USTOZIM - OTAM

1944-yil qish chillasida Xitoy qishlogʻining Sori ovulida dunyoga kelgan otamga ota-onasi umri uzoq boʻlsin, dunyo omon tursin degan niyat bilan Tursunboy deb ism berishgan. Bobo, momolari el koriga yaraydigan, serfarzand, serdavlat boʻlsin deb duo qilishgan.

Oradan yillar oʻtdi, Tursunboy Oʻrozimbetov el koriga yaradi. Oʻqituvchi boʻlib, yosh avlodga taʼlim-tarbiya berdi. Fidoyi mehnatlari evaziga munosib taqdirlandi. El-u yurtning duosini olib, toʻylarga bosh boʻldi. Uning aytgan kelin salomlarini eshitgan otaxonu onaxonlar, "umringdan baraka top, farzandlaring rohatini koʻrgin”, -deya olqishlashdi.

Davralarga joʻshqinlik, koʻtarinki kayfiyat olib kirgan, suxandonligini koʻrgan eldoshlari "qoyil-ye” deya tan berishdi.

Doʻstlar davrasida doim hurmati baland boʻldi. Buni koʻrgan ota-onaning qalbi quvonchga toʻldi. Farzandlari esa "bu mening otam” deya faxrlanishdi.

Darhaqiqat, koʻcha-koʻyda, bozor-oʻcharda, toʻy-hashamlarda otamning shogirdlari: "iye, ustozning qizlari-ku”, - deya salomlashganda, "Tursunboyning qizimisan?” – deya quvonchdan yuzlari yorishib hol-ahvol soʻrashgan otamning doʻstlarini koʻrganda shunday insonning farzandi boʻlganimdan qalbim faxrga toʻlib, boshim osmon qadar yuksaladi.

Ehtimol, men otamga shogird boʻlish darajasida emasdirman, ammo otam – ustozim deyish men uchun sharaf!

Chunki otajonimning sinfga kirib, mumtoz adabiyot namunalaridan, yangi davr va qardosh xalqlar adabiyotidan oʻqigan gʻazalu sheʼrlari, nasriy asarlar qahramonlari nafasini his qilish darajasida tushuntirib bergan mavzulari, ona tilimizning naqadar ranginligi, birgina tovush yoki birgina tinish belgisining ahamiyati haqidagi betakror saboqlari hali-hanuz qulogʻimda.

Ehtimol, xuddi oʻsha paytlardan menga otam kabi oʻqituvchi boʻlish eng katta orzuga aylangandir. Ammo, bugun men aziz ustozim-otam kabi boʻlmasam ham unga izdosh boʻlganimdan behad mamnunman.

Aziz Otajon! Siz menga va farzandlaringizga bu nurli hayotdan zavq olib, oʻzgalarga zavq ulashib yashashni oʻrgatdingiz. Siz borsizki, boshimiz baland, xonadonimiz fayzli, muammolar yechimli.

Allohdan tilagim, nevara-yu chevaralaringiz quvonchli kunlarida ham onajonim bilan xonadonimiz fayzi boʻlib yashang.

Aziz ota-onam, mehr daryoyim,

Sizlardir umrimning ulugʻ tojdori.

Yoʻllarim yoritgan nurli ziyoyim,

Men qarzim uzolmam to umrim boʻyi.

Quyunlar aylansa, dovullar tursa,

Togʻ kabi bizlarning qalqonimizsiz.

Saraton yoqsa-yu qovjirab, soʻlsak,

Hayot baxsh etguvchi ummonimizsiz.

Qorongʻi tunlarni yoritgan Oysiz,

Tiriklik nurini taratgan Quyosh.

Toshda gul undirgan obi-hayotsiz,

Tilagim, Allohim bersin ulugʻ yosh.

Shirin OʻROZIMBETOVA,

6-sonli maktab.