QOʻLI YeNGIL YoSh ShIFOKOR

Dunyoda shunday insonlar boʻladiki, ular oʻzlarining qilgan barcha ezgu ishlari bilan kishilar kalbida bir umrga muxrlanib koladilar. Agar uning faoliyati inson salomatligi bilan bogʻlik boʻlsa, bunday shaxs odamlar yuragidan munosib joy oladi.

Oʻz bilim va kuchini tumanimiz aholisining dardiga darmon boʻlishdek xayrli ishga bagʻishlashga ahd qilgan yosh shifokor Gʻulomjon Mavlonov fidoyiligi, xushmuomalaligi bilan el aro eʼtibor topayotganlardan.

Oʻzi yosh boʻlishiga qaramasdan qanchadan-qancha bemorlarning dardiga darmon boʻlib, ularning duosini olib, beminnat xizmat qilib kelayotgan Gʻulomjon Mavlonov 1987-yilning 2-mayida Xorazm viloyati, Gurlan tumanida tugʻilgan. U oilada 3 oʻgʻil va 2 qiz farzandning toʻrtinchisi edi. Otasi farzandlari tarbiyasiga juda eʼtiborli boʻlib, ularning ilm olishi, hunar oʻrganishlari uchun sharoitlar yaratib berdi. Bolalariga boʻsh vaqtlarini mazmunli tashkil etishni va foydali mehnat bilan shugʻullanishni oʻrgatdi. Ana shunday tarbiyaviy muhitda ulgaygan farzandlarning barchasi oliy maʼlumotli insonlar boʻlib, bugungi kunda xalqqa xizmat qilishmoqda. Gʻulomjon akaning akasi Muzaffar Mavlonov ham Amudaryo tuman Tibbiyot birlashmasi shoshilinch tez tibbiy yordam boʻlimida shifokor boʻlib ishlaydi.

Gʻulomjon Mavlonov maktabni aʼlo baholar bilan tugatib, umumiy oʻrta taʼlim olgach, 2005-yilda Toshkent Tibbiyot Akademiyasiga davlat granti asosida oʻqishga qabul qilindi va 2012-yilda mazkur oliygohning Tibbiy pedagogika fakultetini muvaffaqiyatli tamomladi. Shu yilning sentyabr oyidan Respublika shoshilinch tez tibbiy yordam ilmiy markazida anesteziologiya va reanimatologiya yoʻnalishi mutaxassisligi buyicha ikki yillik klinik ordinaturaga qabul qilindi va 2014-yilda klinik ordinaturani tamomlab, shu yilning oktyabr oyidan Amudaryo tuman Tibbiyot birlashmasining jonlantirish boʻlimida oʻz ish faoliyatini boshladi. 2014-yildan hozirgi kunga qadar u mazkur boʻlimda anestezist-reanimatolog shifokor lavozimida ishlab kelmoqda. Ish boshlaganiga hali koʻp boʻlmasa-da, oʻtgan vaqt ichida Gʻ.Mavlonov koʻplab insonlarning dardiga darmon boʻlib, xalq duosini olishga erishdi.

Ustozlari Barno Soatova va Shuhrat Chorshamovlardan olgan tajribalari hamda oʻzining bilimi natijasida uning muolajasi tufayli sogʻaygan bemorlar va ularning yaqinlari Gʻulomjon akaga rahmatlar aytishib, duolar qilishadi. Ayrim shoirtabiat bemorlari Gʻulomjon akani oq koʻngil va qoʻli yengil shifokor, deb minnatdorchilik sheʼrlari ham yozishgan.

Gʻulomjon akaning bemorlari uning navbatchilik kuni kelishini intiqlik bilan kutishadi. Chunki Gʻulomjon aka har bir bemorining muolajasiga oʻta masʼuliyat bilan qaraydi. Ular bilan shunchaki bemor emas, oʻz yaqinidek muomalada boʻladi.

Hayot shirin, dunyoning noz-nematlarini, huzur-halovatini tatib yashash odamzod uchun bundan-da shirin. Baxt-u saodatli boʻlib kun kechirishimiz uchun bizga birinchi navbatda salomatlik kerak. Boshqa insonlarga salomatlik baxsh etishdek xayrli ishga qoʻl urgan yosh shifokorga:

– Xalqimiz xizmatida boʻlishdan aslo charchamang va kelgusida kasbingizdan kamol topib, el-yurt duosiga sazovor boʻling, – deya tilak bildiramiz.

Iroda Yerdosheva.