“ASKAR ONALARINI ShARAFLAYMIZ!” NOMLI TADBIR OʻTKAZILDI

Dilbandi qalbiga Vatanni asrashdek muqaddas burch tuygʻusini joylagan, uning sogʻlom, barkamol voyaga yetishi uchun butun borligʻini baxshida etgan ayol aziz va moʻʼtabardir. Ana shunday onalar sharafiga 14-yanvar kuni tuman hokimligi, Mahalla va oilani qoʻllab-quvvatlash boʻlimi, tuman Madaniyat boʻlimi, tuman  Mudofaa boʻlimi hamkorligida 14-yanvar - Vatan himoyachilari kuniga bagʻishlab, muddatli harbiy xizmatini yurtimizning turli hududlarida oʻtayotgan askarlar onalari  ishtirokida “Askar onalarini sharaflaymiz!” tadbiri oʻtkazildi.

9-sonli Bolalar musiqa va sanʼat maktabida oʻtkazilgan tadbirda tuman Mahalla va oilani qoʻllab-quvvatlash boʻlimi boshligʻi, oʻrinbosari, tuman hokimining Xotin-qizlar masalalari boʻyicha maslahatchisi Muqaddas Beknazarova tabrik soʻzi bilan ochdi. U mamlakatimizda harbiy sohada amalga oshirilayotgan keng koʻlamli islohotlar, harbiy xizmatchilar va muddatli harbiy xizmatni oʻtayotgan askarlarga yaratilayotgan sharoit va imkoniyatlar yuksak samaralar berayotgani, oʻtgan yillar davomida Vatan posbonlariga munosib shart-sharoit yaratib berish, harbiy xizmatchilar, ularning oila aʼzolarini ijtimoiy himoyalash borasida tizimli ishlar amalga oshirilganligi haqida gapirdi hamda tumanimizning muddatli harbiy xizmat burchini bajarayotgan yigitlari onalariga tuman hokimi Sultanboy Yoʻldashevning tabrigini oʻqib eshittirdi. 79 nafar askar oʻgʻlonlarning onalariga bayram munosabati bilan esdalik sovgʻalarini topshirdi.

Tuman Mudofaa boʻlimi xodimi Muzaffar Madraimov askar onalarini va barcha yigʻilganlarni Milliy Armiyamiz tashkil topgan kun bilan qizgʻin tabrikladi. Yurtiga sadoqat bilan xizmat qilayotgan tumanimizning askar oʻgʻlonlari onalariga samimiy minnatdorchilik bildirdi.

Shuningdek, tadbirda Amudaryo tumanidagi harbiy qismlardan birida muddatli harbiy xizmat burchini oʻtayotgan bir guruh askarlar ham ishtirok etib, askar onalarini, barchani bayram bilan qutladi.

Tabriklar, samimiy tilaklar tuman Madaniyat boʻlimi sanʼatkorlarining ulkan kontsert dasturiga ulanib ketdi. Askar onalari oʻzlariga koʻrsatilgan hurmat-ehtirom uchun chuqur minnatdorchilik bildirdilar.

Oygul RAJABOVA.