BOʻShAB QOLGAN DEPUTATLIK OʻRNI UChUN KOʻRSATILGAN NOMZODLAR BILAN SAYLOVChILARNING UChRAShUVI OʻTKAZILDI

Shu yilning 28-noyabr kuni Xalq deputatlari Amudaryo tuman Kengashida boʻshab qolgan yigirma uchinchi Bobur saylov okrugida deputat saylovi oʻtkaziladi. Ayni kunlarda deputatlikka nomzodlar saylovchilar bilan uchrashib, oʻz saylovoldi dasturlari bilan tanishtirmoqda.

Joriy yilning 28-noyabr kuni Xalq deputatlari Amudaryo tuman Kengashida boʻshab qolgan yigirma uchinchi Bobur saylov okrugida deputat saylovi oʻtkaziladi. Ushbu saylov jarayonini demokratik tamoyillarga qatiy rioya qilgan holda oʻtkazish, saylovoldi targʻibot tadbirlarini yuqori saviyada tashkil etib, siyosiy partiyalardan koʻrsatilgan deputatlikka nomzodlarning tarjimai holi va mehnat faoliyati bilan saylovchilarni yaqindan tanishtirish maqsadida 18-noyabr kuni 86-sonli maktabda nomzodlar va ularning ishonchli vakillari ishtirokida targʻibot tadbiri boʻlib oʻtdi.

Tadbirda Oʻzbekiston "Milliy tiklanish"  demokratik partiyasidan nomzod Rasul Tajiboyev, "Adolat" sotsial-demokratik partiyasidan nomzod Ogʻabek Olloberganov, Tadbirkorlar va ishbilarmonlar harakati Oʻzbekiston Liberal demokratik partiyasidan nomzod Sarvar Shukurullayev, Oʻzbekiston Ekologik partiyasidan nomzod Shavkat Yangiboyev, Oʻzbekiston Xalq demokratik partiyasidan nomzod Mahmud Eshmanov hamda ularning ishonchli vakillari, shuningdek, saylovchilar va ommaviy axborot vositalari xodimlari ishtirok etdilar.

Dastlab, deputatlikka nomzodlarning ishonchli vakillari nomzodlarning tarjimai xoli va saylovoldi dasturlari  bilan saylovchilarni tanishtirib oʻtishdi va saylovda siyosiy partiyalardan koʻrsatilgan munosib nomzodlar uchun ovoz berishga chaqirdilar.

Shundan soʻng, nomzodlar soʻzga chiqib, oʻzlari aʼzo boʻlgan siyosiy partiyalarning  saylovoldi dasturlarida belgilangan ustuvor yoʻnalishdarni hayotga tatbiq qilishga va xalq oldidagi masuliyatni chuqur xis qilib,  deputatlik vakolati doirasida  barcha muammolarni yechishga harakat qilishga soʻz berishdi.

Deputatlikka nomzodlar bilan uchrashuv yigʻilishida beshta siyosiy partiyadan koʻrsatilgan nomzodlarning saylovoldi dasturlari saylovchilar tomonidan atroflicha muhokama etildi.

Xususan, Ekologik partiyasidan koʻrsatilgan nomzod Shavkat Yangiboyevning atrof-muhit muhofazasi, iqlim oʻzgarishlariga qarshi mamlakat miqyosida amalga oshirilishi koʻzda tutilayotgan chora-tadbirlar, ona tabiatni asrab-avaylash, oziq-ovqat xavfsizligini taʼminlash, choʻllanish holatlarining oldini olish, shuningdek, oʻzimiz yashab turgan hududda tuproq ekologiyasi buzilishining oldini olish, yashil hududlarni yanada kengaytirish borasidagi partiya dasturida belgilangan ustuvor vazifalar boʻyicha shaxsiy tashabbus va fikrlariga saylovchilar vakillari tomonidan ijobiy munosabatlar bildirildi.

Shuningdek, “Milliy tiklanish” demokratik partiyasidan koʻrsatilgan nomzod Rasul Tajiboyev, “Adolat” sotsial-demokratik partiyasidan nomzod Ogʻabek Ollaberganov, Oʻzbekiston liberal-demokratik partiyasidan koʻrsatilgan nomzod Sarvar Shukurullayev hamda Oʻzbekiston Xalq demokratik partiyasi tuman Kengashidan  nomzod Mahmud Eshmanovlarning saylovoldi dasturlari hamda shaxsiy tashabbus va rejalariga saylovchilar oʻz munosabatlarini bildirishdi.

Deputatlikka nomzodlarning saylovoldi dasturlari yuzasidan boʻlgan muzokaralarda ishtirok etgan saylovchilar vakillari nomzodlarga oʻzlarini qiziqtirgan masalalar, ayniqsa, nomzod mabodo deputat boʻlib saylangan taqdirda xalq manfaati yoʻlida asosan qaysi tashabbuslarni eng ustuvor vazifa hisoblashlari xususida savollar bilan murojaat qildilar. Deputatlikka nomzodlar saylovchilar vakillari tomonidan tushgan savollarga navbati bilan batafsil javob berdilar.

Ochiqlik va shaffoflik asosida, demokratik ruhda oʻtgan deputatlikka nomzodlar bilan uchrashuv saylovchilarning har bir nomzod aʼzo boʻlgan partiya dasturi haqida aniq va mufassal tushunchaga ega boʻlishlarida muhim ahamiyat kasb etdi.

Robiya YOʻLDOShEVA.