Xalqimiz orzu-umidlari ifodasi
Konstitutsiya - har qanday demokratik jamiyat, davlat va boshqaruvning poydevori, asos-negizidir.
Konstitutsiya – soʻzi lotin tilidan olingan boʻlib, oʻrnatish, tuzilish yaʼni moddiy maʼnoda avvalo inson va fuqaro huquqlari, erkinliklarini mustahkamlovchi va kafolatlovchi, shuningdek ijtimoiy tuzum asoslarini, boshqaruv shakli va davlat tuzilishi asoslarini, hokimiyat markaziy va mahalliy organlarini tashkil etish asoslarini, ularning vakolatlari va oʻzaro munosabatlarini belgilaydigan qonun hujjati, hujjatlar yoki konstitutsiyaviy odatlar majmui hamda rasmiy maʼnoda barcha qonunlarga nisbatan oliy yuridik kuchga ega boʻlgan asosiy qonun hisoblanadi.
Har yili mamlakatimizda Oʻzbekiston Respublikasi Konstitutsiyasi qabul qilinganligining qutlugʻ sanasi xalqimiz tomonidan keng nishonlanadi. Konstitutsiyamiz inson, uning hayoti, ozodligi, qadr-qimmati va boshqa huquqlarini oliy qadriyat sifatida tan oluvchi suveren demokratik davlat barpo etishning huquqiy asosi boʻlib xizmat qilib kelmoqda.
Oʻzbekiston Respublikasi Konstitutsiyasi 6 ta boʻlim, 26 ta bobni tashkil etgan 128 moddani oʻz ichiga oladi.
Konstitutsiyamizning 2-moddasida qayd etilishicha, "Davlat xalq irodasini ifoda etib, uning manfaatlariga xizmat qiladi.
Davlat organlari va mansabdor shaxslar jamiyat va fuqarolar oldida masʼuldirlar”. Bu norma haqiqiy maʼnodagi demokratik boshqaruvni, xalq hokimiyatini oʻzida namoyon etadigan qoida, fuqarolik jamiyati mohiyatining qisqa va aniq tarzdagi bayonidir.
Asosiy Qonunimizning 15-moddasida qayd etilishicha, "Oʻzbekiston Respublikasida Oʻzbekiston Respublikasining Konstitutsiyasi va qonunlarning ustunligi soʻzsiz tan olinadi. Davlat, uning organlari, mansabdor shaxslar, jamoat birlashmalari, fuqarolar Konstitutsiya va qonunlarga muvofiq ish koʻradilar”.
Kezi kelganda muhim bir mulohazani taʼkidlab oʻtmoq kerak. Yaʼni Konstitutsiya - davlatning asosiy qonuni, oliy yuridik kuchga ega qonun, deb eʼtirof etilsada, unga, faqat "qonunlar qonuni” deb qarasak, Konstitutsiyaning mohiyatini toʻla anglamagan boʻlamiz. Zero, bizning Konstitutsiyamiz yangilikning eskilik ustidan, erkinlikning zoʻravonlik ustidan, adolatning haqsizlik ustidan, taraqqiyotning tanazzul ustidan gʻalabasini qonuniy muhrlagan hujjatdir.
Muhtaram Yurtboshimiz taʼkidlaganidek: "Tabiiyki, har qanday davlatning yuzi, obroʻ-eʼtibori uning Konstitutsiyasi hisoblanadi. Zotan, Konstitutsiya davlatni davlat, millatni millat sifatida dunyoga tanitadigan Qobusnomadir. Shu maʼnoda Asosiy Qonunimiz xalqimizning irodasini, ruhiyatini, ijtimoiy ongi va madaniyatini aks ettiradi. Bir soʻz bilan aytganda, Konstitutsiyamiz tom maʼnoda xalqimiz tafakkuri va ijodining mahsulidir”.
Xulosa qilib aytganda, Oʻzbekiston Respublikasi Konstitutsiyasi xalqimizning orzu-umidlari, irodasini oʻzida mujassamlashtirgan qomusiy hujjat boʻlib, yurtimizda kelajagi buyuk demokratik davlat barpo etilishining muhim huquqiy poydevoridir.
Sherzod Abdullayev,
tuman hokimligi huquqshunosi.
Foto - http://farishta.uz
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
