“BIR NURONIY—OʻN YoShGA MASʼUL” TAMOYILI ASOSIDA FAOLIYaT YuRITAYoTGAN FAOL NURONIYLAR OʻRTASIDA KOʻRIK-TANLOV OʻTKAZILDI

Mamlakatimizda yoshlar bilan ishlashning yangicha boshqaruv mexanizmlarini yaratish, yoshlar muammolarini bevosita mahallalarda hal etish, taʼlim muassasalarida maʼnaviy-maʼrifiy va tarbiyaviy ishlarning samaradorligini yanada oshirish maqsadida amalga oshirilayotgan keng qamrovli islohotlar tufayli bugun yoshlar jamiyatimizning faol qatlamiga aylangan.

Ayniqsa, Oʻzbekiston Respublikasi Prezidentining 2022-yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi hamda 2023-yil 11-martdagi “Keksa avlod vakillarini har tomonlama qoʻllab-quvvatlash hamda ularning ijtimoiy faolligini oshirishga doir qoʻshimcha chora-tadbirlar toʻgʻrisida”gi Qarorlari ijrosini taʼminlashga qaratilgan saʼy-harakatlar oʻzining ijobiy samarasini bermoqda.

Unga koʻra, maʼnaviy koʻmakka muhtoj yoshlar bilan ishlash, yoshlarni Vatanga muhabbat, ezgulik va rahmdillik ruhida tarbiyalash, nuroniylarning yoshlar oʻrtasida milliy va umuminsoniy qadriyatlarni asrab-avaylash borasidagi faoliyatini yanada takomillashtirishga eʼtibor qaratilmoqda. “Bir nuroniy – oʻn yoshga masʼul” tamoyili asosida yurtimizning ijtimoiy-siyosiy hayotida oʻzining faol hissasini qoʻshib kelayotgan, obroʻ-eʼtiborli, ibratli hayotiy tajribaga ega boʻlgan faol nuroniylar va faxriylarga mahallalarda yashovchi tarbiyasi ogʻir, maʼnaviy koʻmakka muhtoj, uyushmagan, ishsiz yoshlar biriktirilib, bevosita ular bilan birgalikda ish yuritayotgani yoshlar hayotini ijobiy tomonga oʻzgartirish imkonini bermoqda.

Bu borada Amudaryo tumanida oʻziga xos tajriba maktabi yaratilgan, desak aslo mubolagʻa boʻlmaydi. Tumandagi 49 ta ovul va mahalla fuqarolar yigʻinlarida katta hayotiy tajribaga, oʻzlari yashayotgan hududda yuksak obroʻ-eʼtiborga ega boʻlgan keksa avlod vakillaridan iborat nuroniylar guruhlari tuzilib, ular hududlardagi ijtimoiy va maʼnaviy himoyaga muhtoj, huquqbuzarlikka moyil, uyushmagan yoshlarga biriktirilgan. Ular yoshlarning kasb-hunar oʻrganishlari, shaxsiy tadbirkorligini yoʻlga qoʻyishlari, ijaraga yer olib, dehqonchilik, chorvachilik va parrandachilik bilan shugʻullanishlari uchun shart-sharoitlar yaratmoqda.

Yoshlar bilan ishlashishdagi samarali faoliyatlari bilan yuqori natijalarga erishayotgan nuroniylarni aniqlash va ularni ragʻbatlantirish maqsadida “Nuroniy” jamgʻarmasi Amudaryo tuman boʻlimi tomonidan koʻrik-tanlov oʻtkazildi.

Madaniyat boʻlimi binosida boʻlib oʻtgan koʻrik-tanlovning tuman bosqichida “Bir nuroniy – oʻn yoshga masʼul” tamoyili asosida oʻzlariga biriktirilgan oʻn nafar tarbiyasi ogʻir, maʼnaviy koʻmakka muhtoj, uyushmagan, ishsiz yoshlarga yaqindan yordam berib kelayotgan nuroniylarning faoliyatiga baho berildi.

Tadbirni “Nuroniy” jamgʻarmasi Qoraqalpogʻiston Respublikasi boʻlimi boshligʻi Tursunboy Abdijabbarov ochdi va mamlakatimizda mahalla institutini yanada xalqchil tuzilmaga aylantirish, oʻsib kelayotgan yosh avlodni har tomonlama qoʻllab-quvvatlash, ularning qobiliyat va iqtidorlarini rivojlantirish orqali ijtimoiy faolligini oshirish borasida amalga oshirilayotgan ishlar, bu boradagi davlatimizning izchil siyosati va gʻamxoʻrliklari xususida batafsil soʻz yuritdi va tanlov ishtirokchilariga muvaffaqiyat tiladi.

Koʻrik-tanlovda “Bir nuroniy – oʻn yoshga masʼul” tamoyili asosida oʻzlariga biriktirilgan oʻn nafar tarbiyasi ogʻir, maʼnaviy koʻmakka muhtoj, uyushmagan, ishsiz yoshlarga yaqindan yordam berib kelayotgan 85 nafar nuroniy otaxon hamda onaxonlar, shuningdek, ovul va mahallalar fuqarolar yigʻinlari masʼullari, yosh avlod vakillari ishtirok etdilar.

Asosiy uch shart boʻyicha boʻlib oʻtgan koʻrik-tanlovda Uyshin mahallasidan Bekbergan Qutlimuratov, Boʻston mahallasidan Nina Xoʻjayeva, Qoramon mahallasidan Habibaxon aya Maʼmurova, Durunki mahallasidan Amangul Kayupova va Qilichboy ovulidan Amina Yusupovalar tanlov yakuniga qadar berilgan shartlarni mahorat bilan bajarib, hakamlar hayʼati aʼzolarining eʼtibor va eʼtiroflariga sazovor boʻldilar.

Ayniqsa, ishtirokchilarning “Tanishtiruv”, “Yoshlar – bizning kelajagimiz” deb nomlangan shartlar boʻyicha chiqishlari tomoshabinlar uchun juda qiziqarli taassurotlarga boy boʻldi. Shuningdek, ishtirokchilarning hakamlar hayʼatiga taqdim qilgan “Bir nuroniy – oʻn yoshga masʼul” tamoyili asosida yoshlar bilan ishlashish boʻyicha amalga oshirayotgan ishlaridan hikoya qiluvchi suratli albomlari tomoshabinlar tomonidan olqishlar bilan kutib olindi.

Koʻrik-tanlovning uchinchi – oxirgi sharti – “Nuroniylar bellashuvi”da ishtirokchilar mamlakatimizda olib borilayotgan keng koʻlamli islohotlar, asosiysi, oʻzlariga biriktirilgan uyushmagan, maʼnaviy koʻmakka muhtoj yoshlar bilan amalga oshirgan ishlari va erishgan natijalari, shuningdek, yoshlarning muammolariga yechim topgan yoki ajrim yoqasida turgan oilalarni yarashtirishga qaratilgan ishlari boʻyicha maʼruzalar qilib, bu boradagi hujjatlarini taqdim etishdi.

Koʻrik-tanlov shartiga koʻra, nuroniylar oʻzlariga biriktirilgan yoshlar bilan ishlash jarayonlari, ularni ish bilan taʼminlash, biror bir kasbni egallashi uchun kasbga oʻqitish, davlat subsidiya mablagʻlarini jalb qilish orqali bandligini taʼminlash, oilaviy ajrimlarning oldini olish boʻyicha amalga oshirayotgan ishlari hamda galdagi rejalari aks ettirilgan suratli-lavhalarini namoyish etishdi.

Koʻrik-tanlovning yakuniy natijalariga koʻra, Durunki mahalla fuqarolar yigʻini faol nuroniysi Amangul Kayupova 1-oʻrinni egalladi. 2-oʻrin Qoramon mahalla fuqarolar yigʻini faol nuroniysi Habibaxon aya Maʼmurovaga nasib etdi. Boʻston mahalla fuqarolar yigʻini faol nuroniysi Nina Xoʻjayeva esa 3-oʻrinni egalladi.

Shuningdek, Uyshin mahalla fuqarolar yigʻini faol nuroniysi Bekbergan Qutlimuratov, Qilichboy ovul fuqarolar yigʻini faol nuroniysi Amina Yusupovalar oʻz faoliyatlarining fidoyilari sifatida eʼtirof etildilar.

Tanlov gʻoliblari “Nuroniy” jamgʻarmasi Qoraqalpogʻiston Respublikasi boʻlimi tomonidan pul mukofotlari hamda diplom bilan taqdirlandi.

ROBIYa YOʻLDOShEVA.