Mahallada jinoyat va huquqbuzarliklarning oldini olish – xavfsiz va osoyishta hayot garovi

Bugungi kunda mamlakatimizda jamoat xavfsizligi va ijtimoiy barqarorlikni taʼminlashga davlat siyosatining ustuvor yoʻnalishlaridan biri sifatida qaralmoqda. Mahalla tizimi orqali jinoyatchilik va huquqbuzarliklarning oldini olish, fuqarolarning huquqiy madaniyatini oshirish, yoshlarni yot gʻoyalardan asrash borasidagi ishlar yangi bosqichga olib chiqilmoqda.

Oʻzbekiston Respublikasi Prezidentining 2025-yil 3-yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori bu borada muhim dasturulamal boʻlib xizmat qilmoqda.

Amudaryo tumanida ushbu qaror ijrosini taʼminlash yuzasidan amalga oshirilayotgan ishlar masʼul rahbarlar tomonidan muvofiqlashtirilib borilmoqda.

Qoraqalpogʻiston Respublikasi Ichki ishlar vaziri oʻrinbosari Tergov boshqarmasi boshligʻi polkovnik Muzaffar Rahmatullayev tomonidan tumanda jinoyatchilik va huquqbuzarliklarning oldini olish borasidagi ishlar oʻrganildi. Oʻrganishlar mobaynida tuman Davlat xizmatlari markazi binosida fuqarolar bilan sayyor qabuli oʻtkazildi.

Sayyor qabul mobaynida 18 nafar fuqarolardan turli masalalar yuzasidan murojaatlar qabul qilindi. Muammoli masalalarning ijobiy hal etilishi yuzasidan tuman IIB masʼullariga tegishli topshiriq va koʻrsatmalar berildi.

Shuningdek fuqarolik pasportini olish bilan bogʻliq muammoli masalalar ijobiy hal etilib, 4 nafar fuqarolarga yangidan fuqarolik pasportlari berildi.

Masʼul rahbarlar Kuyuk koʻpir ovulida “Mahalla yettiligi” masʼullari tomonidan hududda jinoyat va huquqbuzarliklar profilaktikasi borasida amalga oshirilayotgan ishlar holati oʻrganildi. Hududda shu vaqtgacha sodir etilgan jinoyatlarning kelib chiqish sabablari, unga imkon yaratib bergan shart-sharoitlar tahlil qilindi. Aniqlangan muammolar, mavjud kamchiliklar tanqid qilinib, ularni bartaraf qilish yuzasidan tegishli topshiriq va koʻrsatmalar berildi.

Shu oʻrinda taʼkidlash joizki, mahalla – jamiyatning asosiy boʻgʻini boʻlib, u yerda har bir fuqaroning yashashi, ishlashi, farzand tarbiyasi bilan bogʻliq asosiy muammoli masalalar yechimini topadi. Shu bois jinoyat va huquqbuzarliklarning oldini olishda mahalla faollari, profilaktika inspektorlari, xotin-qizlar faollari hamda nuroniylarning hamkorligi juda muhimdir. Bu borada mahalla masʼullari hamkorlikdagi faoliyatining toʻgʻri tashkil etilishi natijasida hududlarning kriminogen vaziyati yaxshilanadi hamda jinoyat va huquqbuzarliklardan holi hududga aylanishiga zamin yaratiladi.

Mahalla masʼullari bilan suhbat chogʻida profilaktik tadbirlarni koʻproq oʻtkazish, xususan, xavf ostida boʻlgan shaxslar bilan doimiy muloqotda boʻlish, ularning muammolarini aniqlab, ijtimoiy yordam koʻrsatish, yoshlarni qonunlarga hurmat ruhida tarbiyalash, aholining huquqiy savodxonligini oshirish muhimligi qayd qilindi. Mahalla posbonlari va faollar orqali mahalladagi muammoli hududlarni nazorat qilish, videokuzatuv tizimlarini joriy etish, sport, madaniyat, sanʼat va kasb-hunar toʻgaraklari orqali yoshlarning salbiy illatlarga berilishining oldini olish, shu yoʻl bilan jinoyatchilik va huquqbuzarliklarni kamaytirish lozimligi xususida tushuntirishlar olib borildi.

Mahallada xavfsiz muhit yaratish – har bir fuqaroning osoyishta hayot kechirishi, bolalarimizni tinch va barqaror jamiyatda voyaga yetkazish uchun zamin yaratadi. Bu borada har bir fuqarodan hushyorlik, faollik va masʼuliyat talab etiladi.

Charos Arslonova, tuman hokimligining Axborot xizmati rahbari.