MUSTAQILLIK - ENG ULUGʻ, ENG AZIZ NEʼMAT

Mamlakatimiz istiqlolga erishgan sana – 1-sentyabr – mustaqillik bayrami tobora yaqinlashib kelmoqda. Ayni kunlarda butun yurtimiz boʻylab mustaqilligimizning 22-yilligini munosib kutib olishga qizgʻin tayyorgarlik ishlari davom etmoqda.

Mustaqillik - bugun biz erishgan yuksak marralarga qanot boʻlgan kuch. Bugun yurtimizning har bir goʻshasida boʻy koʻrsatib turgan ozod va obod Vatan manzaralari, avvalo, istiqlol sharofatidandir. Shu bois xalqimiz har yili eng ulugʻ va eng aziz bayramimizni oʻzgacha shukuh, koʻtarinki kayfiyat bilan kutib oladi.

Bugun mamlakatimizda qoʻlga kiritilayotgan yutuqlar va erishilayotgan yangi-yangi marralar haqida gapirganda, bu yutuqlarning tub asosida istiqlolning ilk kunlaridan belgilab olingan «Inson manfaati — har narsadan ulugʻ», «Inson, uning huquq va erkinliklari hamda manfaatlari — eng oliy qadriyat», «Islohot islohot uchun emas, avvalo inson uchun, uning farovon hayoti uchun», «Hamma narsa — inson uchun, uning kelajagi uchun» kabi koʻplab ezgu daʼvatlar va hayotbaxsh gʻoyalar turganini mamnuniyat bilan tilga olamiz.

Mustaqillik bizga eng avvalo oʻzligimizni qaytarib berdi. Kim ekanimizni, qanday buyuk zotlar avlodi ekanimizni, hech kimdan kam emasligimizni va hech qachon kam boʻlmasligimizni anglab, oʻtgan 22-yillik tarixan qisqa davrda dunyo hamjamiyatida oʻz oʻrnimizga, oʻz soʻzimizga ega boʻldik.

Mustaqillik bizga inʼom etgan huquqlar juda koʻp. Masalan, birgina mulkdorlik huquqini olaylik. Bundan 22-yil oldin «xususiy mulk» degan tushunchaning oʻzi yoʻq edi. Istiqlol sharofati bilan bugun yurtimizda har bir inson mulkdor boʻla oladi, tadbirkorlar safi yil sayin ortib bormoqda. Barchamizga maʼlumki, Oʻzbekiston Respublikasi mustaqilligining dastlabki kunlaridanoq mamlakatimizda iqtisodiyotning gʻoyat muhim sohasi boʻlmish kichik biznesni rivojlantirishni ragʻbatlantirishga, xususiy tadbirkorlik huquqlarining kafolatlari va himoyasining kuchli tizimini yaratishga juda katta eʼtibor berib kelinmoqda.

Prezidentimiz Islom Karimov rahnamoligida mamlakatimizda ishbilarmonlik muhitini yaxshilash, ruxsat berish tartib-taomillarini soddalashtirish, soliq va statistik hisobotlarni qisqartirishga qaratilgan qonun hujjatlari va normativ aktlar majmuasining qabul qilinishi kichik biznes subʼektlari rivojiga xizmat qilmoqda.

Tadbirokorlarning qonun bilan kafolatlangan huquqlari va manfaatlarini himoya qilish, ularning rivojlanishiga toʻsiq boʻlayotgan muammolarni bartaraf etish borasida tuman Prokuraturasi tomonidan qator amaliy ishlar qilinmoqda. Jumladan, joriy yilning oʻtgan 6 oyi davomida 8 ta holatda Prokuratura aralashuvi bilan tadbirkorlarning poymol qilingan huquqlari tiklandi. Prokuraturada tashkil qilingan 007 raqamli ishonch telefoniga tadbirkorlardan 4 ta qoʻngʻiroqlar kelib tushgan boʻlsa, telefon orqali murojaatlarda aytilgan muammolarning barchasi tadbirkorlar foydasiga hal qilindi.

Shuni faxr bilan aytish mumkinki, bugun yurtimizning har bir fuqarosi istiqlol bergan ana shu huquq – tadbirkorlik bilan shugʻullanib, mulkdor boʻlish, oʻz oilasi, oʻzi yashayotgan hudud va mamlakatimiz iqtisodiyotining rivojlanishiga hissa qoʻshish baxtiga ega.

Fursatdan foydalanib, ana shunday baxtni oʻzining oliy maqsadi, Vatanimiz taraqqiyotiga hissa qoʻshishni farzandlik burchi, deb bilgan holda turli sohalarda ishlab, mehnat qilayotgan har bir yurtdoshimizni yaqinlashib kelayotgan eng ulugʻ va eng aziz bayramimiz – mustaqilligimizning 22-yilligi bilan tabriklayman.

Qadr-qimmatimiz, tayanchimiz va iftixorimiz boʻlmish muqaddas Vatanimiz hamisha tinch, xalqimiz omon, turmushimiz obod va istiqlolimiz abadiy boʻlsin!

Farxad ALLAMBERGENOV,

tuman prokurori, adliya maslahatchisi.