OʻzLiDePdan Prezidentlikka nomzod Shavkat Mirziyoyevning Qoraqalpogʻiston Respublikasi boʻyicha ishonchli vakili Abatbay Daniyarov saylovchilar bilan uchrashdi

Mamlakatimizda joriy yil 24-oktyabr sanasida oʻtkaziladigan muhim siyosiy voqea – Oʻzbekiston Respublikasi Prezidenti sayloviga keng koʻlamli tayyorgarlik koʻrilmoqda. Saylov tizimini isloh qilish va yanada demokratlashtirish, uning huquqiy asoslarini mustahkamlash, milliy qonunchiligimizni saylov huquqiga oid xalqaro standartlarga uygʻunlashtirish borasida amalga oshirilgan ishlar natijasida bu galgi saylovlar yuksak saviyada oʻtishi kutilmoqda.

Ayni kunlarda tobora yaqinlashayotgan Oʻzbekiston Respublikasi Prezidenti sayloviga tayyorgarlik ishlari qizgʻin pallaga kirgan. Saylovchi sifatida mazkur jarayonlarni kuzatar ekanmiz, nomzodlarning saylovchilar bilan faol targʻibot-tashviqot tadbirlarini samarali tashkil qilayotganiga guvoh boʻlamiz. Targʻibot-tashviqot tadbirlarining mazmun-mohiyati jihatdan bir-biridan farq qilishi, nomzodlar saylovoldi dasturlarining mazmun jihatdan boyligi hamda ular saylovchilarning faol ishtiroki bilan oʻtkazilayotganini alohida qayd etish lozim.

16-oktyabr kuni Amudaryo tumani Qilichboy ovulida Oʻzbekiston Respublikasi Prezidentligiga Tadbirkorlar va ishbilarmonlar harakati – Oʻzbekiston liberal-demokratik partiyasidan nomzod Shavkat Mirziyoyevning Qoraqalpogʻiston Respublikasidagi ishonchli vakili, Oliy Majlis Senati aʼzosi, Oʻzbekiston Respublikasi Yoshlar ishlari agentligi Qoraqalpogʻiston Respublikasi boshqarmasi boshligʻi Abatbay Daniyarov ishtirokida saylovoldi targʻibot-tashviqot tadbiri oʻtkazildi.

Targʻibot-tashviqot tadbirida partiyaning Qoraqalpogʻiston Respublikasi kengashi raisi Sharap Utemisov, tuman kengashi masʼullari, boshlangʻich partiya tashkiloti aʼzolari, saylovchilar, fuqarolar yigʻinlari masʼullari hamda ommaviy axborot vositalari vakillari ishtirok etdilar.

Tadbir mobaynida ishonchli vakil Abatbay Daniyarov eng asosiy eʼtiborini nomzodning saylovoldi dasturi maʼno-mazmunini saylovchilarga yangicha yondashuv asosida yetkazishga qaratdi.

Ishonli vakil taʼkidlashicha, prezidentlikka nomzodning saylovoldi dasturida mamlakatni yangi taraqqiyot bosqichiga olib chiquvchi qator yoʻnalishlar boʻyicha aniq strategik maqsadlar hamda ustuvor vazifalar belgilangan. Xususan, dasturda uzluksiz taʼlim tizimi uchun milliy oʻquv dasturini joriy etish, taʼlim sifatini oshirish va raqobatbardosh kadrlar tayyorlash masalalariga alohida eʼtibor qaratilayotgani, sogʻliqni saqlash tizimida yuksak natijadorlikka erishish, aholi oʻrtasida kasalliklarni kamaytirish, sogʻlom turmush tarzini faol targʻib etish va oʻrtacha umr koʻrish darajasini oshirish eng muhim vazifalar sifatida belgilanganini alohida qayd etdi.

Shuningdek, nomzodning saylovoldi dasturida hududlarni mutanosib rivojlantirish eng ustuvor yoʻnalishlardan biri sifatida belgilanib, tuman va shaharlar kesimida 14 ta besh yillik hududiy dasturlarni amalga oshirish choralari koʻrilishi, bunda har bir tuman va shaharning muammo va imkoniyatlari oʻrganilib, “oʻsish nuqtalari” belgilab olinishi, shuningdek, mamlakat taraqqiyotining yangi bosqichida ixcham, professional, xalqimiz talablariga javob beradigan, adolatli, yuqori natijadorlikka yoʻnaltirilgan davlat boshqaruvi tizimini shakllantirish borasida ham ustuvor vazifalar belgilangani xususida maʼlumotlar keltirildi.

Tadbirda mehnat faxriysi Amina Yusupova hamda tuman nuroniylar jamoatchilik kengashi raisi oʻrinbosari Bekmon Allaberganovlar Prezidentlikka nomzod Shavkat Mirziyoyevning saylovoldi dasturi yuzasidan oʻz fikr-mulohazalarini bildirdilar.  Saylovchilar shonchli vakil Abatbay Daniyarovga nomzodning saylovoldi dasturi yuzasidan qator savollar bilan murojaat qildilar hamda tegishli javoblarni oldilar.

Madamin Kazakov, OʻzLiDeP Amudaryo tuman kengashi raisi.