OʻZINI OʻZI BOShQARISh ORGANLARI MODDIY-TEXNIK BAZASINI MUSTAHKAMLASh MAQSADIDA KOMPYuTER JAMLANMALARI BILAN TAʼMINLANDI

Fuqarolarning oʻzini-oʻzi boshqarish organlari faoliyati samaradorligini oshirish, mahalla institutini aholiga eng yaqin va xalqchil tuzilmaga aylantirish, fuqarolar yigʻinlarining mushtarak manfaatlarini ifoda etadigan uyushmaga birlashish huquqlarini roʻyobga chiqarish, ularning moddiy-texnika bazasini mustahkamlash hamda davlat organlari va fuqarolik jamiyati institutlari bilan oʻzaro hamkorligini yanada rivojlantirish maqsadida amalga oshirilayotgan ishlar tufayli bugungi kunda fuqarolar oʻzini oʻzi boshqarish organlarining jamiyatdagi nufuzi tobora oshib, xalqimizning chinakkam maslakdoshi va koʻmakdoshiga aylanib bormoqda.

Bugungi kunda mazkur tuzilmaning milliy va umuminsoniy qadriyatlarni asrab-avaylash va rivojlantirish , aholi qatlamlari orasida oʻzaro mehr-oqibat, hurmat va bagʻrikenglik muhitini shakllantirishdagi  nufuzi tobora oshib bormoqda. Shu bois, fuqarolar oʻzini  oʻzi boshqarish organlari ayni paytda xalqning ishonchli va yaqin koʻmakchisi sifatida aholi qatlamlariga oid muammolarni ham etish, har bir xonadon va oila hayotini chuqur oʻrganib, tahlil qilgan holda ijtimoiy himoyalash boʻyicha xalqimiz hayotidan muhim oʻrin egallab ulgurdi.

Joriy yilning 31-mart sanasida tuman hokimligi majlislar zalida tumandagi toʻrtta sektorlar rahbarlari, fuqarolar oʻzini oʻzi boshqarish organlari raislari hamda faollari ishtirokida oʻtkazilgan uchrashuvda mahalla institutining tumanimiz aholisi hayotida tutgan oʻrni alohida eʼtirof  etildi. Shu  bilan birga, mazkur tuzilmaning faoliyatini yanada rivojlantirish, mahalla ofislarini zamon talablari darajasidagi zamonaviy axborot-kommunikatsiya qurilmalari bilan jihozlash, aholi hayotiga oid barcha masalalar boʻyicha elektron maʼlumotlar bazasini shakllantirishga koʻmaklashish maqsadida tumandagi 10 ta fuqarolar oʻzini oʻzi boshqarish organlariga hamda 10 ta mahallada faoliyat yurituvchi 10 nafar huquq-tartibot masalalari boʻyicha mahalla fuqarolar yigʻini raisi oʻrinbosarlariga jami 20 ta kompyuter jamlanmalari berildi.

Har biri 2 mln. 666 ming soʻm, jami 53 mln. 320 ming soʻmlik mablagʻ hisobiga xarid qilingan mazkur kompyuter jamlanmalari fuqarolar oʻzini oʻzi boshqarish organlari moddiy texnik bazasini mustahkamlashga koʻmaklashish maqsadida tuman hokimligi, 4 ta sektor rahbarlari hamda tuman Mahalla va oilani qoʻllab-quvvatlash boʻlimlari homiyligida amalga oshirildi.

Tumanimizdagi oʻzini oʻzi boshqarish organlari moddiy texnik bazasini mustahkamlash hamda mahalla institutining nufuzini yanada oshirish maqsadida amalga oshirilayotgan bu kabi tadbirlar fuqarolar yigʻinlarining xalq bilan yaqinligini yanada yaxshilash, aholi hayotiga demokratik tamoyillarni keng joriy etishda muhim ahamiyat kasb etadi.

Robiya YOʻLDOShEVA.