Yurt obodligi, avvalo, mahalladan boshlanadi

Oʻzbekiston Respublikasi Vazirlar Mahkamasining shu yil 28-fevraldagi farmoyishiga asosan 13–14-mart kunlari “Yurt obodligi, avvalo, mahalladan boshlanadi” shiori ostida mamlakatimiz boʻylab oʻtkazilgan umumxalq xayriya hashari aholi birdamligi, mehr-oqibati va bunyodkorlik salohiyatini yana bir bor namoyon etdi. Ayniqsa, hududlarni obodonlashtirish, koʻkalamzorlashtirish va tozalik ishlari ekologiya va atrof-muhit musaffoligiga ham ijobiy taʼsirini koʻrsatdi.

Amudaryo tumanida mazkur umumxalq xayriya hashariga 49 ta mahalla va 30 ta tashkilot jalb etildi. Hasharda jami 15 ming nafar fuqaro ishtirok etib, shundan 8 ming 500 nafarini yoshlar tashkil etgani ayniqsa ahamiyatlidir. Bu yosh avlodning yurt taqdiri, mahalla obodligi va ekologik madaniyatga daxldorlik tuygʻusi yuksalib borayotganini koʻrsatadi.

Hashar davomida tumanda umumiy hajmi 12 gektar boʻlgan maydonlar obodonlashtirilib, jami 18 tonna maishiy va qurilish chiqindilari tashkiliy ravishda olib chiqib ketildi. Shuningdek, 25 kilometr uzunlikdagi ariq va lotoklar tozalanib, bu ishlarga 25 ta texnika vositalari jalb etildi. Obodonlashtirish tadbirlari doirasida 22 ming tup daraxt koʻchatlari ekildi, 25 ming tup daraxt oqlanib, sugʻorildi va parvarish qilindi.

Amaliy ishlar koʻlami obʼektlar misolida ham yaqqol koʻzga tashlanadi. Jumladan, bozorlar hududida 20 ming kvadrat metr maydon tartibga keltirildi, 74 ta qabriston, 3 ta bogʻ obodonlashtirildi. Shuningdek, 392 ta koʻcha tozalanib, 2 ta bolalar va oʻsmirlar sport maydonchalari taʼmirlandi. Ijtimoiy soha obʼektlarida ham salmoqli ishlar bajarilib, jami 165 ta obʼekt tartibga keltirildi. Ular orasida 86 ta maktab, 56 ta maktabgacha taʼlim tashkiloti, 15 ta sogʻliqni saqlash muassasasi va 8 ta boshqa obʼektlar bor. Ushbu obʼektlar atrofi va ularga tutash hududlarga jami 8 mingdan ortiq tup daraxt koʻchatlari ekildi.

Ayni paytda aholining ijtimoiy himoyaga muhtoj qatlamiga koʻmak berish masalasi ham eʼtibordan chetda qolmadi. Xususan, yakka-yolgʻiz va boquvchisini yoʻqotgan insonlarga qarashli 82 ta xonadon tomorqasi tartibga keltirildi. Shuningdek, 2 ta oilaning uy-joyi taʼmirlanib, mazkur yordamga muhtoj oilalar xonadonida jami 200 kvadrat metr hajmda qurilish-taʼmirlash ishlari amalga oshirildi.

Xulosa qilib aytganda, umumxalq xayriya hashari nafaqat hududlar qiyofasini yangilash, balki odamlar qalbida hamjihatlik, bagʻrikenglik va vatanparvarlik tuygʻularini yanada mustahkamlashga xizmat qildi. Obod mahalla, orasta koʻcha va fayzli xonadonlar esa, shubhasiz, yurt taraqqiyotining muhim mezonidir.

Saʼdulla Sadikov, Oʻzbekiston Ekologik partiyasining Amudaryo tuman Kengashi raisi

Maqola “Jayxun ilhomlari” NNTning Oʻzbekiston Respublikasi Oliy Majlisi huzuridagi

Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan

“Ekologik madaniyat – sogʻlom kelajak asosi” nomli loyihasi doirasida tayyorlandi.