Bahor ilhomlari

Bolam, bahor sengadir

Bolam, bahor sengadir,

Kuzni menga qoʻyib ber.

Oppoq qorlar sengadir,

Izgʻirinni menga ber.

Onang yashashi uchun,

Dunyoga kelding, bolam.

Yugur-yugur, chopqillab,

Oʻtirmoqni menga ber.

Sen soylarga suv qarat,

Meni kutmoqda adir.

Zavq olib boʻylaringdan,

Sheʼr aytmoq kerak axir.

Shivirlab maysalarga,

Senga sogʻlik tilayman.

Oylar balqqan bagʻringda,

Duogoʻying boʻlay men.

Bolam, bahor sengadir,

Lolazorga doʻst tutin.

Yetib borsin kuzgacha,

Yaproqlari bus-butun.

Xazonlardan qoʻrqmagin,

Xazon sendan hayiqsin.

Qoʻriqlagin kaftingda,

Gul senga olqish aytsin,

Qoʻshiq ayt, togʻlarga chiq.

Ularni quch birma-bir.

Onang yashashi uchun,

Dunyoga kelding axir.

Guloyim Byekjonova.

11-sonli maktab oʻqituvchisi.

Keldi bahor

Ilitib tunu kunlarni,

Shoxlarga ilib gullarni.

Yayratib qalbu dillarni,

Keldi bahor, gulbahor.

Maysalar koʻrsatib quloq,

Sumalakda aytilib tilak.

Orziqib kutgan yurak,

Keldi bahor, gulbahor.

Daraxtlar chiqarib kurtak,

Chumolilar oʻrmalab hurkak.

Momolar aytishib ertak,

Keldi bahor, gulbahor.

Bulutlari yomgʻir keltirib,

Ariqlarni suvga toʻldirib,

Sogʻintirib ancha kuttirib,

Keldi bahor, gulbahor

Bahodir JUMAMURODOV.

"Toshyop”da bahor

Yana keldi oʻlkamga bahor,

"Toshyop” boʻyi gulladi takror.

Bedazorda raqsga tushib,

Yashil gilam toʻshadi bahor.

"Toshyop” toʻlib oqdi, qaranglar,

Qirgʻoqlarin bezadi ranglar.

Navroʻz keldi. Sumalak pishdi,

Har lahzada qoʻshiq jaranglar.

Daraxtlar ham uygʻonib qoldi,

Fermer bobom ishga yoʻl oldi.

Chiviqlardan otlar yasadik,

Otchoparlar boshlanib qoldi.

Bizning "Toshyop” yoʻlini koʻring,

Top-toza uy, hovlini koʻring.

Har bolaga bitta-bittadan,

Koʻchat ekkan bogʻimni koʻring.

Shahzod QOʻShJONOV,

5-sonli maktab oʻquvchisi.

Ustozlarimga

Topolmasman axtarib,

Sizday aziz insonni.

Sizsiz bu dunyo gʻarib,

Zulmat bosar jahonni.

Sinf toʻla bolani,

Bolam, deb ulgʻaytasiz.

Ardoqlab gul-lolani,

Kelajakka eltasiz.

Omon boʻling ustozim,

Siz borsiz yoʻlim yorugʻ.

Ezgulikka parvozim –

Orzu yoʻllarim yorugʻ.

Umarbek Rahimboyev,

69-maktab oʻquvchisi.

Bahor tongi

Koʻrdim ajib bahor faslini,

Koʻrdim rangin gullar aslini.

Lek koʻrmadim bunchalar nafis,

Bahordayin goʻzal faslni.

Koʻrdim, bagʻri qaynoq shunchalar,

Muzlagan yuraklar erib ketgudek.

Ertakka oʻxshaydi nega bunchalar?!

Goʻyo oyga qoʻlim yetgudek,

* * *

Tong otmoqda yana,

Quyosh chiqar sekin tebranib.

Oy yuzini yashirdi ana,

Yulduzlar ham soʻndi miltillab.

Birdan osmon yorishib ketdi,

Quyosh nuri olamni tutdi.

Jarangladi qushlar ovozi,

Bahor sasi bizgacha yetdi.

Maqsuda SAFARBOYeVA,

3-sonli Amudaryo akademik litseyi oʻquvchisi.

Navroʻz madhi

Koʻrsatib ona zaminga chehrasin gulgun bahor,

Sanʼatin etdi namoyon har yonni qilib gulzor.

Sogʻingan har bir kimsaning koʻksiga lola taqib,

Kimgadir qoʻshiq kuylatib, kimga yozdirgay ashʼor.

Bu goʻzal gulshan ichrakim, qolgay loqayd qaysi dil!?

Oʻzlari yaratgan jannat, kim boʻlsa mehnatga yor.

Tumanimiz ahlini noz-neʼmatlari shod etur,

Serhosil tuprogʻimiz, boʻlsa Amu suvi bisyor.

Kirmoqda yangi hayotga moʻl orzu umid-la el,

Chunki Navroʻzimiz koʻklam saodati birla yor.

Bu moʻʼtabar elda doim har kimsa shod yashagay,

Kimki kutsa har bahorni xalqi bilan baxtiyor.

Yaratuvchi ishimizni koʻshsak Vatan mehriga,

Har bahorni kutarmiz shod, farovonlik barqaror.

Ahmad Nafasov.

Bobomdan meros

Bobom oʻtdi rahmatlik,

Onam rosa yigʻladi.

Onamning koʻz yoshlari,

Yurak-bagʻrim tigʻladi.

Onam bitta daftarni,

Oʻqir edi har kuni.

Yigʻlab-yigʻlab yozardi,

Onajonim koʻnglini.

Bobom sheʼrlar yozarkan

Va buni sir tutarkan.

Ichidagi borini.

Oq qogʻozga toʻkarkan.

Bobom sheʼrin oʻqidim,

Yoshlarga toʻldi koʻzim.

Sheʼr yozishga ixlos,

Menga bobomdan meros.

Umida Erdosheva,

22-sonli maktabning 6-sinf oʻquvchisi.

Sheʼr aro qoʻydim qadam

Zulfiya sheʼriyati,

Goʻzal maʼnaviyati.

Fikrimni tortdi mening,

Havasim ortdi mening,

Ulgʻayib bir qiz boʻlay,

Qoshlari qunduz boʻlay.

Orzulari elga manzur,

Soʻzi dur yulduz boʻlay.

Qalbda havas uygʻotgan,

Sheʼrga ixlos uygʻotgan.

Onajonim shoiram,

Sheʼr aro qoʻydim qadam!

Surayyo RAJABOVA,

44-sonli maktab oʻquvchisi.