“OBOD QIShLOQ” DAVLAT DASTURI DOIRASIDA XITOY OVULI YaNADA KOʻRKAM QIYoFA KASB ETADI

Xalqimizning turmush sharoiti, yashash muhiti yaxshilangan sari hayotdan rozi va farovon, baxtiyor yashaydi. Shu bois, xalq farovonligini oshirish, har bir insonning davlatdan rozi yashashini taʼminlash maqsadida  Prezidentimiz rahbarligida mamlakatimixda  keng miqyosli bunyodkorlik ishlari olib borilmoqda. Xususan, soʻnggi ikki yilda “Obod qishloq” va “Obod mahalla” dasturlari doirasida mamlakatimizning turli hududlarida, jami 1116 ta qishloq va mahallalarida istiqomat qiluvchi aholi farovonligi va turmush darajasini oshirish boʻyicha aniq maqsadga yoʻnaltirilgan chora-tadbirlar amalga oshirildi.

Prezidentimizning 2018-yil 29-martdagi “Obod qishloq” dasturi toʻgʻrisida”gi va 2018-yil 27-iyundagi “Obod mahalla” dasturi toʻgʻrisida”gi Farmonlari hamda 2020-yil 30-dekabr kungi Oliy Majlisga qilgan Murojaatnomasida belgilab berilgan vazifalar ijrosini taʼminlash maqsadida  tumanimizda ham “Obod qishloq” davlat dasturi doirasida Jumurtov shaharchasi va Xitoy ovuli hududlarida aholi punktlarining meʼmoriy qiyofasini tubdan yangilash, hududlarni kompleks rivojlantirish, yoʻl-transport infratuzilmasi, muhandislik-kommunikatsiya tarmoqlari va ijtimoiy soha obʼektlarini barpo etish hamda shu asosda aholining turmush madaniyatini yuksaltirishga qaratilgan bunyodkorlik ishlarini amalga oshirish chora-tadbirlar rejasi ishlab chiqildi.

Unga koʻra, faqat Xitoy ovulining oʻzida ijtimoiy  soha obʼektlaridan 2-sonli umumtaʼlim maktabi binosida 5 mlrd 908 mln. soʻmlik, 45-sonli maktabgacha taʼlim tashkiloti binosida 3 mlrd 360 mln. soʻmlik mukammal taʼmirlash hamda Xitoy ovul fuqarolar yigʻini maʼmuriy binosida zarur taʼmirlash ishlarini amalga oshirish rejalashtirilgan.

Shuningdek, ovul hududidagi infratuzilma obʼektlari holatini yaxshilash, buning uchun 5,95 km. uzunlikdagi ichki koʻcha yoʻllarini hamda ovulni boshqa hududlar bilan tutashtiruvchi Kuyuk koʻpir - Xitoy ovullari avtomobil yoʻllarini taʼmirlashga alohida eʼtibor qaratilib, avtomobil va ichki koʻcha yoʻllarini taʼmirlash maqsadlari uchun 1190 mln. soʻm mablagʻ yoʻnaltiriladi. Hududdagi avtomobil yoʻllari boʻyiga 1,1 km. uzunlikdagi piyodalar yoʻlakchasini yangidan qurish uchun 275 mln. soʻm mablagʻ ajratilishi rejalashtirilgan.

“Obod qishloq” dasturi doirasida hududdagi avtomobil yoʻllari boʻyiga  81 mln. soʻm mablagʻ hisobiga 35 ta tungi koʻcha yoritish chiroqlari oʻrnatilib, ovul hududidagi 35 ta tayanch ustunlarni rekonstruktsiya qilish va 19,5 km. uzunlikdagi elektr tarmoqlari va 6 ta transformator punktlarida mukammal va joriy taʼmirlash ishlarini amalga oshirish koʻzda tutilgan.

Ichimlik suv taʼminotini yaʼshilashga qaratilgan chora-tadbirlar rejasiga koʻra, hudud aholisiga toza ichimlik suvini yetkazib berish maqsadida Xitoy qishlogʻi hududiga 2 ta tozalangan suv tarqatish shoxobchasini yangidan tashkil etish rejalashtirilgan boʻlib, ushbu shoxobchalar ishga tushirilgach, ovul aholisini toza ichimlik suvi bilan muntazam taʼminlash imkoniyati yaratiladi.

Bundan tashqari, infratuzilma obʼektlarini obodonlashtirish ishlari ham amalga oshiriladi. Unga koʻra, ovul hududidagi yakka tartibdagi turar joylar holatini yaxshilash boʻyicha 45 ta uylarning tom qismini taʼmirlash, 115 ta uylarning fasad qismini, 12 ta uyning darvozaxonalari holatini yaxshilash, 45 ta ihota devorlarini yangidan qurish va 22 tasini taʼmirlash rejalashtirilmoqda. Hududda koʻkalamzor maydonlarni kengaytirishga ham alohida eʼtibor qaratiladi va yangidan daraxtzorlar, gulzorlar tashkil etish rejaga kiritilgan.

Milioratsiya tarmoqlarini rekonstruktsiya qilish evaziga hududda dehqonchilik madaniyatini yanada yuksaltirishga alohida ahamiyat beriladi. Buning uchun ovul hududidagi 3 km. uzunlikdagi melioratsiya tarmoqlari rekonstruktsiya qilinadi. Shuningdek, aholi tadbirkorligini rivojlantirish maqsadida 8 ta savdo majmualarini bunyod etish rejalashtirilgan.

Davlat dasturi doirasidagi ushbu rejalar amalga oshirilgach, Xitoy ovul fuqarolar yigʻini hududi obod goʻshaga aylanib, aholining turmush farovonligi yanada yuksaladi. Bu esa hudud aholisining yangi marralar sari intilib yashashlarida muhim omil boʻlishi tabiiy.

Robiya YOʻLDOShEVA.