“Yosh oilalar va qizlar” Respublika Konferentsiyasi doirasida maʼnaviy-maʼrifiy tadbir oʻtkazildi

Oʻzbekiston Respublikasi Davlat mustaqilligining 28 yilligi hamda “Xalqaro yoshlar” kuni munosabati bilan, Oʻzbekiston yoshlar ittifoqi va boshqa jamoat tashkilotlari hamkorligida “Jonajon Oʻzbekistonim, mangu boʻl omon!” shiori ostida “Yosh oilalar va qizlar” Respublika Konferentsiyasi doirasida 19-avgust kuni 16-sonli umumtaʼlim maktabida maʼnaviy-maʼrifiy tadbir oʻtkazildi.

Ushbu tadbir qizlarni yuksak odob-axloq tamoyillari, asosida tarbiyalash, ularning ijtimoiy-siyosiy faolligini oshirish, kasb-hunarga oʻrgatish, kiyinish va muomala madaniyatini oshirish, ongi va qalbini gʻoyaviy tahdidlardan himoya qilish, bugungi ezgu islohotlarga faol munosabatini shakllantirish, sogʻlom turmush tarzini targʻib qilish hamda ularni mustaqil hayotga tayyorlash kabi maqsadlarda tashkil qilindi.

Aytish joizki, soʻnggi yillarda Xotin-qizlar qoʻmitasi tomonidan yoshlarga oid davlat siyosatini amalga oshirishda bir qator ijobiy natijalarga erishildi. Yosh iqtidorli qizlar safini kengaytirish, ularni har tomonlama qoʻllab-quvvatlash, ijtimoiy-siyosiy faolligini oshirish, tadbirkorlikni qoʻllab-quvvatlash orqali ish oʻrinlarini yaratish, iqtidorli qizlar zahirasini shakllantirish Zulfiya nomidagi Davlat mukofotiga nomzodlar tayyorlash, ularni jamoat ishlariga biriktirish borasida keng koʻlamli chora-tadbirlar amalga oshirilmoqda.

Ushbu jarayonda iqtidorli, intellektual salohiyati yuqori, bugungi kunda davlat va jamiyat hayotida faol ishtirok etayotgan qizlarimiz bilan birga faol boʻlmagan yoshlar ham qamrab olindi.

“Yosh oilalar va qizlar” Respublika Konferentsiyasi doirasida tashkil qilingan tadbirni tuman Xotin-qizlar qoʻmitasi bosh mutaxassisi Gavhar Chimbaychiyeva ochdi va ishtirokchilarni tadbir maqsadi bilan tanishtirdi. Tadbirda “Oila” ilmiy-amaliy markazi tuman boʻlimi mutaxassisi Husnida Abduraxmanova hamda 16-sonli maktab direktori Ravshanoy Oʻrozboyeva soʻzga chiqdilar.

Ishtirokchilarning qiziqishlaridan kelib chiqqan holda tikuvchilik yoʻnalishida mohir tikuvchi tadbirkor Tamara Yusupova tomonidan, toʻquvchilik yoʻnalishida Navbahor Qurbanbayeva, zardoʻzlik boʻyicha Xonimjon Ismoilova, milliy oʻyinchoqlarni yasash boʻyicha Oʻringul Xudoyberganova tomonidan 4 ta yoʻnalishda 20-25 nafar yosh qizlar ishtirokida “Kim nimaga qodir?” mavzusida “Mahorat darslari” oʻtkazildi.

Shuningdek 16 yoshdan 30 yoshgacha boʻlgan ijtimoiy faol hamda uyushmagan qizlar ishtirokida deputat va turli sohalarda faoliyat yuritib kelayotgan rahbar ayollar bilan “Men ham yetakchi boʻlaman”  mavzusida uchrashuv boʻlib oʻtdi.

Uchrashuvda Tadbirkorlar va ishbilarmonlar harakati – Oʻzbekiston Liberal demokratik partiyasi tuman kengashi raisi Muqaddas Beknazarova maʼruza qildi. Tadbir ishtirokchilari oʻzlarini qiziqtirgan savollarga javob oldilar.

Tadbirda 7 yoshdan 30 yoshgacha boʻlgan ijtimoiy faol hamda uyushmagan qizlar, deputatlar, fuqarolar yigʻinlari xodimlari hamda xotin-qizlar bilan ishlash va oilalarda maʼnaviy axloqiy qadriyatlarni mustahkamlash boʻyicha mutaxassislardan jami 150 nafarga yaqin ishtirokchilar qatnashdilar.

Bu kabi tadbirlar ayol-qizlarning ijtimoiy faolligini oshirish, ularning bilim va dunyoqarashini kengaytirish, kasb-hunar koʻnikmalarini rivojlantirish, pirovardida esa davlat va jamiyat ishlarida faol qatnashib, oʻzligini namoyon qilishlarida muhim omil boʻlishi shubhasiz.