Fermerlarga gʻalla yetishtirish va sotishda bozor tamoyillari joriy etilganining afzalliklari tushuntirilmoqda

Oʻzbekiston Respublikasi Prezidenti Shavkat Mirziyoyev, 2022-yil 11-may kuni gʻallachilik sohasidagi islohotlarning muhim bosqichiga bagʻishlab oʻtkazgan yigʻilishida, hosildorlikni yuqori darajaga olib chiqish va shu orqali bozorda sotiladigan don hajmini koʻpaytirish hamda narx-navo barqarorligini taʼminlashning yagona toʻgʻri yoʻli bozor narxlariga oʻtish ekanligini taʼkidlab oʻtgan edilar.

Yuqorida koʻrsatilgan salbiy holatlarining oldini olish va ijtimoiy himoyaga muhtoj aholini manzilli qoʻllab-quvvatlash hamda respublikada don yetishtirish hajmlarini sezilarli darajada oshirish maqsadida joriy yilning 28-may kuni fermer xoʻjaliklari va gʻallachilik klasterlarining moddiy manfaatdorligini oshirish hamda sohaning investitsiyaviy jozibadorligini oshirish maqsadida Oʻzbekiston Respublikasi Prezidentining “Gʻallani yetishtirish va sotishda bozor tamoyilini joriy etishning qoʻshimcha chora-tadbirlari toʻgʻrisida”gi qarori qabul qilindi.

Ushbu qarorning mazmun-mohiyatini fermerlarga tushuntirish va targʻib qilish maqsadida 3-iyun kuni tuman hokimligining majlislar zalida yigʻilish boʻlib oʻtdi.

Yigʻilish Qoraqalpogʻiston Respublikasi savdo-sanoat palatasi boshligʻi Ajiniyoz Siytaxov boshchiligida oʻtkazildi.

Yigʻilishda qayd etilganidek, qaror qabul qilinishidan asosiy maqsad, birinchi navbatda gʻalla yetishtiruvchilarning, shu jumladan, fermer xoʻjaliklarining moddiy manfaatdorligini oshirish va shu asosda gʻalla hosildorligi va yalpi hosil yetishtirish hajmlarini keskin oshirishga zamin yaratishdir.

 Bu oʻz navbatida ichki bozorni bugʻdoy va un mahsulotlari bilan uzluksiz taʼminlashga zamin yaratadi hamda sohaning investitsiyaviy jozibadorligini oshiradi.

Shuningdek, Olis, borish qiyin boʻlgan va togʻli hududlarga un va un mahsulotlarini yetkazib berish boʻyicha transport xarajatlarining 50 foizigacha qismi qoplab beriladi. Qarorga koʻra, donni qabul qilish va omborlardan chiqarish jarayoni tezkor va shaffof amalga oshirilishini taʼminlash maqsadida d-xarid.uz axborot tizimi ishga tushiriladi.

Yigʻilishda soʻzga chiqqanlar gʻallachilikda bozor mexanizmlarini joriy etishdan koʻzlangan asosiy maqsad bugʻdoy uchun narxlarning barqarorligini taʼminlashdan iborat ekanligi, bunga esa fermer va klasterlar gʻallasini birja savdolariga olib chiqish orqali ularning shaxsiy manfaatdorligini oshirish va ular yetishtirayotgan gʻalla hosildorligini koʻtarish orqali erishish mumkinligi taʼkidladilar.

Yigʻilish davomida fermerlar oʻzlarini qiziqtirgan savollar bilan murojaat qilib tegishlicha javoblar oldilar.

Tuman hokimligining Axborot xizmati