MILLIY QONUNChILIGIMIZDA AKS ETGAN QADRIYaT

Maʼlumki, har bir ota-ona oʻz farzandini oq yuvib, oq tarab voyaga yetkazar ekan, kelajakda farzandining kamolini koʻrishni orzu qiladi, hayotda oʻz oʻrniga ega boʻlishini xohlaydi. Shuningdek, har bir ota-ona farzandlari voyaga yetgach, oʻzlariga yordamchi boʻlishini, keksayganda qobil farzand boʻlib, ularga suyanchiq boʻlishini istaydi. Bu kabi milliy qadriyatlarimiz, hatto qonunchiligimizda ham oʻz aksini topgan. Jumladan, ota-onaning farzandlari oldidagi majburiyati haqida Oʻzbekiston Respublikasi Konstitutsiyasining 64-moddasida: «Ota-onalar oʻz farzandlarini voyaga yetgunlariga qadar boqish va tarbiyalashga majburdirlar», deyilgan boʻlsa, Konstitutsiyaning 66-moddasida: «Voyaga yetgan, mehnatga layoqatli farzandlar oʻz ota-onalari haqida gʻamxoʻrlik qilishga majburdirlar», deb belgilab qoʻyilgan.

Mazkur konstitutsiyaviy normalarning mohiyati shuki, har bir ota-ona oʻz farzandini voyaga yetkazishi va oʻz navbatida, farzandlar voyaga yetgach, ota-onalariga gʻamxoʻr boʻlishi taʼkidlangan.

Demak, ota-onaning farzandlarini tarbiyalashi va voyaga yetkazishi farzandlarga ayrim majburiyatlarni yuklar ekan, oʻz navbatida, davlat tomonidan ham yosh avlodning rivojlanishiga eʼtibor qaratilishi zamirida kelajakda ular mamlakat rivojiga munosib hissa qoʻshishiga umid bogʻlash maqsadi yotadi.

Shu oʻrinda «Inson huquqlari umumjahon Deklaratsiyasi»ning 29-moddasidagi bir muhim qoidani eslab oʻtish lozim. Ushbu moddada: «Har bir inson jamiyat oldida majburiyatlarga ega, zero, uning shaxsi shu jamiyatda toʻla va erkin kamol topishi mumkin», deyilgan. Bu qoida maʼnaviy mazmunga ega boʻlib, uning zamirida jamiyatdagi boshqa insonlarning huquq va erkinligi hurmat qilinishiga erishish maqsadi mujassam.

Xulosa sifatida shuni aytish lozimki, yoshlar faqat huquqlarga ega boʻlib qolmay, muayyan bir majburiyatlarni ham bajarishlari, Vatan oldidagi masʼuliyatni his etmoqliklari lozim.

Demak, yoshlarimiz hukumatimiz tomonidan berilayotgan yuksak eʼtibordan samarali foydalangan holda jamiyatimiz taraqqiyoti, yurt istiqboliga munosib hissa qoʻshishi, bu ularning zimmasidagi eng oliy vazifa ekanligini unutmasliklari kerak.

Sultanmurat Kalenderov,

Nukus harbiy prokurorining katta yordamchisi, adliya kapitani.

(Foto -