Jayxun ilhomlari
Aziz karvonim
Yoʻlga otlanibdi ming yillik karvon,
Oshib oʻtgan mana necha choʻl, dovon.
Sarbon bor qoʻlida ezgulik tugʻi,
Maqsad bor, soʻzi bir – qilichning tigʻi.
Bepoyon dashtlarda, hattoki choʻlda,
Karvon ketib borar, bir ravon yoʻlda.
Kimlar havas bilan boqar uzoqdan,
Ollohim asrasin xavfdan, tuzoqdan.
Bu karvon ichida hayot qaynaydi,
Insonlar ahildir, koʻzlar chaqnaydi.
Bosilgan izlardan unarkan gullar,
Quyoshning taftidan yayrar koʻngillar.
Yoʻling ravon boʻlsin, aziz karvonim,
Hayoting bardavom boʻlsin, Sarbonim!
Oldinda baxtiyor manzillar kutar,
Koʻzlangan manzillar baxt sari eltar!
Alisher Ahmedov.
ONAM
Hayot sinovlariga berolmay bardosh,
Qalam-u qogʻozga boʻlsam-u sirdosh.
Onajonim boʻlar menga yelkadosh,
Quyoshim, oftobim, mehribon onam.
Koʻzlarimga inganida nam,
Yomonlar gaplari qilarkan alam.
Shunday paytda yupatar onam,
Boshimda parvonam, sarbonim onam.
Mehri daryolarga sigʻmagan onam,
Baxtli, taxtli boʻlsin der, bolam.
Vatanim koriga yarasam agar
Faxr-u iftixorga toʻlardi onam!
Dilnoza SOBIROVA.
MEN ORZU QILAMAN
Men orzu qilaman hayotda baxtni,
Orzular orzuga ulanib ketar.
Baʼzida tilaklar aylanib rostga,
Tushdek koʻnglim maqsadga yetar.
Hayot, bu – ummondir, oxiri yoʻqdir,
Orzular oʻxshaydi goʻyo baliqqa.
Baliqchi misoli suzar, odamzod,
Orzularin ovlab chiqar qirgʻoqqa.
Orzu ham kuch bermas, qoʻlda turmaydi,
Inson ertasini aslo bilmaydi.
Oldida toʻfonmi, doʻl bormi, bilmas,
Ummonda toʻlqinlar aslo tinmaydi.
Men orzu qilaman oʻsha ummonda,
Baliqchi misoli baliq ovlasam.
Allohimning oʻzi kuch-quvvat bersa,
Orzular ketidan tinmay quvlasam.
Sevara SIDABULLAYeVA.
DAVLATIMSIZ, OTAJON!
Poyingizni koʻzga suray, otajon,
Nomingizni oqlab yuray har qachon.
Siz istagan inson boʻlib hayotda,
Doim ezgu ishlar qilay, otajon!
Siz borsizki, biz bormiz bu dunyoda,
Borligingiz har narsadan ziyoda.
Har nafasda hurlik hissin tuyaman,
Baliq erkin suzganidek daryoda.
Ota, desam qalbim toʻlar gʻururga,
Yurak-bagʻrim toʻlib ketar faxrga.
Talpinaman hamon otam bagʻriga,
Lol qolaman yo Rabbim, bu mehrga.
Otasini ulugʻlagan har inson,
El ichida qadr topgan har zamon.
Alloh oʻzi eʼzozlagan bu zotlar,
Duo qilsa, duosi asrar jahon.
Koʻzlaringiz nuri boʻlay otajon,
Soʻzlaringiz duri boʻlay, otajon.
Siz panohim, eng bebaho davlatim,
Poyingizga gullar toʻshay har zamon.
Uyimizni jannatmakon bogʻ qilib,
Har onimiz tarovatli chogʻ qilib.
Oʻstirdingiz bir oʻgʻil, uch qizlarni,
Magʻrur boqing, koʻksingizni togʻ qilib.
Shodlik kuyi yangrar jism-u jonimda,
Saxiy beklar qoni oqar qonimda.
Bu dunyoda mendan baxtli inson yoʻq,
Mening shunday otam borlar yonimda.
Nasiba EShMURODOVA,
55-maktab oʻqituvchisi.
BIZ DUNYoGA MEHMONMIZ
Yoshi bir yerga borganda inson,
Chuqur nazar solar ekan hayotga.
Bu dunyoda hech bir narsa
Boqiy boʻlmas ekan, nachora.
Baʼzilar mansab kursisini
Oʻzlariga abadiy bilar.
Insoniylik qiyofasini
Bir lahzada unutib qoʻyar.
Baʼzan koʻkda oyning yuzini
Qora bulut qoplab olganday.
Tundlashadi chehralari ham,
Koʻngliday tor dunyolari ham.
Aslida-chi, birgina soʻzdan
Togʻ boʻladi insonlar qalbi.
Mehr nuri balqisin koʻzda,
Quyosh porlab turgani kabi.
Abadiymas, amal va boylik,
Odamiylik baridan ustun.
Biz mehmonmiz, shuni bilaylik,
Mehr ila bagʻrimiz butun.
Inobat OTAJONOVA, 38-maktab oʻqituvchisi.
VATANPARVAR
Vatanparvar yigitlar,
Chegarani qoʻriqlar.
Tinim bilmay xizmatda,
Charchamasdan yurishar.
Jonin tikib garovga,
Ona yurt deb yashashar.
Tinchlik bermayin yovga,
Vatan uchun kurashar.
Sanjar OLIMOV, 40-maktab oʻquvchisi.
ZIYoDAGA
Albatta, sen yurib ketasan,
Orzuingga bir kun yetasan.
Aʼlo oʻqib dorulfununda,
Shifokorlik kasbin tutasan.
Umidingni uzma hech qachon,
Faqat olgʻa intilavergin.
Xastalikni yengib oʻtasan,
Matonatning qoʻlidan tutgin.
Koʻzingda yosh boʻlmasin, aslo,
Gʻam chekmagin, intil hayotga.
Sen kuchlisan, ishon Ziyoda,
Orzularing koʻchar hayotga.
Sardorbek KENJABOYeV.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
