisi va boshqa zarur jihozlar ham taxt qilib qoʻyilgan.

Uchastka saylov komissiyasi aʼzolari uchastka boʻyicha saylovchilarning roʻyxatini aniqlash va tasdiqlash, fuqarolarni saylovchilar roʻyxati bilan tanishtirish, roʻyxatda yoʻl qoʻyilgan xatolar va noaniqliklar toʻgʻrisidagi arizalarni qabul qilish hamda koʻrib chiqish va zarur hollarda roʻyxatga tegishli oʻzgartirishlar kiritish, saylov kuni oʻz yashash joyida boʻlish va ovoz berishda ishtirok etish imkoniyatiga ega boʻlmagan saylovchilardan toʻldirilgan saylov byulletenlarini qabul qilib olish, aholini saylov kuni va ovoz berish joyi toʻgʻrisida xabardor etish kabi vazifalarni oʻz muddatlarida bajarmoqdalar.

Amudaryo tumani Madaniyat markazi binosida esa 88-sonli uchastka saylov komissiyasi joylashgan. Binoning kirish qismida saylovchilar roʻyxati, Oʻzbekiston Respublikasi Oliy Majlisi qonunchilik palatasiga, Qoraqalpogʻiston Respublikasi Joʻqorgʻi Kengesiga va xalq deputatlari Amudaryo tuman Kengashiga deputatlikka nomzodlar roʻyxati, ularning tarjimai hollari, siyosiy partiyalar va nomzodlarning saylovoldi dasturlari hamda boshqa zarur axborotlar mavjud boʻlgan bannerlar va plakatlar osilgan.

Bino zarur mebellar, orgtexnika vositalari, telefon, televizor, Saylov jarayonini boshqarish axborot tizimi talablariga javob beruvchi kompyuter va ularga kerakli boʻlgan moslamalar, uzluksiz internet aloqasi hamda yongʻinga qarshi vositalar bilan taʼminlangan. Binoda siyosiy partiyalardan, fuqarolarning oʻzini oʻzi boshqarish organlaridan, boshqa davlatlar va xalqaro tashkilotlardan keladigan kuzatuvchilar uchun alohida joylar ajratilgan.

Uchastka saylov komissiyasining saylov byulletenlarini berishga masʼul aʼzolari uchun ajratilgan stollarda saylovchilar familiyasining bosh harflari koʻrsatilgan belgilar oʻrnatilgan. Tibbiyot xonasi birlamchi tibbiy vositalar, birinchi tibbiy yordam koʻrsatish uchun zarur vositalar bilan taʼminlangan.

Zarur hollarda uchastka saylov komissiyasining toʻliq tarkibi ishtirokida yigʻilishlar oʻtkazilib, yigʻilishlarda saylovga tayyorgarlik jarayoni muhokama qilib borilmoqda va yoʻl qoʻyilgan kamchiliklarni bartaraf qilish boʻyicha zarur choralar koʻrilmoqda.

Bir soʻz bilan aytganda, Amudaryo tumanidagi barcha uchastka saylov komissiyalari saylovga tayyorgarlik ishlarini yakunlab, saylov kunida ovoz berish jarayonini qonun talablari asosida tashkil qilish masalasiga bor eʼtiborini qaratgan.

Shu oʻrinda barcha saylovchilarni oʻz konstitutsion huquqlaridan foydalangan holda saylovda qatnashib, oʻzlari munosib deb bilgan partiya va nomzodlarga ovoz berishga chaqiramiz.

Gʻ.Yeshniyozov