MARRAGA YaQINLAShAYoTGAN FERMERLAR

Ayni kunlarda butun mamlakatimizda paxtakor dehqonlar uchun gʻalvir suvdan koʻtariladigan palla – “Paxta - 2021” kampaniyasi qizgʻin davom etmoqda. Paxtakorlarga beminnat xizmat koʻrsatish, yigʻim-terimda ishtirok etayotgan ijarachi-dehqonlar va koʻngilli hasharchilarning vaqtida tushlik qilishlari, tergan paxtalarini muammosiz tarozida tortib olish, dala boshida koʻngilli tushlik qiluvchilar uchun yaratilgan shart-sharoitlar tufayli paxtachilik fermer xoʻjaliklarida terim surʼati tobora oshmoqda.

Amudaryo tumanidagi “Toʻlqin” ovulida ham yigʻim-terim kampaniyasi yuksak tashkilotchilik va jipslik bilan davom etmoqda. Ovul hududida 13 ta paxtachilik fermer xoʻjaliklari boʻlib, erta bahorda 625 gektar maydonga chigit ekildi. Gʻoʻza vegetatsiyasi davrida barcha mavsum ishlari agrotexnika qoidalariga muvofiq amalga oshirildi.

Mazkur dehqonchilik yilining avvalgi yillarga nisbatan ancha qurgʻoqchil kelishi fermer xoʻjaliklari rahbarlari va ijarachi-dehqonlarni ancha qiynab qoʻydi. Shunday murakkab sharoitda ham har qatra suvning qadriga yetib, gʻoʻzani sugʻorish, oziqlantirish ishlarini kecha-yu kunduz, aniq reja asosida tashkil etgan fermerlar va fermer xoʻjaliklari mutaxassislari hamda ijarachi dehqonlarning bugungi yetishtirilgan hosildan koʻngillari toʻq.

Ovul boʻyicha davlatga 625 gektar yerdan shartnomadagi 1930 tonna paxta topshirish niyatida mehnat qilayotgan toʻlqinliklar ayni paytda dalalaridan kuniga 70-80 tonnalik yuqori sifatli paxta terib olishga erishmoqdalar. Fermer xoʻjaliklari dalalarida har kuni 850-900 nafar terimchi ishtirok etishmoqda.

Toʻlqinlik fermerlar paxta yigʻim-terimi bilan birga 510 gektar maydonda kuzgi bugʻdoy ekish ishlarini barvaqt yakunlab, ayni paytda bir tekis  unib chiqqan bugʻdoy maysalarini zararkunanda hasharotlardan himoya qilish, bugʻdoyzorlarda zararkunandalarga qarshi ishlov berish kabi mavsum yumushlarini ham sifatli amalga oshirishmoqda.

Ovul hududidagi “Ahmedov Rajabboy” fermer xoʻjaligiga Rufat Ahmedov rahbarlik qiladi. Erta bahorda 90 gektar yerga serhosil va ertapishar “Sulton” navli chigit ekkan xoʻjalik dehqonlari ayni kunlarda yil boʻyi qilingan samarali mehnatlari mevasi shartnomadagi 288 tonnalik yuksak hosil xirmonini yaratish niyatida fidoyilik bilan mehnat qilishmoqda. Paxta yigʻim-terimida 82 nafar ijarachi-ishchilardan tashqari, toʻlqinlik koʻngilli hasharchi-yoshlar ham ishtirok etishmoqda.

Yigʻim-terim ishlarining toʻgʻri  tashkil etilgani, terimchilar va koʻngilli hasharchilar uchun yaratilgan shart-sharoitlar, terilgan har bir kilo paxta uchun ish haqlari oʻz vaqtida hisob-kitob qilinib, borilayotgani tufayli terim surʼati yuqori.

Fermer xoʻjaligida paxtachilikdan tashqari, gʻallachilik sohasida ham salmoqli natijalarga erishilmoqda. Ayni kunda 25 gektar maydondagi kuzgi bugʻdoyzorlarda nihollar bir tekis unib chiqib, baravj oʻsmoqda.

Xoʻjalikning paxta dalalari esa ijarachi-dehqonlar va toʻlqinlik koʻngilli hasharchilar uchun chinakkam rizq-roʻz va baraka manbaiga aylangan. Terilgan paxtasi uchun oʻz vaqtida ish haqlarini hisob-kitob qilib olayotgan terimchilarning kayfiyatlari baland. Bu esa paxta yigʻim-terimining kunlik oʻsishini taʼminlamoqda. Fermer xoʻjalining ilgʻor terimchilari Gulsara Yernazarova hamda Gulbahor Toʻraboyevalar kuniga 150-170 kilogrammdan paxta terishmoqda.

Oq oltin ovulidagi Davronbek Xolmenov rahbarligidagi “Gavhar Yoqubova”  fermer xoʻjaligi dalalarida ham yigʻim-terim mavsumi hamjihatlik bilan olib borilmoqda.

Joriy dehqonchilik yilida 90 gektar yerga “Mangʻit-1” navli chigit ekkan xoʻjalik dehqonlari 287 tonnalik xirmon koʻtarish niyatida fidoyilik bilan mehnat qilishmoqda. Ayni paytda 150 nafar terimchi xoʻjalik dalalaridan kuniga 10-15 tonna paxtani yigʻib-terib davlatga topshirayotgan fermer xoʻjaligi ishchilarining shahdlari baland. Ular 287 tonnalik shartnomaviy rejalarini yana bir haftaga uddalashga ahd qilishgan.

Ilgʻor terimchilardan Sabohatxon Ismoilova hamda Sayyoraxon Shomurodovalar kuniga 120-130 kilogrammdan paxta terishib, tengdoshlariga oʻrnak boʻlishmoqda.

Robiya Yoʻldosheva.