Yosh oilalar uchun uy-joylar

OʻzA, A.Ortiqboyev, 02.07.2014 14:34

Prezidentimiz Islom Karimov rahnamoligida amalga oshirilayotan islohotlar jarayonida jamiyatning asosiy boʻgʻini boʻlgan yosh oilalarni har tomonlama qoʻllab-quvvatlash va ular uchun munosib turmush sharoiti yaratishga alohida eʼtibor qaratilmoqda.
Davlatimiz rahbarining joriy yil 6-fevraldagi "Oʻzbekiston Respublikasida yoshlarga oid davlat siyosatini amalga oshirishga qaratilgan qoʻshimcha chora-tadbirlar toʻgʻrisida”gi qarori hamda «Sogʻlom bola yili» Davlat dasturida ham ushbu yoʻnalishdagi muhim vazifalar belgilangan boʻlib, ular izchillik bilan amalga oshirilmoqda.
Ushbu qaror va dastur asosida Qoraqalpogʻiston Respublikasining Ellikqalʼa, Beruniy, Xoʻjayli va Amudaryo tumanlarida yosh oilalar uchun koʻpqavatli uylar qurilmoqda. "Kamolot” shaharchasi, deb nomlanayotgan mavzelar ayni paytda ulkan bunyodkorlik maydoniga aylangan.
– Yoshlar uchun yangi uylar qurilishi jadal surʼatda olib borilmoqda, – deydi "Kamolot” yoshlar ijtimoiy harakati Qoraqalpogʻiston Respublikasi kengashi raisi Joʻldasboy Abdujamilov. – Barcha qulayliklarga ega bu uylar yosh oilalar uchun maxsus loyiha asosida bunyod etilmoqda. Ular yosh oilalarga tijorat banklari tomonidan 5 foizli imtiyozli kredit asosida beriladi.
"Kamolot" shaharchasida turar-joylar bilan birga, ijtimoiy soha obʼektlari qurilishi ham jadal amalga oshirilayotir. Shuningdek, bolalar sport maydonchalari, maktabgacha taʼlim muassasasi bunyod etiladi.

(Foto - http://kun.uz)