TUMANDAGI FUQAROLIGI BOʻLMAGAN ShAXSLAR OʻZBEKISTON FUQAROSI BOʻLDI

Mamlakatimizda 2020-yil 13-martda qabul qilingan yangi tahrirdagi “Oʻzbekiston Respublikasining fuqaroligi toʻgʻrisida”gi Qonuni bilan fuqaroligi boʻlmagan shaxslarga Oʻzbekiston fuqaroligi berilishi boʻyicha yangi tamoyillar belgilandi. Qonunga binoan 1995-yilning 1-yanvariga qadar Oʻzbekiston Respublikasi hududida doimiy roʻyxatdan oʻtib, fuqaroligi boʻlmagan shaxs uchun yashash guvohnomasi bilan yashab kelayotgan shaxslarga nisbatan Oʻzbekiston Respublikasining fuqaroligini tan olish tartibi kiritildi.
Ushbu qonun hujjati ijrosini taʼminlash borasida tumanimizda ham samarali ishlar qilinmoqda. Joriy yilning 28-sentyabr kuni tuman Ichki ishlar boʻlimida  hududdagi 29 nafar fuqaroligi boʻlmagan shaxslarga Oʻzbekiston fuqaroligi pasporti topshirildi. Ushbu marosimda tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshev, Oʻzbekiston Respublikasi Prezidentining Amudaryo tumanidagi Xalq qabulxonasi boshligʻi Erkin Rajabov, tuman Ichki ishlar boʻlimi boshligʻi Ulugʻbek Xudoyberganov, tuman prokurori yordamchisi Sulton Yormuhammedovlar ishtirok etdilar.
Maʼlumot oʻrnida aytish joizki, joriy yilning shu davriga qadar tumanda jami 85 nafar shaxslarning Oʻzbekiston fuqaroligini olish toʻgʻrisidagi arizalari qabul qilingan boʻlib, arizalar tuman Ichki ishlar boʻlimining Xorijga chiqish-kelish va fuqarolik boʻlimi tomonidan oʻrganilmoqda. Shu kunga qadar ulardan 49 nafariga Oʻzbekiston fuqaroligi pasporti berilgan boʻlib, qolgan 36 nafar fuqaroligi boʻlmagan shaxslarning arizalari oʻrganilib, Oʻzbekiston fuqaroligi berish choralari koʻrilmoqda.  
Taʼkidlash kerakki, yangi tahrirdagi “Oʻzbekiston Respublikasining fuqaroligi toʻgʻrisida”gi Qonunining qabul qilinishi bilan Oʻzbekiston Respublikasi fuqaroligiga qabul qilish tartib-taomillari liberallashtirildi. Bolaning fuqarolik sohasidagi huquqlari mustahkamlanib, Oʻzbekiston Respublikasining fuqaroligi masalalari boʻyicha shikoyat qiluvchi shaxslarning eʼtirozlari kamaymoqda. Shuningdek, mamlakat hududida doimiy istiqomat qiladigan fuqaroligi boʻlmagan shaxslar soni keskin qisqarib, yurtdoshlarimiz Oʻzbekiston Respublikasi fuqaroligiga soddalashtirilgan tartibda qabul qilinmoqda.
Tadbirda ishtirok etgan masʼullar ushbu qonun hujjati talablariga muvofiq, chet davlat fuqaroligini qabul qilmagan, 2020-yil 1-aprel kuniga qadar fuqaroligi boʻlmagan shaxs uchun Oʻzbekiston Respublikasida yashash guvohnomasi asosida yashab turgan
va Oʻzbekiston Respublikasi fuqarosi boʻlish istagini bildirgan fuqaroligi boʻlmagan shaxs Qonunda koʻrsatilgan tartibda Oʻzbekiston Respublikasining fuqarosi deb tan olinishini aytib oʻtdi. Ushbu keltirilgan shartlardan loaqal birining mavjud emasligi, Oʻzbekiston Respublikasi fuqarosi deb tan olishni rad etishga asos hisoblanishini taʼkidlashdi.
Oʻzbekiston Respublikasi fuqaroligiga qabul qilinib, shaxsini tasdiqlovchi yangi hujjatga ega boʻlgan yurtdoshlarimiz koʻp yillik orzulari ushalganidan nihoyatda xursand boʻldilar. Har biri shu aziz Vatan, jamiyat taraqqiyotiga munosib hissa qoʻshishga imkon boricha harakat qilishlarini aytib, yaqindan yordam bergan masʼullarga oʻz minnatdorchiliklarini bildirdilar.

Charos Arslonova, tuman hokimligining Axborot xizmati rahbari.