Jayxun ilhomlari

Vatan

Bilaman,

jonimni soʻramaysan.

Quvonasan yashasam toʻgʻri.

Bor mehrimni koʻrsam baham,

boʻlmasam bas xoin yo oʻgʻri.

Kamolim tilaysan har vaqt

shundanmi, yorugʻ yoʻlim.

Vaqtning millaridek

bilmaysan tinim.

Arigʻimga ekdim nihollar

koʻrgan koʻzlar quvnasin.

Tilaysan bolalaring

ortidan baxt quvlasin.

Yashayapman oʻzimga sodiq

dil yozaman, oʻqiyman kitob.

Noning, tuzing oqlamoq uchun

yuragimda iztirob.

To soʻnggi lahza qadar

talpinaman sen tomon.

Quyoshing kulsin,

yigʻlamasin osmon!

Shahzod Anvar.

Ehtirom

Buyuk Istiqlol yoʻli –

Undan oʻtadi karvon.

Eng ulugʻ karvon asli

Jonajon Oʻzbekiston!

Toʻxtamay, ortga qaytmay,

Maqsad sari intilar.

Oʻzga millat farzandin

Oʻzinikidek bilar.

Yurt oldida burchini,

Aʼlo etib oqlagan.

Xalqiga muhabbatni

Qalb toʻrida saqlagan.

Istiqlol karvoniga

U boʻldi tolmas sarbon,

Kelajak devonida

Manzilin quchdi karvon.

Karvon bilan umrini,

Bogʻlagandir bu inson

Umri uzun boʻlsin va

Doimo boʻlsin omon!

Mehribon ShOMURODOVA, 1-sonli maktab oʻquvchisi.

Oʻzbekiston

Oʻzbekiston, nurga toʻla bogʻlar yurtisan,

Samoga boʻy choʻzgan togʻlar yurtisan.

Olim-u shoirlar kamolga yetgan,

Ajdodlardan meros, durlar yurtisan.

Bagʻringda ulgʻaytding buyuk oʻgʻlonlar,

Ular bunyod etdi metin qoʻrgʻonlar.

Jaloliddin hamda yengilmas Temur

Qalbida Vatan deb yongan tuygʻular.

Tinch oʻlkam, tinchliging - bebaho baxtim,

Istiqlol nuri-la charogʻon taxtim.

Vatan, qarogʻimda asrab oʻtaman,

Senga xizmat qilmoq eng ulugʻ ahdim!

Sveta XUDOYoROVA,

67-sonli maktab oʻquvchisi

YuRTBOShIMGA

Sizni sevar bugun siz sevgan Vatan

Har nafasda bordir aziz nomingiz.

Millatlar yashaydi bir tan-u bir jon

Xalq yakdil, butundir rizq-u nonimiz.

Sir toʻla nechalab qulfni ochdingiz,

Xalqim, deb el aro mehr sochdingiz.

Mustaqillik uchun, ozodlik uchun,

Dunyoga dengizday toʻlib toshdingiz.

Vatanni yoritgan porloq Quyoshim –

Xalq dilida mangu qolgan Yurtboshim!

Latofat OʻROZALIYeVA, Mangʻit qishloq xoʻjalik kasb-hunar kolleji oʻquvchisi.

Yurtim

Yurtimning beqiyos bogʻ-u rogʻlari,

Purviqor togʻlari, chamanzorlari,

Insonlarning goʻzal fazilatlari,

Tugʻilgan makonim – Oʻzbekistonim!

Farzandingman seni jondan sevuvchi,

Sen uchun hattoki jondan kechguvchi.

Onamga qiyossan, ey mehribonim,

Tugʻilgan makonim – Oʻzbekistonim!

Shahlo QUROLOVA, 62-sonli

maktab oʻquvchisi.