VATAN YaGONADIR, VATAN BITTADIR!

"Vatan sajdagoh kabi muqaddasdir” mavzusi boʻyicha taʼlim muassasalari oʻquvchilari oʻrtasidagi "Eng yaxshi insho” koʻrik-tanlovi gʻoliblari aniqlandi. Unga koʻra, 1-oʻringa Amudaryo akademik litseyi oʻquvchisi Sevara Ibrohimova, 2-oʻringa 44-sonli maktab oʻquvchisi Jamila Yangiboyeva va Mangʻit iqtisodiyot kolleji oʻquvchisi Aziza Madrahimovalar, 3-oʻringa esa "Barkamol avlod” bolalar markazining "Yosh jurnalist va notiq” toʻgaragi aʼzosi Iroda Rustamova hamda 71-maktabning 7-sinf oʻquvchisi Ozoda Toʻliboyevalar munosib koʻrildi. Tanlovning keyingi mavzusi "Konstitutsiya – baxtimiz qomusi”. Ushbu mavzu boʻyicha insholarni taqdim etishning oxirgi muddati – 1-dekabrgacha.

Hech bir xalq oʻzmustaqilligiga osonlikcha erishmagan. Bizning mustaqillikka erishishimiz ham bir zamonlar faqat orzu boʻlgan. Oradan oʻtgan ogʻir kunlardan keyin nihoyat nurafshon tong otdi. Yaʼni, asriy orzu – mustaqillikka erishildi. Vatanimiz istiqloli tufayli oʻz taqdirimizni oʻz qoʻlimiz bilan yaratish, oʻz salohiyatimizni har tomonlama namoyon etish, oʻzimiz tanlagan yoʻldan aniq maqsad sari ogʻishmay borish imkoniyatiga ega boʻldik.

Bugun yurtimiz ozod, erkin, mustaqil. Uning oʻz doni, neft-gazi, mashinasi, paxtasi, oltini bor. Bugun jahon tanigan, tan olgan oʻz oʻrni, ovozi bor. Oʻzbekiston oʻz mustaqilligini qoʻlga kiritganiga bu yil 23-yil toʻldi. Mana shu davr ichida boy tarixiy merosimizga, milliy qadriyatlarimiz va anʼanalarimizga munosabat butunlay oʻzgardi. Milliy bayramlarimiz va urf-odatlarimiz qaytadan tiklandi. Mustaqillik yillarida Respublikamiz qishloq va shaharlarining qiyofasi tanib boʻlmas darajada oʻzgardi. Zamonaviy uslubdagi ilm dargohlari, tadbirkorlar tomonidan madaniy-maishiy obʼektlar, toʻyxonalar, mehmonxonalar, madaniyat va sport koshonalari yangidan qurildi. Xalqimiz farovonligi – davlatimiz qudratining belgisidir.

Vatan - gʻoyat ulugʻ tushuncha. Uning maʼno-mazmunini, qadri va ahamiyatini soʻz biln toʻliq ifoda etish mushkul.

Vatan har bir insonning tugʻilgan diyoridir,

Kindik qoni toʻkilgan muqaddas tuprogʻidir.

Vatan soʻzi muqaddas, Vatan oʻzi muqaddas,

Vatanga xizmat qilmoq bizlar uchun qarz-u farz.

Taqdir taqozosi bilan inson oʻz yurtidan yiroqda yashab qoladigan boʻlsa, uning vujudida Vatandan meros boʻlib kelgan tuygʻu va fazilatlar qayta uygʻonadi va uni ona diyoriga qaytmoqqa daʼvat etadi. Vatan ajdodlardan avlodlarga bebaho merosdir. Shuning uchun Vatanning roziligi - ajdodlar roziligi ifodasidir. Haqiqiy farzandlar Vatanini rozi qilishga intiladi. Vatan roziligi avvalo unga munosib farzand boʻlish bilan ado etiladi.

Oʻzbekistonni bir koʻrgan odam hech shubhasiz, uni sevib qoladi. Yurtimizga mingminglab sayyoh-lar tashrif buyuradi va ularning barchasi bu tarovatli, serquyosh zamin ularni oʻziga maftun etgani haqida toʻlqinlanib, haya-jonlanib soʻzlashadi.

Albatta, oʻz Vatanini taʼriflamagan shoir va adib topilmasa kerak. Bizning oʻzbek shoirlarimizning koʻpchiligi Vatan haqidagi sheʼrlari bilan adabiyotga kirib kelgan. Ayniqsa, Vatan haqidagi yetuk asarlari bilan ajralib turadigan shoirlarimizdan Muhammad Yusuf, Abdulla Oripov, Hamid Olimjon va yana boshqa koʻplab ijodkorlarning asarlari oʻzgacha maʼno-mazmunga ega boʻlib, insonga maʼnaviy zavq beradi.

Bugungi kunda Oʻzbekistonda barcha sohalar yuqori surʼatda rivojlanib bormoqda. Ayniqsa, mamlakatimizning jahon hamjamiyatidagi mavqei yanada ortmoqda. Vatanimiz kelajagi boʻlgan biz yoshlarga Yurtboshimiz rahnamoligida katta eʼtibor qaratilmoqda. Biz tengi yoshlar turli fanlar boʻyicha jahon olimpiadalarida, sportning turli yoʻnalishlari boʻyicha xalqaro musobaqalarda faol qatnashib kelmoqdalar. Bu rivojlanish surʼatini koʻrib, hech shubhasiz, baralla ayta olamiz: Oʻzbekiston – kelajagi buyuk davlat!

Paydo boʻlibdiki, bu koʻhna dunyo,

Zamin-u falakda yangrar bir nido.

Olam tuslanar, U turlanmas aslo,

Vatan yagonadir, Vatan yagona!

Sevara Ibrohimova, Amudaryo akademik litseyi oʻquvchisi, tanlov gʻolibi.