MAHALLALARDA IJTIMOIY-MAʼNAVIY MUHITNI SOGʻLOMLAShTIRIShGA DOIR YIGʻILIShLAR BOʻLIB OʻTDI

Shu yilning 12-fevralida tumanimizning Amir Temur nomli va Doʻrman ovullarida mahallalarda ijtimoiy-maʼnaviy muhitni sogʻlomlashtirish hamda chegara oldi hududida yashash tartib-qoidalarini aholiga yetkazishga bagʻishlangan yigʻilishlar boʻlib oʻtdi.

Yigʻilishlarda Qoraqalpogʻiston Respublikasi Davlat xavfsizlik xizmati Amudaryo tuman boʻlinmasi xodimlari S.Savetov, S.Beshimov, tuman hokimining chegara masalalari boʻyicha yordamchisi O.Shomurodov, tuman hokimligi jamoat va diniy tashkilotlar bilan aloqalar boʻyicha bosh mutaxassisi J.Yoʻldoshev, tuman Ichki ishlar boʻlimining terrorizm va ekstremizmga qarshi kurashish guruhi katta tezkor vakili O.Bekjanov, 9202-“D” harbiy qism komandiri E.Joʻraboyev, tuman bosh imom xatibi A.Matsafoyevlar, shuningdek, ovul fuqarolar yigʻinlari maʼsul xodimlari, profilaktika inspektori, mahalla faollari, koʻcha boshchilari ishtirok etdilar.

Amir Temur nomli ovulda boʻlib oʻtgan yigʻilishni    yigʻin raisi O.Yusupov ochdi va olib bordi. U oʻz soʻzida soʻnggi yillarda Muhtaram Prezidentimiz tomonidan aholi farovonligini oshirish boʻyicha bir qancha qaror va farmonlar qabul qilinganligini aytib, yoshlar taʼlim-tarbiyasiga jiddiy eʼtibor qaratish bugungi kundagi dolzarb masalalardan biriga aylanganini aytib, yoshlar qalbida vatanparvarlik tuygʻularini, milliy, maʼnaviy-madaniy qadriyatlarni mustahkamlash, “Jaholatga qarshi – maʼrifat” gʻoyasi asosida jamiyatda ijtimoiy-maʼnaviy muhit barqarorligini taʼminlash, insonparvarlik, ezgulik va tinchlikni qadrlash, diniy bagʻrikenglik va millatlararo totuvlikni yanada mustahkamlash ham asosiy vazifalardan biri ekanligini aytib oʻtdi.

Shundan soʻng, soʻzga 9202-“D” harbiy qism komandiri E.Joʻraboyev chiqib, shaxslarning chegara oldi zonasiga kirishi, undan chiqishi, oʻtishi, u yerda boʻlishi, yashashi, agar qonun hujjatlarida boshqacha tartib belgilangan boʻlmasa, ichki ishlar organlarining ruxsatnomasi asosida amalga oshirilishi, chegara oldi mintaqasiga kirish va undan chiqish, oʻtish, u yerda vaqtincha boʻlish, yashash, harakatlanish chegara qoʻshinlarining ruxsatnomasi asosida amalga oshirilishi toʻgʻrisida tushuntirib oʻtdi.

Doʻrman ovulida ham xuddi shu masala yuzasidan yigʻilish oʻtkazildi. Yigʻilishni ovul fuqarolar yigʻini raisi A.Yusupov ochdi va olib bordi. U keyingi yillarda ovulda aholi yashash sharoitini yaxshilash, yoshlarning bandligini taʼminlash orqali ularni yot gʻoyalardan asrash, boʻsh vaqtlarini mazmunli oʻtkazish va jinoyatchilik, huquqbuzarliklar sodir etilishining oldini olish borasida olib borilayotgan ishlar haqida gapirdi. Shuningdek, mahallada ijtimoiy-maʼnaviy muhitni sogʻlomlashtirish hamda chegara oldi hududida yashash tartib-qoidalarini aholiga yetkazish toʻgʻrisida 9202-“K” harbiy qism komandiri A.Ravshanov gapirdi.

Soʻngra, soʻzga tuman hokimining chegara masalalari boʻyicha yordamchisi O.Shomurodov chiqib, chegara oldi mintaqasi yaqinidagi yerlarda qishloq xoʻjaligi ekinlarini yetishtirishda u yerda boʻlish chegara qoʻshinlarining ruxsatnomasi asosida amalga oshirilishini tushuntirib, aholini “Oʻzbekiston Respublikasining Davlat chegarasi toʻgʻrisida” Qonuni tartib-qoidalariga rioya etishga chaqirdi.

Shuningdek, soʻzga tuman bosh imom-xatibi A.Matsafoyev chiqib, mutaassiblik, ekstremizm va terrorizmga qarshi maʼnaviy-targʻibot faoliyatini yanada kuchaytirish, maʼnaviy-maʼrifiy tadbirlarda ijtimoiy-iqtisodiy hamda din sohasidagi olib borilayotgan islohotlar mazmun-mohiyatini aholiga yetkazish kerakligini aytib,soʻnggi yillarda yurtimizda diniy soha faoliyatini takomillashtirish boʻyicha amalga oshirilayotgan ishlar toʻgʻrisida toʻxtalib oʻtdi.

Yigʻilish soʻnggida soʻzga “Doʻrman” ovul fuqarolar yigʻini profilaktika inspektori J.Saparboyev chiqib, hududda jinoyatchilik va huquqbuzarliklarning oldini olish borasidagi ishlarni yanada jadallashtirish, yoshlarning tungi paytlarda ota-onasi yoki ularning oʻrnini bosuvchi shaxslarsiz yurishlarining oldini olish hamda chet davlatlarga ishlash uchun chiqib ketayotgan fuqarolarning turli yot gʻoyalar taʼsiriga tushib qolishlarining oldini olish kerakligini taʼkidlab oʻtdi.
 Yigʻilishda muhokama etilgan masalalar yuzasidan qarorlar qabul qilindi.

O. Rajabova.