“VATANIM – MENING FAXRIM” ShIORI OSTIDA KONTsERT DASTURI NAMOYISh ETILDI

2021-yil 4-yanvar kuni 9-sonli Bolalar musiqa va sanʼat maktabida yoshlarni harbiy  vatanparvarlik ruhida tarbiyalashga hissa qoʻshish va mamlakatimizda jamoat tartibi va xavfsizlikning saqlanishida, terrorizm va ekstremizm harakatlarining  oldini olishda, mamlakatning  hududiy yaxlitligini va mudofaasini taʼminlashda ulkan mavqe va nufuzga ega Oʻzbekiston Respublikasi Milliy gvardiyasiga hurmat-ehtirom tuygʻusini shakllantirishga xizmat qiluvchi «Vatanim – mening faxrim» shiori ostida kontsert dasturi namoyish etildi.

Kontsert dasturida Oʻzbekiston Respublikasi Milliy gvardiyasining Qoraqalpogʻiston Respublikasi Qoʻriqlash boshqarmasining 1-alohida otryadi xizmatchilari ishtirok etdilar.

Tadbirni 9-sonli Bolalar musiqa va sanʼat maktabi direktori Yoʻldoshboy Abdalov ochdi va barchani yangi yil bilan qizgʻin qutlab, sovgʻa sifatida oʻquvchilar ishtirokida tayyorlangan kontsert dasturini tomosha qilishga taklif etdi.

Maktab direktori Yoʻldoshboy Abdalov davlatimiz tomonidan yosh avlodning komil insonlar boʻlib voyaga yetishlari uchun yaratilayotgan imkoniyatlar toʻgʻrisida soʻz yuritdi va ushbu tadbir Oʻzbekiston Respublikasi Milliy gvardiyasining Qoraqalpogʻiston Respublikasi Qoʻriqlash boshqarmasining 1-alohida otryadi bilan hamkorlikda oʻtkazilayotganini aytib, buning uchun otryad komandiri Baxtiyor Otajonovga minnatdorchilik bildirdi.

Kontsert dasturida musiqa va sanʼat maktabining xalq cholgʻu, tasviriy sanʼat, teatr boʻlimlari oʻquvchilari ishtirok etdilar. Dastlab ular ijrosida xalqimizning yillar osha eʼzozlanib kelayotgan milliy mumtoz musiqalari yangradi, zamonaviy anʼanaviy musiqalar, teatrlashtirilgan yangi yil tomoshalari ijro etildi.

Shundan soʻng, 9-sonli Bolalar va musiqa va sanʼat maktabining tasviriy sanʼat sinfi oʻquvchilari ijodiga mansub tasviriy sanʼat namunalari koʻrgazmasi boʻlib oʻtdi. Tadbir mehmonlari avvalo ushbu sinf oʻquvchilari mashgʻulot oʻtadigan sinfxonalar, ularda bolalarning ijod qilishi uchun yaratilgan sharoitlar bilan tanishdilar va ularning yurt manzaralari, adabiyot va sanʼat arboblari qiyofasi, Vatanga cheksiz muhabbat va sadoqat gʻoyalari aks ettirilgan asarlarini qiziqib tomosha qildilar, oʻquvchilar bilan samimiy suhbatlashdilar. Tadbir soʻngida Oʻzbekiston Respublikasi Milliy Gvardiyasining Qoraqalpogʻiston Respublikasi Qoʻriqlash boshqarmasi 1-alohida otryadi komandiri Baxtiyor Otajonov tadbirda faol qatnashgan, oʻz iqtidorini namoyon etgan oʻquvchilarga tashakkurnoma va esdalik sovgʻalarini topshirdi. Ushbu tadbir qatnashgan barcha otryad aʼzolarida ulkan taassurotlar qoldirganini taʼkidlab, musiqa va sanʼatga oshufta yoshlarga sidqidildan saboq berayotgan maktab pedagogika jamoasiga minnatdorchilik bildirdi.

Oygul RAJABOVA.