Til – millatning ruhi

Til — har bir xalqning eng aziz boyligi, uning maʼnaviy poydevori, ruhiy asosidir. Qoraqalpoq xalqining ham asrlar davomida shakllanib, boyib, takomillashib kelayotgan ona tili bugun davlat maqomiga ega boʻlib, millatning mustahkam tayanchiga aylanib ulgurgan. 1-dekabr — Qoraqalpogʻiston Respublikasining “Davlat tili haqida”gi Qonuni qabul qilingan sana ana shu bebaho merosning yuksak eʼtirofi sifatida nishonlanadi.

Ushbu qutlugʻ sana munosabati bilan Amudaryo tumani Madaniyat boʻlimida koʻtarinki ruhda bayram tadbiri tashkil etildi. Tadbirda davlat tilining ahamiyati, uning jamiyat hayotidagi oʻrni, shuningdek, tilni rivojlantirish borasida amalga oshirilayotgan ishlar xususida soʻz yuritildi.

Tadbir avvalida Respublika Maʼnaviyat va maʼrifat markazi tuman boʻlimi boshligʻi Islom Matkarimov soʻzga chiqib, barchani bayram bilan tabrikladi. U davlat tili insonning oʻzligini anglashidagi oʻrni beqiyos ekanini, tilni asrab-avaylash va kelajak avlodga musaffo holda yetkazish — har birimiz zimmasidagi sharafli masʼuliyatligini taʼkidladi.

Bayram tadbiri tuman Madaniyat boʻlimi tomonidan tayyorlangan rang-barang kontsert dasturi bilan davom etdi. Ijodkorlar qoraqalpoq va oʻzbek tillaridagi kuy-qoʻshiqlar, joʻshqin raqslar va sahna chiqishlari orqali tomoshabinlarga yuqori bayramona kayfiyat ulashdilar. 

Qayd etish joizki, bugungi kunda dunyoda olti mingdan ortiq til mavjud boʻlsa-da, ularning atigi 170 dan ortigʻiga davlat tili maqomi berilgan. Ular qatorida qoraqalpoq tilining ham alohida eʼtirof bilan turishi xalqimiz uchun katta faxr va iftixordir. Bu maqom xalqimizning oʻzligini anglashida, milliy gʻurur va oʻziga xoslikni tiklashda, ajdodlar merosini asrab-avaylab, kelajak avlodlarga yetkazishda muhim tarixiy qadam boʻlib xizmat qiladi.

Soʻnggi yillarida qoraqalpoq tilini rivojlantirish, uning ilmiy asoslarini mustahkamlash, fonetika, leksikologiya va grammatika borasidagi tadqiqotlarni yangi bosqichga koʻtarish boʻyicha muhim ahamiyatga ega qator ishlar amalga oshirildi. Tilning jahon miqyosidagi oʻrni va nufuzini oshirishga qaratilgan islohotlar natijasida sezilarli yutuqlar qoʻlga kiritildi. Bular qatorida Qoraqalpogʻiston Respublikasi Joʻqorgʻi Kengesi va Vazirlar Kengashi qoʻllab-quvvatlashi bilan VII jilddan iborat “Qoraqalpoq tilining izohli lugʻati”ning nashr etilishi til taraqqiyotidagi yirik ilmiy voqea sifatida tarixga kirdi.

Tadbirda ijro etilgan milliy kuylarning jarangi, xalq raqslari va ikki tilning uygʻunligi tadbirga oʻziga xos jilo berib, ishtirokchilarda unutilmas taassurot qoldirdi. Har bir sahna chiqishi qoraqalpoq tilining boyligi, milliy madaniyatning teran ildizlarini yana bir bor namoyon etdi.

Charos Arslonova, tuman hokimligining Axborot xizmati rahbari.