“OBOD QIShLOQ” VA “OBOD MAHALLA” DAVLAT DASTURLARI DOIRASIDA AJRATILGAN MABLAGʻLAR MAQSADLI SARFLANADI

Oʻzbekiston Respublikasi Prezidentining 2021-yil 2-apreldagi “Obod qishloq” va “Obod mahalla” dasturlarini amalga oshirish boʻyicha qoʻshimcha chora-tadbirlar toʻgʻrisida”gi Qarori bilan hududlarning yoʻl-transport infratuzilmasi, muhandislik-kommunikatsiya tarmoqlari hamda ijtimoiy soha obʼektlarini rivojlantirish, shu asosda aholi farovonligi va turmush darajasini yanada yuksaltirish maqsadida tumanimizdagi Xitoy ovul fuqarolar yigʻini va Jumurtov shaharcha fuqarolar yigʻinlarida dastur doirasida ishlar boshlab yuborildi.

Xususan, bu ikki hududda jami 21 mlrd. 840 mln. soʻmlik qurilish-taʼmirlash ishlari bajarilishi, shu jumladan 5 ta maktab, 1 ta maktabgacha taʼlim tashkiloti, 2 ta mahalla fuqarolar yigʻini binolari, 1 ta xotira maydoni, 9,4 km. ichki yoʻllarni taʼmirlash, 7,4 km. elektr tarmoqlari, 2 ta transformator va 77 ta tayanch ustunlari, 4 ta tozalangan ichimlik suvi obʼektlari, 9 ta aloqa tarmoqlari, 3,1 km. irrigatsiya obʼektlarini rekonstruktsiya qilish va keng miqyosda obodonlashtirish ishlarini amalga oshirish belgilangan.

Hozirgi kunda Xitoy ovulida qurilish-taʼmirlash jarayoni qizgʻin kechmoqda. Shuningdek, aholini toza ichimlik suvi bilan taʼminlash, elektr taʼminoti, aloqa va axborotlashtirish tizimini modernizatsiya qilish, ichki yoʻllar, piyodalar yoʻlaklari, ijtimoiy soha obʼektlarini rekonstrutsiya qilish va taʼmirlash bilan bogʻliq tadbirlar ham jadal surʼatlarda amalga oshirilmoqda.

Muhtaram Prezidentimizning yuqoridagi Qarori ijrosini taʼminlash boʻyicha tumanda ishchi guruhi tashkil qilinib, ishchi guruhining har bir aʼzosiga bajaradigan vazifalari aniq belgilab berildi.

Dastur doirasida ajratilgan mablagʻlarning maqsadsiz sarflanishi, talon-taroj qilinishi, qurilish, taʼmirlash va obodonlashtirish ishlarining sifatsiz bajarilishi kabi salbiy holatlarning oldini olish maqsadida Xitoy ovuli hududida prokuratura ishchi guruhining shtabi tashkil etilib, byudjet mablagʻlarining maqsadli sarflanishi yuzasidan kunlik nazorat ishlari ham olib borilmoqda.

Koʻrilayotgan chora-tadbirlar, shuningdek, dastur doirasida ajratilgan mablagʻning maqsadli sarflanishini qatʼiy nazorat qilish natijasida ikkala  hududda ham  qurilish-taʼmirlash ishlari sifatli amalga oshirilmoqda. Maqsadimiz –  “Obod qishloq” davlat dasturiga kiritilgan hududlarning yanada obod va koʻrkam qiyofa kasb etishiga hissa qoʻshishdir.

A.Batirov, tuman prokurorining katta yordamchisi.