ZIYo MASKANINING QIShKI TUHFASI

Kitob – hayotning eng olis va qorongʻi yoʻllariga nur baxsh etgan afsonaviy chiroqdir.

Kitob zamonlar dengizida sayohat qilayotgan va oʻzining qimmatbaho yukini avlodlardan-avlodlarga tashiyotgan xikmat kemasidir. Kitob - bilim beradi, bilim – baxt keltiradi. Shunday ekan, aziz kitobxonlar, biz sizlarga jamgʻarmamizga yangi olib kelingan quyidagi adabiyotlarni oʻqishni tavsiya qilamiz.

“Xikmatlar va hikoyatlar” kitobi oʻrta asrlarda Shomda yashab ijod etgan yirik alloma Abdulfaraj (1226-1286) qalamiga mansubdir. Falsafa, tarix, dinshunoslik, tilshunoslik, astronomiya va tibbiyot sohalaridagi ilmiy asarlari bilan mashxur bu olim hikmat va hikoyatlar yigʻish bilan ham shugʻullangan. Mazkur toʻplamda turli din, millat va kasb vakillari boʻlgan oqil kishilarning hayotidan ibratli hikmatlar keltirilgan.

“Vodiy media” nashriyoti tjmonidan chop etilgan Zulfiya Isroilovaning “Mening yurtim” sheʼriy toʻplamida “Xalqimga aytar soʻzlarim”, “Seni qoʻllayman hayot”, “Hayot bu”, “Bir dasta gul keltirdi qizlar” nomli sheʼrlari oʻrin olgan.

“Bul kitob jism-u figʻonimdir mening, Bul qalam jonu jahonimdir mening”, satrlari bilan boshlangan, “Donish chirogʻi” nashriyotida nashr etilgan, dunyo adabiyotida oʻziga xos oʻrniga ega, buyuk qirgʻiz yozuvchisi Chingiz Aytmatovning “Asrga tatigulik kun” romani oʻquvchilarga yaxshi tanish. Zero, bu asar oʻz davrining muammolarini badiiy boʻyoqlarda ifoda etadi. Bir qarashda asarda kechayotgan voqealar shunchaki tabiiy, hayotiy voqeadek tuyuladi. Biroq yozuvchining atrofni biz koʻrgandan tamoman boshqacha yoʻsinda koʻrsata olishi, voqealar bayonidagi sirli ishoralar kitobxonni xayratlantiradi.

Taniqli yozuvchi Asqad Muxtorning “ Abadiy barhayot asarlar” turkumiga kirgan “Chinor” romanining boshida butun yurtga tarqab ketgan uzoq-yaqin qarindoshlardan xabar olgani otlangan Ochil boboga qoʻshilishib, muallif olis safarga chiqadi. Mana shu oʻta qiziqarli va ibratli safar asnosida bobo peshonalaridagi ajinlar singari bir-biriga ulanib ketgan insoniy taqdirlar haqidagi goh shirin, goh achchiq hikoyalarga oshno tutinasiz. Bu taqdirlar bir-birlari bilan Ochil bobo orqali bogʻlanib, yagona shajarani – azim chinorni vujudga keltiradi.

Nobel mukofoti sovrindori Ernest Xeminguey nomini eshitmagan kitobxon boʻlmasa kerak. Adibning “Chol va dengiz” , “Alvido, qirol” nomli asarlari va bir qancha hikoyalari oʻzbek tiliga tarjima qilingan. Bu safar yozuvchining “Borliq va yillik” romanini siz aziz kitobsevarlarga taqdim etmoqdamiz. Ikki jildli mazkur asarga muallif oʻzi yashagan davrdagi oddiy kishilarning ogʻir hayotini haqqoniy tasvirlab bergan.

Oʻzbekiston Respublikasi Prezidenti Shavkat Mirziyoyev taʼkidlaganidek: “odamlarning dardu tashvishlarini oʻylab yashash – odamiylikning eng oliy mezonidir”.

Murod Abdullayevning “Qafasdan qutilgan qush” nomli kitobida keyingi yillarda yozgan maqolalari jam boʻlib, bunda yozuvchi davrimiz bunyodkorlarining ibratli ishlari, qahramonliklarini joʻshib qalamga oladi. Barpo boʻlayotgan obod qishloqlar, buyuk yoʻllar, Vatan kuch-qudratini namoyon etayotgan muhtasham inshoatlar goʻzalligidan faxrlanadi va bu tuygʻuni kitobxonga yuqtirishga harakat qiladi. Kitob barcha oʻquvchilarga manzur boʻladi, degan umiddamiz.

Aziz kitobxonlar! Tuman axborot-kutubxona markazimizga tashrif buyurib, kitoblar olamiga sayohat qilishga chorlab qolamiz. Hayotda shunday odamlarni axtaringki, ular bilan suhbat qilmoq, yaxshi kitob oʻqimoqqa barobar boʻlsin. Shunday kitoblarni axtaringki, mutolaasi faylasuflar suhbatiga teng boʻlsin.

R.Ramonova, tuman Axborot-kutubxona markazi bibliografiya xizmati rahbari.