Ona tabiat – tirikligimiz manbai

Har tong oʻrnimizdan turib tinch-sokin chor-atrofimizga qarab, koʻnglimiz xotirjam boʻladi. Koʻksimizni toʻldirib, erkin nafas olamiz. Goʻyo olam shunday yaralganday, shu tarzda hayot davom etaveradiganday tuyuladi. Aslida oʻzimiz yashayotgan olamning muvozanati, holati bizning munosabatimizga ham koʻp jihatdan bogʻliq ekanligini oʻylab oʻtirmaymiz. Yer kurrasining turli nuqtalarida sodir boʻlayotgan tabiiy ofatlar, ularning natijasida kelib chiqayotgan koʻngilsizliklar haqida eshitib tursak-da, huddi bizga daxlsizday sezamiz oʻzimizni. Bu tugʻrimi? Albatta yoʻq. Aytish mumkinki, ona tabiatimizga notoʻgʻri munosabatda boʻlish, asrab-avaylamaslikning oxiri koʻpgina noxush holatlarga sabab boʻlishi mumkin.

Tuman tabiatni muhofaza qilish boʻlimi tomonidan tumanimizning barcha korxona, tashkilot, muassasalarda, oʻquv maskanlarida atrof-muhitni toza saqlash, obodonlashtirish, yashil daraxtlarni koʻpaytirish lozimligi xususida yil mobaynida tushuntirish-targʻibot ishlari olib borildi. Tumanda mavjud 74 ta qabriston roʻyxatga olinib, obodonlashtirish, tozalash ishlari muntazam nazorat qilib borilmoqda. Amudaryoning 500 metrlik muhofaza hududida suvifloslanishining oldi olinmoqda, atmosfera havosini muhofaza qilish, xazon, chiqindilarning yoqib yuborilishining oldini olishga doir qator reydlar oʻtkazdik.

Shuningdek, Oʻzbekiston Respublikasi Vazirlar Mahkamasining 2003-yil 1-mayda qabul qilingan 199- Qarori talablariga rioya qilmagani, tabiiy muhitni ifloslantirgani va hududida chiqindilar toʻplanib turishiga yoʻl qoʻygani uchun 22 ta korxonaga yil dvaomida 3 mln. 724 ming 362 soʻm jarima solindi va undirildi. Atmosfera havosini muhofaza qilish qoidalarini buzgan 41 shaxsga 2 mln. 413000 soʻm, suv resurslarini muhofaza qilish qoidalariga amal qilmagan 24 nafar jismoniy shaxslarga 1 mln. 910 ming 160 soʻm, yer osti va yer usta resurslarini muhofaza qilish qoidalariga amal qilmagan 16 nafar shaxsga 1 mln. 321 ming 200 soʻm miqdorida jarima solindi. Fuqarolardan tushgan 6 ta ariza ijobiy hal qilindi. Yil davomida 2-marta "toza havo” tadbiri, 12-marta "Ochiq eshiklar kuni” oʻtkazildi, tabiatni muhofaza qilish qonunlarini aholiga tushuntirish – targʻibot ishlari muntazam olib borilmoqda.

Bizning barcha saʼy-harakatlarimiz atrof-muhitning musaffo, tozaligiga, ona tabiatimizning muhofaza qilinishiga qaratilgandir. Tumanimizning barchaaholisi bu borada bizga maslakdosh boʻladilar, deb ishonamiz. Chunki tabiatimiz – tirikligimizdir.

M.ABDREIMOV,

Qoraqalpogʻiston Respublikasi tabiatni muhofaza qilish qoʻmitasi tuman boʻlimi boshligʻi.