BOShLANGʻICh SINFLARDA ”ENGLISH IS FUN” DEB NOMLANGAN TADBIR OʻTKAZILDI

Oʻquvchilarning yil davomida oʻzlashtirgan bilimini baholash, ular oʻrtasida doʻstona munosabatni shakllantirish, zukkoligini oshirish maqsadida tumandagi 38-sonli kimyo-biologiya fanlariga ixtisoslashtirilgan maktabda 3-sinf oʻquvchilari oʻrtasida ”English is Fun” deb nomlangan tadbir oʻtkazildi.
Tadbirni ingliz tili  fani oʻqituvchilari ochib berishdi va boshqarishdi. Shundan soʻng, oʻquvchilar bellashuv shartlari asosida oʻz bilim va iqtidorlarini namoyish etishdi. Bellashuvda“STARS” va “Smart kids“ jamoalari 7 ta shartni bajardilar.

Jamoalar Greeting shartiga koʻra oʻzlarini tanishtirib, ismi, yoshi, sevimli fani, rangi, sevimli  mashgʻulotlari haqida maʼlumot berishdi. Ikkinchi odd the words shartiga koʻra berilgan soʻzlar qatoridan ortiqcha soʻzni belgilab koʻrsatdilar. Uchinchi Put in column sharti boʻyicha jamoalar qatorlarga tegishli soʻzlarni, yaʼni mevalar guruhiga mevalar turlari, oila guruhiga oila aʼzolari soʻzlarini qoʻyib chiqdilar. Toʻrtinchi shart make up sentences deb nomlanib,  bu shartda oʻquvchilar har bir kartochkaga yozilgan soʻzlardan  ketma-ketlikda, mazmunan moslikdagi gaplar tuzishdi.

Beshinchi Draw me sharti meni chiz deya nomlanib, bu shartda guruhlar sardori bir varaqda yozilgan matnni oʻqib, matn yuzasidan rasm chizishdi. Oltinchi The task for captain shartida sardorlar soʻz yasash boʻyicha musobaqalashishdi. Eng koʻp soʻz tuzgan sardorga yuqori ball qoʻyildi. Yettinchi ”Magic box”, yaʼni sehrli  quticha deb nomlangan shartda esa har jamoadan bir oʻquvchi qutichadan qogʻoz boʻlaklariga yozilgan shartlarni bajardi.
Hakamlar hayʼati ikki jamoaning shartlar boʻyicha ijrolarini, bilimlarini baholab bordilar. Tanlov yakunida ikki jamoa xam 28 ball toʻplab, doʻstlik gʻalaba qozondi.

Nodira Qurbonboyeva,

38-sonli maktab oʻqituvchisi.