YoSh TENNISChILAR BELLAShDILAR

1-2-iyun kunlari Amudaryo akademik litseyining tennis kortida "Sogʻlom ona va bola yili” Davlat dasturi doirasida 1-iyun – Xalqaro bolalarni himoya qilish kuni munosabati bilan 2001, 2002, 2003, 2004-yillarda tugʻilgan hamda undan kichik yoshdagi oʻsmirlar va qiz bolalar oʻrtasida sportning tennis turi boʻyicha tuman ochiq birinchiligi oʻtkazildi.

Musobaqaning ochilish marosimida soʻz olgan Qoraqalpogʻiston Respublikasi Joʻqorgʻi Kengesi raisining oʻrinbosari Otajon Hamroyev va boshqalar Prezidentimiz Islom Karimov rahnamoligida jismonan va maʼnan sogʻlom avlodni tarbiyalash, yoshlarni sogʻlom turmush tarziga keng jalb etish, ularning sport bilan muntazam shugʻullanishi uchun qulay sharoit yaratishga qaratilayotgan doimiy eʼtibor bugun jahon arenalarida Oʻzbekiston bayrogʻini baland koʻtarayotgan, har tomonlama sogʻlom va barkamol yoshlarimiz safi kun sayin oshishiga zamin yaratayotganini taʼkidladilar.

Oʻzbekiston tennis federatsiyasi qoidalariga muvofiq yakka tartibda, olimpiya usulida oʻtkazilgan ushbu musobaqada Nukus shahri va Nukus tumani hamda Kegayli, Toʻrtkoʻl, Amudaryo tumanlaridan 80 nafardan ziyod sportchi bolalar ishtirok etishdi.

Gʻoliblar Qoraqalpogʻiston Respublikasi Madaniyat va sport ishlari Vazirligi hamda tuman hokimligi tomonidan faxriy yorliqlar, diplomlar va esdalik sovgʻalari bilan taqdirlandilar.