Jayxun ilhomlari

Ona tilimga

Oʻtgan asrlardan minnatdorman men,

Shu davr olim-u shoiridan ham.

Ajdodlar tufayli bugun avlodlar,

Ona til boyligin koʻrmoqda baham.

 

Onalarga rahmat, allalar aytgan,

Ertaklar soʻylagan momolarga ham.

Barida bolalar uchun dunyoning,

Barcha-barcha sehr-u amallari jam.

 

Navoiy bobomdan minnatdorman men,

Imkoniyatin ochgan turkiy kalomning.

Shu sabab ushbu kun oʻzbekni tanir,

Sheʼriyat muxlisi butun olamning.

 

Ona tilim, seni alqab yuraman,

Sheʼr oʻqib, qayerga yetsa oyogʻim.

Chunki sensan mening, toki hayotman,

Yoʻlim koʻrsatuvchi porloq mayogʻim!

Ahmad NAFASOV.

 

Qaytar dunyo bu

Yaxshilikni aslo yashirib boʻlmas,

Borini boridek aytar dunyo bu.

Yomonlikni haddan oshirib boʻlmas,

Ne qilsang oʻzingga qaytar dunyo bu.

 

Yolgʻonchi dunyo deb jar solma inson,

Besh kunlik dunyoga hammamiz mehmon.

Keng karamli, yolgʻiz Allohga ishon,

Borini boridek aytar dunyo bu,

Ne qilsang oʻzingga qaytar dunyo bu.

 

Kimdir gʻiybat qilib qiynar joningni,

Birov koʻrolmaydi topgan shoningni,

Barakasi boʻlsin dasturxoningni,

Borini boridek aytar dunyo bu,

Ne qilsang oʻzingga qaytar dunyo bu.

 

Egri yoʻldan yurib boylik izlama

Gʻoyibdan kelajak dunyo koʻzlama.

Yaxshi soʻz soʻzlagil yomon soʻzlama,

Borini boridek aytar dunyo bu,

Ne qilsang oʻzingga qaytar dunyo bu.

 

Shomurod doimo boʻlsin omonlik,

Barchamiz boʻlaylik yaxshi tomonlik.

Yaxshilik qilmasang, qilma yomonlik,

Borini boridek aytar dunyo bu,

Ne qilsang oʻzingga qaytar dunyo bu.

Shomurod XOʻJANOV,

Doʻrman ovuli.

 

Dada

(Dadajonim xotirasiga)

Bilaman, kuzatasiz meni samodan,

Doim tilab turasiz omad-u baxtlar.

Koʻzlarim koʻrmasa-da qalbim sezadi,

Mening qahramonim, qalqonim, dada.

 

Toʻgʻri yoʻl koʻrsatib ukalarimga,

Yaxshilikni oʻrgataman ularga.

Siz koʻrmagan eng baxtiyor kunlarni,

Onajonim koʻradi ishoning, dada.

 

Yigʻlamayman, hech toʻkmayman yosh,

Bilaman, quvonsam, quvonasiz siz.

Dadajon, ishoning Ruhshonangizga,

Onamni baxtiyor qilgum, koʻrasiz.

 

Bugun Siz sevgan ulugʻ kun keldi,

Mustaqil Vatanim oʻttizga toʻldi.

Elim deb, yurtim, deb yashagan mardlar,

Qatorida nomingiz tillarda boʻldi...

Ruhshona Saidmambetova,

62-maktab oʻquvchisi.

 

Posbonlar

Sizni uchrataman togʻda, dalada,

Xizmatda hamisha qorda, jalada.

Sizga kuch bersin, sizga sabot bersin,

Buyuk  zotlar ruhi shunday pallada.

 

Har kun quyosh bilan sogʻ koʻrishib yuz,

Uydan omon chiqib, omon qaytingiz.

Rizqi ulugʻ boʻlsin, koʻksi togʻ boʻlsin.

Xonadoningiz-u, mamlakatingiz!

 

Yoʻllar tinch boʻlsin, osmon oq boʻlsin.

Bahor maysalari koʻkchiroq boʻlsin.

Vatanga sodiq ey fidoyilar,

Pokligingiz sizga yoʻlchiroq boʻlsin.

Bayram Kenjayev,

6-sonli maktab oʻquvchisi.

 

Yaxshi insonni

Birov yeydi yashamoq uchun,

Kimdir yemoq uchun yashaydi.

His qiladi hayotning zavqin,

Ikkinchi yamlab tashlaydi.

 

Unda bordir na nomus, na or,

Tomogʻidan oʻtgani foyda.

Nafsi uchun har nega qodir.

Xoinlik ham qilar har joyda.

 

Nafsiga qul bunday bandalar,

Sotar doʻstni oʻtirgan joyda.

Unga nafsi boʻlsa boʻlgani,

Koʻrsa boʻldi bir oʻzi foyda.

 

Bundaylardan uzoq yur, yiroq,

Har qadamda ketadi sotib.

Ergashsang gar u bilan, biroq,

Botqoqlarga ketasan botib.

 

Yemoq uchun yashama, hargiz,

Yashash uchun yegin ozgina.

Ozgʻin boʻlma, boʻlmagin semiz,

Hech kimsadan qilmagin taʼma.

 

El ichida boʻlsin oʻz oʻrning,

Koʻrinmasang izlasin seni.

Insofsizni kim ham izlardi,

Sogʻinsinlar har damda seni.

 

Shunday inson yashar barhayot,

Oʻlsa hamki oʻchmagay nomi.

Koʻpchilikning qalbida yashar,

Unutmaslar yaxshi insonni.

Farhod Avaz.

 

Shukrona qil

Koʻzing koʻrib, yoʻl topib,

Yurganingga shukur qil.

Kecha yotib, erta turgan,

Har kuningga shukur qil.

 

Alloh noz-neʼmatlarni,

Cheksiz inʼom  etgan, bil.

Koʻzingga surtib uni,

Asragin, isteʼmol qil.

 

Oq bilan qop-qorani,

Ajratmoqni oʻzing bil.

Har narsani jufti bilan,

Yaratganga shukur qil.

 

Hayotda sen borliging,

Omadingdir, baxtingdir.

Qancha goʻdak tugʻilib,

Yashamagan, shuni bil!

Dilfuza Sultonova.

 

Maktabim

Maktabim – bu nurxona,

Bilim bergan kuch bergan.

Teran boqdim jahonga,

Intilish, omad bergan.

 

Ustozlardan oʻrganib,

Ilm yoʻlin tutaylik.

Yaxshi-yomonni tanib,

Ezgularga yetaylik.

Aziza JUMABOYeVA,

6-sonli maktab oʻquvchisi.

 

Ukamga

Asaltoyim mening, shirintoy ukam.

Jajji qoʻllaringdan oʻzim aylanay.

Koʻzlaring chaqnaydi quyosh misoli.

Yuzlaring goʻyoki bahor timsoli.

 

Sening timsolingda otamni koʻrdim,

Yuzlaring chiroyli soʻzlaring shirin.

Sening kulgung bilan nurlidir kunim,

Qarashingda baxt yashirin.

Maftuna Yaxshimurodova,

22-sonli maktab oʻquvchisi.