MAROQLI SAFARDAN QUVVAT OLDIK

Prezidentimizning Farmon va qarorlari bilan “Oʻzbekiston boʻylab sayohat qil!” shiori ostida oʻquvchi va talabalar, mehnat faxriylari, ishchi-xizmatchilar, mahallalar faollari va barcha aholi qatlami uchun mamlakatimiz boʻylab maroqli sayohatlarga chiqish imkoni yaratildi, sayyohlik firmalariga va sayohatga chiquvchilarga qator imtiyozlar berildi. Ana shu qulaylik va imkoniyatlar bizni Navroʻz bayrami kunlarida mamlakatimizning tarixiy, madaniy-maʼrifiy hamda ekologik hududlari tomon sayohatga chorladi.

Joriy yilning 19-22-mart kunlari mamlakatimizning tarixiy Samarqand va Buxoroi Sharif shaharlari boʻylab sayohatga chiqqan ijodkor-jurnalistlar qadim va hamisha navqiron shaharlarning osori atiqalari ila uygʻunlashib taraqqiy etgan bugungi jamolidan cheksiz bahra oldilar.

Dastlab daryo toʻlqinlarini eslatuvchi ziyoratchilar oqimiga qoʻshilib, muhtaram Birinchi Prezidentimizning ruhi mangu orom topgan makonga qadam qoʻydik. Tumonat izdihom ichra Islom Karimov maqbarasi qarshisida taʼzim qilarkanmiz, ming-minglab yurtdoshlarimizni bu tabarruk maskanga eltgan samimiyat taftini butun vujudimiz ila his etdik, goʻyo.

Aql-zakovatda, malohatda benazir malika – ulugʻ sohibqiron Amir Temur hazratlarining zavjalari – Bibixonim – Saroy Mulk Xonim sharafiga sohibqiron bobomiz tomonidan bunyod etilgan mahobatli madrasa va Bibixonim maqbarasida bir zum sukut saqlab, yana ulugʻlar haqiga tilovatlar qildik.

Registon maydonidan oʻtib, yengilmas sarkarda, buyuk Amir Temur maqbarasi tomon yuzlandik. Goʻyo ulugʻ zotning salobati bosgan kabi bu yerda hozir boʻlgan ziyoratchilar ohista, sassiz qadam tashlaydilar. Temurshohning qabri ustiga qurilgan naqshinkor qubbali gumbaz va maqbara bilan qabr oraligʻida ajib nur! Goʻyo bu nur oʻtmish bilan bugungi dorilomon zamon osmonini tutashtirib turgan kabi sirli.

Shahar koʻchalarini yayov kezgan sari dillar poklanib, koʻngillar yayraydi. Ilmi-nu-jum pir-u komili Ulugʻbek rasadxonasi ziyoratidan qalblar yanada tozardi, aqlimiz ravshanlashdi.

Navroʻzi ayyom shodiyonalarini samarqandliklar va minglab mehmon-u sayyohlar, ziyoratchilar bilan nishonladik. Quyosh hamal burjiga kirayotgan 20-mart kuni kechqurun jamoamiz bilan Hazrati Dovud (a.s) ziyoratgohiga yetib keldik. Soʻlim va musaffo togʻ havosi yoʻl charchoqlaridan bizni forigʻ etib, ruhitanimiz orom topdi.

Erta tongdan togʻ boshiga oshiqdik. 1274 ta zinadan ohista yuqoriga koʻtarilishni boshladik. Hech kim: “men bu zinalardan, chiqa olmayman”, demadi. Keksa-yu yosh zinalarni bir-bir bosib, charchoqni unutib, tobora yuqori koʻtarildilar...

***

Koʻhna Buxoro. Minorai Kalon, dunyoga mashhur allomalar zakovatini charxlagan Mir Arab madrasasi, bir vaqtning oʻzida minglab namozxonlar ibodat qilishga qodir jomʼe masjidi va koʻplab tarixiy inshootlar bilan tanishgach, Ark tomon yoʻnaldik. Ark – Buxoroi sharif ichra shaharcha. Hamon qadimiy goʻzal salobatini yoʻqotmagan koʻhna Ark darvozasiga yaqinlasharkanmiz, hamrohimiz, bizni Buxoroi sharif obidalari tarixi va buguni bilan tanishtirayotgan tarixchi-gid Zohirjon:

– Qarang, buxoroliklarning kechki Navroʻz sayli boshlanayotir, – dedilar.

Haqiqatan ham Ark darvozasi oldidagi maydon yorqin chiroqlar yogʻdusida yanada goʻzal qiyofa kasb etgan, sahnada Buxoro yoshlari ijrosidagi bayramona kuy-u qoʻshiqlar avjida edi. Faqat buxoroliklarga xos biri-biridan goʻzal liboslar kiyib, yasangan yoshlar, keksalar davrasida kechki Navroʻz saylida ishtirok etdik. Garchi kech kirib qolgan boʻlsa-da, Ark ichkarisiga kirishimizga ruxsat berishganidan, bu yerda viloyatlardan kelgan ziyoratchilar uchun barcha sharoitlar muhayyoligidan xursand boʻlib, Arkni aylandik. Buxoroning soʻnggi hukmdori Amir Olimxon taxti, Ark xonaqohlari, masjidini tomosha qildik. Buxoro koʻchalarini charogʻon aylab, koʻngillarga xotirjamlik, quvonch baxsh etib turgan rangin chiroqlar yogʻdusida kechki Navroʻz sayli tantanalaridan olam-olam bahra oldik.

Nihoyat... koʻngillarimiz osmon qadar yuksaldi. Ona yurt jamolidan, jannatmakon bogʻ-u chamanlar, purviqor togʻlar havosidan vujudimiz tozardi. Qadim Buxoroi sharif bilan xayrlashdik.

Albatta, Oʻzbekiston boʻylab sayohatni Alloh ravo koʻrgan yana bir qutlugʻ kunda yana va yana davom ettirishni niyat qildik. Va ... Besh kunlik hordiq, maroqli sayohatdan soʻng xush kayfiyat bilan ijodga shoʻngʻidik.

Mangʻitdan nariga bir qadam qoʻyib,

Ona yurt havosin simirdik toʻyib.

Aslida eng avval Vatanni suyib,

Vatanni tanimoq ulugʻ saodat,

Va qalbni poklamoq–qutlugʻ ibodat!

Azizlar, avvalo el-yurtga taʼzim –

Otaga taʼzimdir, onaga taʼzim.

Ahli odam uchun eng ulugʻ, azim,

Aziz Vatan deya qiling qiroat,

Har zarra tuprogʻin eting ziyorat!

Robiya YOʻLDOShEVA.