MUQADDAS DINIMIZDA ODAMLAR TINChLIGIGA DAXL QILISh QATTIQ QORALANADI

Tangri bizni turli hodisalar, tashvishlar bilan sinab, toblab, mukammalroq qiladi. Joriy yilning 1-2-iyul kunlarida Nukus shahrida roʻy bergan tartibsizliklar, konstitutsion tuzumga qarshi  norozilik sifatida odamlarning koʻchalarga, turli obʼektlarga zarar yetkazgani yurtimizni gʻaraz niyatli kuchlardan yanada hushyor, ogoh boʻlib asrashimiz kerakligini koʻrsatdi, yurtimizning har bir fuqarosi  koʻnglida yurt tinchligi, osoyishtaligi uchun masʼuliyatni oshirdi.

Boisi, koʻchalarda toʻplangan olomon, mashinalarga oʻt qoʻygan, binolarga shikast yetkazganlar siz-u bizning birodarlarimiz. Ular mamlakatimizdagi obodlik, shiddat bilan kechayotgan yangilanishlarni, inson omiliga qaratilayotgan eʼtiborni, eʼzozni, baxtiyor davronimizni koʻra olmagan gʻayri kuchlarning nogʻorasiga oʻynagani uchun barchamiz ham aybdormiz.

Yaratganga shukurki, jannatmakon diyorimizda har bir fuqaroning emin-erkin, farovon yashashi, ishlashi, yoshlarning oʻqib-izlanib, ilm, kasb-kor, mutaxassislik egallashi uchun barcha sharoitlar muhayyo. Keyingi toʻrt-besh yilda Nukus qanchalar oʻzgarganini kim his qilmayapti? Qush uchsa qanoti, inson borsa oyogʻi kuyadigan Moʻynoq qanchalar obod maskanga aylanganini, ikki yilki, yurtning iqtidorli, yosh sanʼatkorlari gʻoliblik  uchun bellashayotgan, oʻzligini namoyon etayotgan Boʻzatovdagi yaratilgan sharoitlarni aytmaysizmi? Fuqarolarini eʼzozlayotgan, yoshlariga barcha imkon eshiklarini ochayotgan davlatimiz gʻamxoʻrligidan minnatdor yashashimiz kerak emasmi?

Men shu yurtning bir oilasi bekasi, nuroniy sifatida oʻsha voqealarni toʻqlikka shoʻxlik, deb baholagim keladi. Muqaddas dinimizda vayrongarchilik keltirish, odamlar tinchligiga daxl qilish qattiq qoralanadi. Azizlar, alhamdulillah, hammamiz musulmonmiz. Dinimiz, davlatimiz irodasiga qarshi bormaylik, tinchlik degan ulugʻ neʼmatning shukrini qilaylik!

Oʻgʻiljon hoji Oʻrozova,

Mangʻit shahri, Chordara mahallasi.