Xoʻjayli tumanidagi 10-sonli maktabda “Assalom, matematika!” tadbiri oʻtkazildi

Mamlakatimizdagi umumiy oʻrta taʼlim maktablarida  oʻqituvchilarning yangi pedagogik texnologiyalarni dars jarayoniga tatbiq eta olish koʻnikmasini oshirish, darslarda interfaol, noanʼanaviy uslublarni qoʻllash orqali oʻquvchilarning  mashgʻulotlarga qiziqishlarini oshirishiga erishish maqsadida  oʻquv yilining har bir oyi maʼlum fan oyliklari sifatida belgilangan.

Fevral – matematika va informatika fanlari oyligi boʻlganligi munosabati bilan barcha maktablarda mazkur fanlarni  chuqur oʻrgatishga, oʻquvchilarning olgan bilimlarini mustahkamlashga oid  koʻpgina tadbirlar boʻlib oʻtmoqda.  Oylik doirasida   Xoʻjayli tumanidagi Jangaboy Jiyanboyev rahbarlik qilayotgan 10-sonli maktabda ham mazkur fanlar yuzasidan ochiq darslar, maʼnaviy-maʼrifiy tadbirlar oʻtkazildi. Avvalo oylikni oʻtkazish yuzasidan maktab direktorining oʻquv ishlari boʻyicha oʻrinbosari Abubakir Abdisalomov, maʼnaviy-maʼrifiy ishlar boʻyicha oʻrinbosari Oʻmirboy  Bavatdinov, metod birlashma raisi Muyassar Saparova va fan oʻqituvchilari ishtirokida oylik doirasida qilinishi lozim  boʻlgan  ishlar belgilanib, vazifalar oʻzaro taqsimlandi. Shunga muvofiq matematika fani oʻqituvchisi Muyassar Saparova 8-sinfda “Viyet teoremasi” , Sarvinoz Xoʻjaberganova 6-sinfda “Sonlarni ayirish”, Tilovbergan Jumamurodov  10-sinfda “Eng oddiy trigonometrik tenglamalar” mavzularida, informatika fanidan Elmurod Tajimurodov 10-sinfda , Quvondiq Tleubergenov 9-sinfda ochiq darslarni interfaol usullardan foydalangan holda qiziqarli qilib oʻtdilar.

Oylik doirasidagi amalga oshirilgan ishlarning yakuniy hisoboti tariqasida  22-fevral kuni oʻtkazilgan “Assalom matematika” deb nomlangan  kechaga  maktab oʻqituvchilari, oʻquvchilaridan tashqari, ularning ota-onalari ham tashrif buyurdilar.  Kechani maktab direktori Jangaboy Jiyanboyev ochib,  matematika fanini  oʻrganishning ahamiyati haqida maʼruza qildi va bu borada maktabda amalga oshirilayotgan ishlarga alohida toʻxtaldi.

Kechani olib borgan boshlovchi qizlar matematika faniga oid  sheʼrlar, ulugʻ allomalarning purmaʼno soʻzlaridan iqtiboslar keltirib, ana shunday  ahamiyatli fanlarni oʻquvchilarga hormay-tolmay oʻrgatib kelayotgan, oʻquvchilarning fan asoslarini puxta egallashlarida  fidoyilik qilayotgan fan oʻqituvchilariga  soʻz berdilar. Maʼruzalardan soʻng,  raqamlar haqida 5-sinf oʻquvchilari ishtirokida  sheʼrlar ijro qilindi.  6-sinf oʻquvchilarining raqslari barchaga birday zavq bagʻishladi.

       Qunt bilan oʻrganing , bu buyuk fanni
       Shon-shuhratga oʻrang, ona Vatanni.
       Donolar donosi boʻlsa, gar kim –
       Fanga bagʻishlasin, jon birla tanni.

Ushbu chorlovdan soʻng,  mazkur fan ahamiyati aks ettirilgan sahna koʻrinishi namoyish etildi. 2-sinf oʻquvchilari ijrosidagi raqs barchaga ulkan taassurotlar baxsh etdi.  8-sinf oʻquvchisi Sarvinoz Shariboyeva ijro etgan  raqs  ham juda jozibali chiqdi.

Tadbir maktab oʻquvchilarining nafaqat fan asoslarini puxta oʻzlashtirayotganini, balki, ularning iqtidorlarini rivojlantirishga ham alohida eʼtibor qaratilayotganini yaqqol koʻrsatdi.

Matematika barcha fanlar kaliti ekanligi barchaga birday ayon. Hayotimizning biron sohasini hisob-kitobsiz  rivojlantirishni tasavvur eta olmaymiz. Bugungi tezkor va axborot kommunikatsiya texnologiyalari  davrida mazkur fan ahamiyati yana ham yuqori bosqichga koʻtarilmoqda. Hayotimizdagi oʻzgarishlar  hammamizdan har bir ishimizning  hisob-kitobini yurita olish imkoniyatiga ega boʻlishni taqozo etmoqda.  Shu maʼnoda olib qaraydigan boʻlsak, Xoʻjayli tumanidagi 10-sonli maktabda bu borada olib borilayotgan saʼy-harakatlar eʼtiborga loyiqdir. Ularning kelgusi faoliyatlariga ham muvaffaqiyatlar yor boʻlishini tilab qolamiz.

Oygul PAJABOVA.