YuRTIMIZ TINCh, XALQIMIZ FAROVON, ALPOMISh OʻGʻLONLARIMIZ OMON BOʻLSIN!

Oʻzbekiston Respublikasi Prezidenti Qurolli Kuchlari Oliy bosh qoʻmondoni Shavkat Miromonovich Mirziyoyevning 2024-yil 12-dekabr kunidagi “Oʻzbekiston Respublikasi Respublikasi Qurolli Kuchlari tashkil etilganining 33-yilligi hamda Vatan himoyachilari kunini nishonlashga tayyorgarlik koʻrish va oʻtkazish chora-tadbirlari toʻgʻrisida”gi Farmoyishiga asosan butun mamlakatimiz boʻylab «Yangi Oʻzbekiston Armiyasi – mamlakat tayanchi, xalqimiz faxri!» shiori ostida keng qamrovli maʼnaviy-maʼrifiy targʻibot tadbirlari amalga oshirilib, zaxiradagi zobitlar, ikkinchi jahon urushi ishtirokchilari va urush davri front ortida oʻzlarining fidoyi mehnatlari bilan mudofaani mustahkamlashga munosib hissa qoʻshgan mehnat fronti faxriylari bilan yoshlarning uchrashuv va davra suhbatlari oʻtkazilmoqda. Mazkur tadbirlar orqali fuqarolarimiz Milliy Armiyamizning haqiqatdan ham mamlakatimiz tayanchi, xalqimiz faxri ekanligini chin dildan his etishmoqda.

 Oʻtgan 2024-yil davomida Nukus shahar Mudofaa ishlari boʻlimi tomonidan ham bir qator ijobiy va salmoqli ishlar amalga oshirildi. Xususan, «Umumiy harbiy majburiyat va harbiy xizmat toʻgʻrisida»gi Oʻzbekiston Respublikasi Qonunining 18- moddasiga asosan 2700 nafar yoshlarimiz harbiy roʻyxatga olindilar. Harbiy roʻyxatga olingan yoshlar bilan oʻtkazilgan yakkama-yakka suhbatlar, oshkora muloqot tarzidagi uchrashuvlardan ayonki, bugungi yoshlar qalbida ona Vatan tinchligi va farovonligiga daxldorlik hissi har qachongidan ham yuqori. Ayniqsa, harbiy kasbni egallash ishtiyoqida yashayotgan yoshlarning safi yil sayin oshib borayotgani quvonarli. Buni biz chaqiriluvchilarni harbiy xizmatga saralash va tayyorlash jarayonida koʻrib, yaqqol his etdik.

2025-yil uchun qoʻshinlarni butlash, muddatli harbiy xizmatga va safarbarlik chaqiruvi rezervi xizmatiga tayinlash va yuborish uchun Nukus shahrida belgilangan reja muddatidan oldin, 100 foizga bajarilganining oʻzi yoshlarimizning harbiy hayotga qiziqishlari ortib borayotganidan dalolatdir. Shuningdek, shahardagi barcha umumtaʼlim oʻrta maktablarida taʼlim-tarbiya olayotgan 11-sinf oʻgʻil bolalaridan iborat 2083 nafar yoshlar va 52 nafar ChQBT fani oʻqituvchilari ishtirokida Nukus dala-oʻquv maydonidagi rejaviy amaliy oʻq otish mashgʻulotlari ham yuqori saviyada oʻtkazildi. Bundan tashqari, 2024-yilda Nukus shahar yoshlaridan 35 nafari Oʻzbekiston Respublikasidagi Oliy harbiy taʼlim muassasalariga, 4 nafar yosh esa «Temurbeklar maktabiga» oʻqishga qabul qilindilar. Hozirgi kunda Oʻzbekiston Respublikasi Qurolli Kuchlari safida 116 nafar nukusliklarning mard va jasur oʻgʻlonlari Vatan oldidagi muqaddas burchlarini sharaf bilan bajarib, muddatli harbiy xizmatni oʻtamoqdalar.

 Fursatdan foydalanib, men Nukus shahri aholisini, ikkinchi jahon urushi janggohlarida qahramonlik namunalarini koʻrsatgan otaxonlar va front ortida oʻzlarining fidoyi mehnatlari bilan buyuk gʻalabaga munosib hissa qoʻshgan yurtdoshlarimizni, shu barobarida ayni paytda farzandlari Qurolli Kuchlarimiz safida sergak turib, ona Vatan sarhadlarini himoya qilayotgan aziz ota-onalarni va ularning askar oʻgʻlonlarini, zaxiradagi harbiy zobitlarni hamda butun xalqimizni bugungi qutlugʻ ayyom – Vatan himoyachilari kuni bilan samimiy muborakbod etaman. Osmonimiz musaffo, xalqimiz farovon, tonglarimiz tinch va osuda, Ona Yurtga sadoqatli Alpomish oʻgʻlonlarimiz hamisha omon boʻlsin!

Alisher Qayipnazarov, Nukus shahar Mudofaa ishlari boʻlimi Qurolli Kuchlari boʻlimi xizmatchisi.