BLOKPOSTLARDA KARANTIN QOIDALARIGA AMAL QILINIShI NAZORAT QILINMOQDA

Maʼlumki keyingi kunlarda koronavirus kasalligining keng tarqalib ketishining oldini olish va bartaraf etish borasida koʻpgina chora-tadbirlar koʻrilayotganiga qaramay, yurtimizda kasallanish holatlari kamaymayapti, kasallikning yangi-yangi oʻchoqlari paydo boʻlayapti. Shularni inobatga olgan holda 10-iyuldan mamlakatimizda qatʼiy karantin cheklovlari oʻrnatildi. 8-iyuldan ushbu kasallik tumanimizda ham qayd etilishi munosabati bilan Amudaryo tumani “qizil” hudud toifasiga oʻtkazilgan edi.

Koʻpchilik hollarda kasallik simptomlarsiz, tashqi belgilarsiz namoyon boʻlmoqda. Natijada kasallikka chalingan shaxslar bozor va koʻchalarda, jamoat joylarida yurib, oʻzlari bilmagan holda uni koʻpchilikka yuqtirmoqda. Statistikaga koʻra, koronavirus infektsiyasini yuqtirib olgan bir bemor 5 kecha-kunduzda oʻrtacha 2-3 kishiga virus yuqtiradi. Shularni inobatga olgan holda koronavirus infektsiyasiga qarshi kurashish chora-tadbirlarini muvofiqlashtirish boʻyicha Amudaryo tuman shtabi bir qator cheklov choralarini kiritishga qaror qildi.

Jumladan, joriy yil 18-19-iyul hamda 25-26-iyul shanba va yakshanba kunlari respublika miqyosida amal qiladigan qatʼiy karantin choralari Amudaryo tumanida 20-24-iyul kunlari ham toʻliq amalda boʻladi.

Yaʼni, 20-iyuldan boshlab 26-iyulgacha hafta davomida Amudaryo tumani hududida aholining va avtotransport vositalarining harakati toʻliq toʻxtatildi. Bu vaqt mobaynida aholiga “oʻzini oʻzi yakkalash” hayot tarziga qatʼiy rioya etgan holda oʻz uylarida qolish tavsiya qilindi. Tashkilotlarga esa xodimlarni imkoni boricha ishga jalb etmaslik, yoki masofadan ishlashi uchun sharoit yaratish topshirildi. Tumanimizning ichki yoʻllarida va tumanimizga kirib kelinadigan yoʻllarda 4 ta blokpostlar tashkil etilib, ushbu obʼektlarda Ichki ishlar, Milliy gvardiya va tuman Sanitariya-epidemiologik osoyishtalik markazi xodimlarining tun-u kun navbatchiligi yoʻlga qoʻyildi.

Blok postlarda xushyor xodimlar karantin cheklovlariga qaramay, oʻz shaxsiy avtotransportlarida yoʻlga chiqqan haydovchilar, shuningdek, piyoda, velosipedda ketayotgan shaxslarning maqsadlarini surishtirib, ularni uyda qolishga va natijada kasallik zanjirining uzilishiga hissa qoʻshishga chaqirmoqda.

Tumanimiz hududlaridagi yoʻllarda kuchaytirilgan karatin choralari joriy etilganiga qaramasdan, turli maqsadlar bilan yoʻlga chiqqan yurtdoshlarimizni uchratishimiz mumkin. Yoz jaziramasida, oftob tigʻida ham zimmasidagi sharafli burchiga sodiq Ichki ishlar, Milliy gvardiya, tuman Sanitariya epidemiologiya osoyishtalik markazi xodimlari sergaklik bilan vazifalarini ado etayaptilar, postlarda fuqarolarni toʻxtatib, profilaktik tushuntirish ishlarini olib borayaptilar. Bundan koʻzlangan maqsad – tumanimizda sanitariya-epidemiologik osoyishtalik oʻrnatilishiga, koronavirus infektsiyasining jilovlanishiga va natijada xalqimizning tinch-osoyishta hayotga qaytishiga erishishdir.

Oygul RAJABOVA.