OTA-ONA BOLAM, DEB YaShASIN!

Oila borki, hammasida ham baʼzan kelishmovchiliklar, bir-birovni tushunmaslik, birining  koʻnglini biri anglamay qolishi natijasida xafagarchiliklar boʻlib turadi. Shunday damlarda er yo xotinning bir gapdan qolishi, biroz bosiqlik qilishi, yoshi ulugʻlarning pand-nasihati oilaviy hayotning yana oʻz iziga tushib ketishiga sabab boʻladi.

Xalqimizning yillar elagidan oʻtgan oila totuvligini, hamjihatligini asrashga oid ibratli hikoyalari, oʻgitlari bor. Keksa  momolar boʻy yetgan yigit-qizlarga uqtiradigan buningdek nasihatomuz hikoyalarda ulkan hayot haqiqati yashirin. Shulardan birida aytilishicha, turmush qurayotgan yigit va qiz donishmandning oldiga borib:

– Biz turmush qurmoqchimiz. Qanday qilsak baxtli, saodatli umr kechiramiz, – deb soʻrashibdi. Shunda donishmand ularga:

– Oila qurgan kuningizdan boshlab koʻzingiz koʻr, qulogʻingiz kar boʻlsin, shunda tinch-osoyishta umrguzaronlik qilasizlar, – deb javob bergan ekan.

Albatta, oiladagi baʼzi kamchiliklarga koʻz yumib, mayda, arzimagan gap-soʻzlarga quloq solmay, oilaga mehr berish, shu muqaddas qoʻrgʻonni obod, nurafshon etish hammaning ham qoʻlidan kelavermaydi. Chor-atrofimizda arzigulik sababsiz ajrashib ketayotgan, gulday farzandlarini tirik yetim qilayotganlarni koʻrib, ularning hayotga yengil qarayotganlariga achinadi, odam.

Mening oʻqituvchilik faoliyatimni boshlaganimga yigirma yilga yaqinlashdi. Oʻquvchilarga ona tili va adabiyot fanidan dars beraman. Mehnat faoliyatim davomida otasi yo onasi vafot etgan bolalarga, ajrashgan oilalar farzandlariga ham taʼlim berganman. Shu jarayonda angladimki, norasida boʻlsa-da, ularning hech qachon qalbi kulmaydi, hayotda har qanday quvonch ham ularni chinakam baxtli qilolmaydi. Bu oilaviy ajralishlarning oqibati qanchalik ogʻir ekanligini koʻrsatadi. Men doim shular haqida oʻylaganimda ota-onalik majburiyati juda ulkan ekanligini chuqur his qilaman.

Yurtimizda oilaviy ajrimlarning koʻpayib borayotgani bolalar taqdiriga befarqlikdir.

Oilada farzand dunyoga keldimi – ota-ona shu norasidaning hayotda baxtiyor, shodon yashashi uchun masʼul ekanligini anglashlari lozim.

Barno Shomurodova,

33-sonli maktab oʻqituvchisi.