Jayxun ilhomlari
Bunga chidamogʻim qiyin-ku, axir!!!
(Yoxud bir hasadgoʻyning hasrati)
Nechun hamma mendan oʻzib ketmoqda? –
Orzu-maqsadiga tezda yetmoqda,
Aslo zarar koʻrmay, foyda etmoqda,
Bunga chidamogʻim qiyin-ku, axir!!!
Oʻqib-oʻrganganlar boʻlishdi olim,
Men esa oʻzimga oʻzimman zolim,
Hayronman, ertaga ne kechar holim,
Bunga chidamogʻim qiyin-ku, axir!!!
Yondagi qoʻshnimning joʻralari koʻp,
Moliga yarasha qoʻralari koʻp,
Sabzi-yu turpi moʻl – oʻralari koʻp,
Bunga chidamogʻim qiyin-ku, axir!!!
Bir oshnam kundan-kun bormoqda boyib,
Parvozi balanddir qanotin yoyib,
Muzdayam oyogʻi ketmaydi toyib,
Bunga chidamogʻim qiyin-ku, axir!!!
Goh yoʻqdir hech kimni koʻrgani koʻzim,
Faqat men yashasam, yasharsam oʻzim,
Afsus, yelga uchar niyatim – soʻzim,
Bunga chidamogʻim qiyin-ku, axir!!!
Qayonga qaramay, yuksalish bordir,
Buni koʻrgan onim keng dunyo tordir,
Ne qilay, oldimda oʻpqonu jardir,
Bunga chidamogʻim qiyin-ku, axir!!!
Ming niqob kiysam ham boʻlmoqdaman fosh,
Menga atalgandir moʻl malomat tosh,
Shu bois yuraman koʻtarolmay bosh,
Bunga chidamogʻim qiyin-ku, axir!!!
Boshimni suqsam gar qaysi sohaga,
Hech kimsa alishmas meni chaqaga,
Oʻxshab qoladurman baʼzan baqaga,
Bunga chidamogʻim qiyin-ku, axir!!!
Yutuqni eshitsam ketaman yonib,
Bir paqir suv ichib, yurolmam qonib,
Qancha-qancha oshnam ketishdi tonib,
Bunga chidamogʻim qiyin-ku, axir!!!
Oʻzimdan oʻzgani tan ololmayman,
Niyatim haq yoʻlga hech sololmayman,
Yaxshilar qoshida, eh, qololmayman,
Bunga chidamogʻim qiyin-ku, axir!!!
Bilaman, pastkashman, hatto marazman,
Ahillik dushmani – fitna, arazman,
Oʻlim ne, bilmovchi daydi-gʻarazman,
Bunga chidamogʻim qiyin-ku, axir!!!
Taqdirim shu ekan, aslo choram yoʻq,
Oqni bulgʻamoqqa goho qoram yoʻq,
Ishim oʻnglamoqqa sovgʻa-poram yoʻq,
Bunga chidamogʻim qiyin-ku, axir!!!
Saʼdulla Xoʻjaniyozov, Qoraqalpogʻiston Respublikasida xizmat koʻrsatgan jurnalist.
Iftixor
Oʻzbekiston mening sharaf-shonimdir,
Hurriyat nafasi qulf urgan makon.
Yuragimda ungan bogʻ-boʻstonimdir,
Vatanim husniga havasda jahon.
Quyosh quchib yotar sarhadlarini,
Bogʻlari jannatiy olamga oʻxshar.
Tabiati nodir sanʼatlarini
Namoyon etuvchi naqqoshga oʻxshar.
Togʻlari oʻpadi samolarini,
Zilol chashmalari jonga oromdir.
Xushxonlari tuzgan navolarini
Kuylab, tinglayotgan jumla olamdir.
Dunyoning havasli koʻzlari unda,
Oʻgʻil-u qizlari zukko, bilimdon.
Ming shukr, tugʻildim shundayin yurtda,
Poyingga toʻshalay, hur Oʻzbekiston!
Oltinoy BOBOJONOVA,
Mangʻit shahri
Xayr, maktab
Yetti yoshda, quchogʻingga kelgandim,
Bolalikning gashtini ham surgandim.
Taʼlim-tarbiyani, senda oʻrgandim,
Xayr endi, jonajon maktab.
Ogʻushingga ogʻushlading onamdek,
Erkalading olim boʻlgin bolam, deb,
Ilm buloqlaring goʻyo olamdek,
Xayr endi, jonajon maktab.
Parvozga shaylading qanotlarimni,
Ulugʻ hayot sari yoʻllab turibsan.
Quchgin, deb ilmning sarhadlarini,
Hamonki otamday qoʻllab turibsan.
Sen bergan tarbiya - eng ulugʻ matlab,
Xush qolgin Onajon! Jonajon maktab!
Asadbek NURADDINOV,
11-sonli maktab oʻquvchisi.
Soʻnggi qoʻngʻiroq
Bugun chalinasan, dilga oʻt solib,
Qalblarda bir hazin hislar uygʻotib.
Bitiruvchi koʻnglida qandaydir titroq,
Chalinmay turaqol, soʻnggi qoʻngʻiroq!
Yuzimizni yuvar sevinch koʻzyoshlar,
Qalblarda tuygʻular ham toʻlib-toshar.
Muallimga boʻlgan hurmat ham oshar,
Chalinmay turaqol, soʻnggi qoʻngʻiroq!
Maktabim, sen bilan xayrlashamiz,
Sinfdoshlar ila ayrilishamiz.
Dildagi tuygʻular oshkora, biroq,
Chalinmay turaqol, soʻnggi qoʻngʻiroq!
Qunduzoy YuSUPOVA,
16-sonli maktab oʻquvchisi.
Vatan
Men shaharga ketgan pallada,
Qishlogʻim yoʻllari qoldi kuzatib.
Tugʻilgan yer va mahallamda
Elim qoldi qoʻlin uzatib.
Murgʻak bola edim oʻshanda,
Oʻn yoshimda qaytdim qishloqqa.
Topdim izim aziz gulshanda,
Qadam qoʻygan onim oʻtloqqa.
Izlarimda unibdi maysa,
Gulga toʻlib bu goʻzal makon.
Quchogʻimni ochib shu lahza,
Dedim:
"Qaytdim, aziz Onajon!”
Shahzod XOʻJABOYeV,
80-sonli maktab oʻquvchisi.
Hayot soʻqmoqlari
Hayot soʻqmoqlari naqadar sirli,
Baland-past toʻsiqlar, tikanli gʻovlar.
Goh ravon, gohida chaqirtosh qirli,
Yurolmay qiynalar boʻsh-u bayovlar.
Men ham ketayapman shu sirli yoʻldan,
Adashib, qoqilib, dovdirab goho.
Dovonlardan oshmoq kelarmi qoʻldan,
Mashaqqat yukidan choʻchirmanmi yo?
Ezgu yoʻl tanladim oʻzim uchun men,
Vatan kamolida koʻrdim baxtimni.
Pok orzu-niyatga yoʻldosh boʻldim men,
Hech kim oʻzgartolmas dilda ahdimni.
Ozodabonu XUDOYBERGANOVA,
34-sonli maktab oʻquvchisi.
FASLLAR
Yurtimiz fasllari,
Goʻzallik asllari.
Galma-galdan kelishar,
Seplarini yoyishar.
Bahor - yoshlik timsoli,
Qish – poklikning misoli.
Yoz - bolalar gulzori,
Kuz - ona yurt xirmoni.
Surayyo
QURBONBOYeVA
Xursandbek
(Ukamga)
Xursandbek shodon doim,
Uni maqtaydi oyim.
Oʻynab doim vaqti chogʻ,
Kel, uchiray argʻimchoq.
Ukam judayam yaxshi,
Oilamizning naqshi.
Ukamga mehrimni men,
Kuylay misoli baxshi.
Nafisa ShUKURULLAYeVA, 48-sonli maktab oʻquvchisi.
ARMON
(1966-yilda oliygohni endigina bitirib kelgan, sevimli sohasida ish boshlagan vaqtida harbiy xizmatga ketgan va xizmatini Kuba Respublikasida ado etish chogʻida halok boʻlgan amakim Rahimboy Qodirov xotirasiga)
Sovuq xabar keldi birdan,
Kuba deb atalmish eldan.
Chegarada turgan akam,
Koʻksin oʻqqa tutgan akam.
El-u, yurt xizmati deb,
Hayotini tikkan akam.
Sevgisiga yetolmay,
Goʻshangaga kirolmay,
Hayotda farzand koʻrmay,
Armonda ketgan akam.
Bobom qaddi bukildi,
Enam qalbi ezildi.
Sandiqlarda sarpolar,
Armonlarga ilindi.
Raʼno QODIROVA.
Bolalik!
Bolalik! Oʻzingsan oʻynoqi anhor,
Koʻzimda yashnagan eng goʻzal bahor.
Qaniydi, men bilan qolsang umrbod,
Shirin onlaringga toʻyingan kim bor?
Toshqinsan, nigohing tushganmi soyga,
Hilolsan, havasing kelganmi oyga.
Yillarni tortganday misoli yoyga,
Onamning allasin yashirding qayga?
Podshohlik onlarim eding-ku - oʻsha,
Kapalak ketidan yugurgan shosha.
Oy-u yulduzingni qilib tomosha,
Ulgʻaydim umidli yillaring osha.
Siyrating qolgandir nurli chogʻlarda,
Jajji qoʻllardagi koʻzmunchoqlarda.
Sogʻinchga belanib keng quchoqlarda,
Menga hamroh boʻlgan oʻyinchoqlarda.
Iroda ERDOShEVA,
38-sonli maktab oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
