«JANNAT – ONALAR OYoGʻI OSTIDADIR» DEB NOMLANGAN TADBIR BOʻLIB OʻTDI

Xalqimizda gul oʻssa yerning koʻrki, qiz oʻssa elning koʻrki, degan maqol bor. Ha, chindan-da maʼnaviyatli, maʼrifatli, odobli va hayoli-iboli qizlar ota-onasiga  ham, ustozlariga ham sharaf keltiradi. Shu boisdan ham ularning munosib boʻlib voyaga yetishiga   erishish uchun harakat  juda kichkinaligidan boshlanadi.

Mamlakatimizda barcha umumiy oʻrta taʼlim maktablarida boʻlgani kabi tumanimiz  taʼlim muassasalarida ham qizlarimizning taʼlim-tarbiyasiga  alohida  eʼtibor beriladi, kasb-hunarga ilk koʻnikmalarini shakllantirish maqsadida  toʻgaraklarga jalb etiladi. Boisi qizlar boʻlgʻusi oila bekalari, jamiyatimizning kichik boʻlagi  boʻlmish ushbu muqaddas makonning tinch-osoyishtaligini taʼminlashga munosib hissa qoʻshuvchi,  uni oʻzining mehri ardogʻida asrab-avaylaguvchi zotdir.

Bu borada olib borilayotgan  ishlar samarasini aniqlash maqsadida 65-sonli maktabda «Jannat – onalar oyogʻi ostidadir» deb nomlangan tadbir oʻtkazildi. Tadbirda maktab oʻqituvchilari, oʻquvchilari va ularning ota-onalari ishtirok etdilar.
Tadbirda avvalo ayollarning, onalarning farzand tarbiyasi va jamiyat taraqqiyotidagi oʻrni haqida maʼruza qilindi, mamlakatimizda xotin-qizlarga  qaratilayotgan  eʼtibor haqida batafsil maʼlumotlar berildi. Bayramga bagʻishlangan tadbirda 4-sinf oʻquvchilaridan eng bilimdon va zukko 6 nafar  qizlar «Balli qizlar» tanlovida  qatnashib, oʻzlarining salohiyatini namoyish qilishdi.

Tanlovda ular zamonaviy axborot-kommunikatsiya texnologiyalarini  qay darajada egallaganliklarini, epchilliklarini va mamlakatimizda  yoshlarga oid  amalga oshirilayotgan oʻzgarishlar borasidagi bilimlarini sinovdan oʻtkazdilar. Ayniqsa, «Arzanda boʻlma – nazarda boʻl» deb nomlangan bahoriy salat  tayyorlash sharti juda qiziqarli boʻldi. Ushbu shartda hakamlar hayʼati aʼzolari qizlarning zaminimizda yetishtiriladigan  sabzavotlardan, darmonbaxsh koʻkatlardan va boshqa qishloq xoʻjaligi mahsulotlaridan toʻyimli va salomatlik uchun foydali salatlar tayyorlashiga,  mahsulotlarni isrof qilmay toʻgʻri artib tozalashiga, dasturxonga ishtahani ochadigan, koʻrkam qilib tortishiga alohida eʼtibor qaratdilar.

Tarbiya bolalikdan boshlanadi, degan donolarimizning naqli ushbu tadbirda ham oʻz ifodasini topganday boʻldi. Boisi hali endigina oʻn yoshdan oʻtgan qizaloqlarning etagiga fartuk taqib, chiroyli kiyinib, oʻzlarini oshxona bekasiday tutib, masalliqlardan  mazali  salat tayyorlashidan, har bir mahsulotni oʻziga xos mahorat bilan idishlarga joylashidan  ularning onalariga jajji yordamchi boʻlib qolganlarini   anglash qiyin emas.

 Tanlov shartlari orasida maktab badiiy havaskorlari ijrosida namoyish etilgan  bayramga bagʻishlangan  musiqiy dastur tadbir shukuhini yana ham oshirdi. Oʻquvchilar tomonidan ijro etilgan shoʻx qoʻshiqlar, bahor va ayolni madh etuvchi sheʼrlar, dilrabo raqslar hammaga nihoyatda manzur boʻldi va koʻtarinki kayfiyat baxsh etdi.

  Yurtimizda bayramlar, qutlugʻ kunlar koʻp. Har birining oʻz mazmun-mohiyati bor. Har yili  mamlakatimiz boʻylab, koʻklam kirib kelishi bilan turli bayramlar munosabati boshlab yuboriladigan tadbirlar ham elimizga koʻtarinki ruh va ilhom baxsh etib, yaratuvchanliklarga, bunyodkorliklarga boshlaydi.

 Maktabning 4-sinf oʻquvchi-qizlari ishtirokida oʻtkazilgan mazkur tadbir  ham barcha  tomoshabinlarda ulkan taassurotlar qoldirdi.

OYGUL RAJABOVA.