Jamoatchilik nazorati uchun jamoatfikri.uz portali ishga tushiriladi

Mamlakatimiz taraqqiyotini yuksaltirish borasidagi davlatimiz rahbarining qaror va topshiriqlari davlat hokimiyatining barcha boʻgʻinlarida toʻliq hamda vaqtida bajarilsa bu boradagi samaradorlik yanada ortadi. Shu qaror va topshiriqlarning bajarilishi yuzasidan tizimli nazorat olib borish uchun “Ijro.gov.uz” ijro intizomi idoralararo yagona elektron tizimi yaratildi. Tizim orqali Oʻzbekiston Respublikasi Vazirlar Mahkamasi va Hisob palatasi tomonidan tizimli nazorat olib borish yoʻlga qoʻyilgan.

Prezidentimizning shu yil 5-oktyabrda “Davlat organlari va tashkilotlarida ijro intizomini yanada mustahkamlash chora-tadbirlari toʻgʻrisida”gi Qarori qabul qilindi. Qarorda ijro intizomi nazoratini sifatli va samarali tashkil qilish hamda amalga oshirilishini taʼminlash hanuzgacha talab darajasida yoʻlga qoʻyilmayotgani, zarur sharoitlar yaratish borasidagi choralar samarasiz qolayotgani, rioya etish masalalarida salbiy holatlar uchrayotgani aytib oʻtilgan. Ijro intizomini yanada mustahkamlash maqsadidagi ushbu qarorda bu boradagi kamchiliklarga barham berish bilan birga Prezident qarorlari va topshiriqlari ijrosi ustidan nazoart tizimini takomillashtirish, shuningdek jamoatchilik nazoratini ham amalga oshirish uchun zarur shart-sharoitlar yaratish koʻzda tutilgan.

Qarorda ijro yuzasidan nazorat olib boruvchi va “Ijro.gov.uz” tizimi boʻyicha ishlarni muvofiqlashtiruvchi davlat organi Hisob palatasi, tizimni doimiy ravishda texnik qoʻllab-quvvatlash va takomillashtirishni taʼminlovchi ishchi organ esa Axborot texnologiyalarini rivojlantirish vazirligi deb belgilangan. Shu bilan birga nazoratni amalga oshirish boʻyicha tegishli davlat organlariga masʼullik ham yuklatilgan. Undan tashqari, “Ijro.gov.uz” ijro intizomi idoralararo yagona elektron tizimning ishlash tartibi toʻgʻrisidagi ham Nizom ishlab chiqilgan boʻlib, tegishli davlat organlari va tashkilotlarga tizimda doimiy ishlashni tashkil qilishni taʼminlash topshirilgan.

Belgilangan chora-tadbirlar qatoriga 2019-yil 1-yanvarga qadar yagona interaktiv davlat xizmatlari portali faoliyati doirasida Prezident qarorlari ijrosi yuzasidan aholi, senatorlar, deputatlar, tadbirkorlik subʼektlari va NNT lar tomonidan jamoatchilik nazorati mexanizmining amalga oshirilishini taʼminlovchi “Jamoatfikri.uz” portalining tashkil etilishi va yoʻlga qoʻyilishini taʼminlash ham kiritilgan. “Ijro.gov.uz” tizimining ishlash tartibi belgilangan Nizomda mazkur tizimning Prezident farmonlari, qarorlari va farmoyishlarida hamda Prezident raisligida oʻtkazilgan kengashlar bayonnomalarida belgilangan topshiriqlar bajarilishining nazoratini taʼminlovchi axborot tizimi hisoblanishi aytilgan.

Nizomda Prezident hujjatlari va topshiriqlarida koʻzda tutilgan topshiriqlarni oʻz vaqtida, sifatli, samarali hamda natijadorlik bilan ijro etilishini taʼminlash, tizim ishtirokchilari uchun yagona axborot makonini yaratish, tegishli rahbarlarning belgilangan vazifalar va topshiriqlarning oʻz vaqtida va sifatli ijro etilishi uchun shaxsiy javobgarligini kuchaytirish, tizimning asosiy vazifalari qilib koʻrsatilgan. Shuningdek, axborot kommunikatsiya texnologiyalarini qoʻllash, ish yuritish ichki jarayonlarini avtomatlashtirish orqali vazirliklar, idoralar, mahalliy davlat hokimiyati organlari va boshqa tashkilotlar faoliyatining samaradorligi va natijadorligini oshirish, “Ijro.gov.uz” tizimi ishtirokchilari oʻrtasida muntazam idoralararo elektron hamkorlikni taʼminlash ham tizimda amalga oshiriladi.

Oʻzbekiston Respublikasi Prezidentining hujjatlari va topshiriqlarini “Ijro.gov.uz” tizimiga kiritish tartibi Nizmoning 2-bobiga muvofiq amalga oshiriladi. Ijro etish sifati va muddatlariga rioya etilishini tizim orqali nazorat qilish tartibi esa 3-bobda koʻrsatilgan. Foydalanuvchilarning tizimdan foydalanishlarini tashkil qilish 4-bobga koʻra amalga oshiriladi. Tizimdan foydalanuvchilar toʻgʻrisidagi maʼlumotlarning boshqarilishi 5-bobda batafsil koʻrsatib berilgan.

Prezidentimizning “Davlat organlari va tashkilotlarida ijro intizomini yanada mustahkamlash chora-tadbirlari toʻgʻrisida”gi Qarori barcha sohalarda amalga oshirilayotgan islohotlar samarasi ortishida ahamiyatli boʻlgan ijro intizomining zarur darajada tashkil etilishini taʼminlaydi. Shuningdek, mazkur Qaror ijro intizomining yanada mustahkamlanishida muhim oʻrin tutadi.

O.Xudoyberganova.