Biz hech kimdan kam emasmiz va hech qachon kam boʻlmaymiz!

5-21-avgust kunlarida butun dunyo xalqlarining diqqat-eʼtibori Braziliyaning Rio-de-Janeyro shahrida boʻlib oʻtgan XXXI yozgi Olimpiada oʻyinlari – har toʻrt yillikning eng yirik sport festivali bellashuvlarida boʻldi desak, mubolagʻa boʻlmas.

Boisi, 200 dan ziyod davlatlar sportchilari gʻoliblik uchun oʻzaro  bahs olib borgan Olimpiada musobaqalari qaysi davlatda sportga eʼtibor kuchli ekanligini va qaysi davlat vakillarining musobaqalarga yaxshi tayyorgarliklar koʻrganligini aniqlaydigan sinovdir.

Mamlakatimizda Yurtboshimiz I.Karimov rahbarligida sportning ommalashuviga ulkan eʼtibor qaratilayotganligi oʻz samarasini berganligini Olimpiada bahslari davomida butun dunyo koʻrdi, tan oldi.

Olimpiadada oʻz ishtirokini 1996-yilda  boshlagan Oʻzbekiston milliy terma jamoasi ortda qolgan olti Olimpiadadagi eng yaxshi koʻrsatkichini "Rio - 2016” Olimpiadasida qayd etdi.

Oʻzbekiston milliy terma jamoasi Olimpiada umumiy bahslarida dunyoda 21-oʻrinni, Osiyoda toʻrtinchi, MDH davlatlari orasida ikkinchi, Markaziy Osiyoda esa birinchi oʻrinni qoʻlga kiritdi. Boks terma jamoamiz esa birinchi oʻrinni egalladi.  Sportchilarimiz 4 ta oltin, 2 ta kumush va 7 bronza medalini yengib olishdi. Mamlakatimiz sport sharafini yuksaltirishga muvaffaq boʻlgan sportchilarimizni bugun butun Oʻzbekiston xalqi sharaflamoqda.

Sport festivalida ayniqsa bokschilarimizning ishtiroki butun xalqimizni mamnun qildi. Sportning aynan shu turidan Hasanboy Doʻstmatov, Fazliddin Gʻoyibnazarov, Shahobiddin  Zoirovlar tomonidan uchta oltin medalning qoʻlga kiritilishi mamlakatimiz sport tarixida oʻziga xos unutilmas voqea boʻlib qoladi. Hasanboy  Doʻstmatovga Olimpiada oʻyinlarining texnikasi eng kuchli bokschiga beriladigan kubogi topshirilgani (bu mukofot bittagina sportchiga nasib etadi) mening qalbimda ham yuksak faxr uygʻotdi.

Qoʻlga kiritilgan medallarning koʻpchiligi aynan boks turidan ekanligi diqqatga sazovordir. Shuningdek, ogʻir atletikadan oltin medalni qoʻlga kiritgan Ruslan Nuriddinovning Olimpiada rekordini yangilagani butun sport olamida oʻziga xos voqea boʻldi.

Eng muhimi, oʻzbekistonlik sportchilar festival bahslarining eng intizomli qatnashchilari, deya eʼtirof etildi.

Aynan  sport murabbiyi boʻlganimdan bular menda ulkan taassurotlar qoldirdi. Yaratilgan bugungidek sharoitlardan unumli foydalanib, shogirdlarim bilan avvalgidan ham qunt bilan ishlashga undadi. Oradan toʻrt yil oʻtib, olimpiada estafetasini olgan Yaponiya mamlakati poytaxti Tokioda boʻlib oʻtadigan sport festialida vakillarimiz dunyo miqyosida oldingi oʻrinlarda boʻlishiga ishonaman. Chunki buning uchun mamlakatimizda barcha imkoniyatlar bor.

BOʻSMning boks boʻyicha murabbiyi.

(Foto-http://turkistonpress.uz)