XOLIMBEG OVULI FAOLLARI NURONIYLAR BILAN UChRAShDILAR

Bugungi kunda 80 yoshdan oshgan, 100 yoshga qadam qoʻygan insonlar biz bilamizki, umri davomida eng ogʻir, mashaqqatli hayot yoʻllarini bosib oʻtishgan. Ularning aksariyati Ikkinchi jahon urushi yillarida front ortida, mehnat frontida zahmat chekib, hayotning bemavrid azob-uqubatlarini boshidan kechirishgan.

Bu insonlar 1930-yillardagi qatagʻonlar, urush davrining biri-biridan dahshatli voqealari, urushdan keyingi ocharchilik va tiklanish yillarining qiyinchiliklarini oʻz matonatlari, sabr-bardoshlari bilan yengib oʻtib, bugungi dorilomon kunlarga yetishgan fidoyilar sifatida el-yurt ardogʻida. Ularga hurmat-ehtirom koʻrsatish, yaxshi yashash va dam olish sharoitlarini yaratish biz – bugungi avlod vakillarining zimmamizdagi insoniylik burchimizdir.

Xolimbeg ovulida oʻz umrini el-yurt farovonligiga bagʻishlab oʻtgan keksa avlod vakillarining holidan xabar olish, ularning koʻnglini koʻtarish, hayit va bayramlarda, ularning yaxshi-yomon kunlarida keksalarni yoʻqlab turish yaxshi anʼanaga aylangan. Ovul hududida umrguzaronlik qilayotgan nuroniy otaxonlar ishtirokida “Uch avlod uchrashuvi”, “Keksalar oʻgiti – hayot kaliti”, “Keksalar – xonadonlarimiz farishtalari” mavzularida yoshlar bilan uchrashuvlar, davra  suhbatlari oʻtkazilib turilishi oʻsib kelayotgan yosh avlod maʼnaviyatini yuksaltirishda katta ahamiyat kasb etmoqda.

Yaqinda tuman hokimligi masʼullari, “Nuroniy” jamgʻarmasi tuman boʻlimi raisi Bekman Allaberganov, ichki ishlar tizimida uzoq yillar mehnat qilgan faxriy Karomaddin Ibodullayev, hudud profilaktika inspektori Ziyodulla Kenjayev hamda Xolimbeg ovul fuqarolar yigʻini raisi Zarifboy Allamov rahbarligidagi ovul faollari xolimbeglik nuroniy otaxon va onaxonlar xonadonlarida boʻlib, ularning holidan xabar olishdi. Umrining 70-yilini ovulda qishloq xoʻjaligi sohasini rivojlantirishga bagʻishlagan 87 yoshli Yangiljon momo Ollamova, 81 yoshli Tozagul momo Sobirova, 80 yoshdan hatlagan Sherimmat ota Ollamov hamda Bobojon ota Oʻrozmetovlarning turmush tarzlari va oilalariga taalluqli muammolarini oʻrgandilar. Nuroniylar bilan suhbat qurib, ularning oʻtmishdagi suronli yillarda kechgan mashaqqatli hayoti haqidagi hikoyalarini tingladilar.

Ovul hududida yashovchi Tozaboy bobo Jumanov yaqinda 92 yoshga qadam qoʻydilar, Mavlon bobo Jumaniyozov esa umrining  93-bahorini qarshi olmoqda. Ikkala otaxon ham oʻz hayotining eng navqiron yillarini Ikkinchi jahon urushi oqibatlarini bartaraf etish, ovul iqtisodini yuksaltirish, oʻsib kelayotgan yosh avlod uchun munosib turmush sharoitlarini yaratishdek xayrli, ayni damda mashaqqatli mehnat damlariga bagʻishlagan, pirovardida el-yurtda obroʻ-eʼtibor topgan insonlardir.

Yoqut momo Ahmedova esa ovulning eng keksa onaxoni hisoblanadi. Momo oʻz umrining  100-bahori bilan yuzma-yuz turibdilar. Hayot mashaqqatlarini mardona yengib oʻtgan, turmush qiyinchiliklariga egilmay, oʻgʻil-qizlarini el-yurtga munosib farzandlar qilib tarbiyalagan Yoqut momoning umr yoʻli ovul yoshlari uchun nafaqat ibrat, balki jasorat va matonat maktabi hamdir.

Ovul faollari Yoqut momoni tez-tez yoʻqlab, uning suhbatida boʻlishni, momoning xotiralarini tinglab, hayotiy saboqlar olishni oʻz burchlari deb bilishadi. “Keksalar – xonadonlarimiz farishtalari” shiorini kundalik ish faoliyatining bir qismi deb bilgan ovul faollari nuroniy otaxon va onaxonlar huzurida tez-tez boʻlishib, ularning maslahat va oʻgitlaridan bahra oladilar.

Bu galgi uyma-uy yurib oʻtkazilgan uchrashuvlarda ham ovul faollari keksalar duosini olib, ularga oʻz sovgʻalarini hadya etdilar.

Robiya YOʻLDOShEVA.