SPORT FAXRIYSIGA YuBILEYI MUNOSABATI BILAN SOVGʻALAR TOPShIRILDI

Keyingi yillarda keksalarni davlat tomonidan qoʻllab-quvvatlash, ularga ijtimoiy xizmatlar koʻrsatish tizimini yaxshilash borasida qator chroa-tadbirlar amalga oshirilmoqda. Shuningdek, mahallalarda faxriy sifatida eʼtiborli, katta hayotiy tajribaga ega nuroniylarga ijtimoiy hayotda faol ishtirok etishlariga, yoshlar orasida urf-odatlarimizni, anʼanalarimizni asrab-avaylash, milliy qadriyatlarimizni oʻzbekona odob-axloqni keng targʻib etishlariga sharoit yaratilmoqda. Bu nuroniy yoshga yetib, ulkan hayotiy tajribaga ega boʻlgan otaxon-onaxonlarning jamiyatga oʻzlarini kerakli ekanliklarini his qilishlariga, faol boʻlishga undaydi.

Xalq taʼlimi faxriysi Baxtiyor Rajabov ayni kunda nafaqada, Boyovul mahallasida istiqomat qiladi. Farzandlari uyli-joyli boʻlib, hayotda oʻz oʻrinlarini togan. Nevaralari ham kamolga yetdi. Biroq bir umr maktabda, sport maktabida jismoniy tarbiya fani oʻqituvchisi sifatida faoliyat yuritgan, sportni targʻib qilishga ulkan hissa qoʻshgan faxriy ustoz tinib-tinchib oʻtirishni oʻziga ep koʻrmaydi, mahalla hayotida faol ishtirok etadi, qayerda sport musobaqalari oʻtkazilsa, shu yerda hozir boʻladi, yoshlar yutuqlaridan oʻzida yoʻq quvonadi.

Baxtiyor Rajabov, ayniqsa, tumanimizda sportning voleybol turi ommalashishida, mahoratli voleybolchilar yetishib chiqishiga ulkan hissa qoʻshdi. Shogirdlari nufuzli musobaqalarda gʻolib va sovrindor boʻldi. Uning mehnatlari munosib eʼtirof etilib, tuman sporti fidoyisi sifatida tilga olinadi.

Joriy yilda sport faxriysi Baxtiyor Rajapbov tabarruk 70 yoshni qarshilamoqda. Shu munosabat bilan joriy yilning 2-noyabrida Qoraqalpogʻiston Respublikasi sportini rivojlantirish vazirligi xodimlari Azamat Xolboyev, Poʻlat Boltaboyev, tuman sportni rivojlantirish boʻlimi boshligʻi Gʻulomjon Qurbonboyevlar uning xonadoniga borib, yubilyarni qutlab, sovgʻalar topshirdilar. Sobiq sporchiga sport kiyimlari jamlanmasi topshirilib, milliy chopon va doʻppi kiydirishdi.

Nufuzli mehmonlar tashrifi Baxtiyor Rajabov xonadonida ulkan tantanaga aylanib ketdi. Baxtiyor Rajabovning tumanda sportni ommalashtirish, rivojlantirish borasidagi ulkan xizmatlari tilga olindi va kelgusida ham sport holatida boʻlib, yoʻl-yoʻriq koʻrsatib, uzoq yashashini tiladilar.

“Yangi Oʻzbekistonda el aziz – inson aziz!” hayot tarzimizdan teran joy olayotgan bu tamoyil necha-necha koʻngillar shod, obod boʻlishiga xizmat qilayotir.

Baxtiyor Rajabov ham buni oʻz hayotida chuqur his etib, nufuzli mehmonlarga minnatdorchilik bildirdi.

Chindan-da, uzoq yillar samarali mehnat qilib, keksalik davriga kirganingda ham yoʻqlashsa mehnatlaringni eʼtirof etishsa, bu baxt.

Shuningdek, tuman Xalq taʼlimi boʻlimining Maʼnaviy-maʼrifiy ishlarni muvofiqlashtirish shoʻʼbasi rahbari Zafarbek Abdullayev, Yangiobod mahallasi yoshlar yetakchisi Roza Kamolova, 40-sonli maktab masʼullari sovgʻa-salom bilan ikki karra Oʻzbekiston, bir necha marotaba Qoraqalpogʻiston va Osiyo chempioni Qunduzoy Qoʻshnazarova xonadoniga tashrif buyurdilar.

Qunduzoy Qoʻshnazarova 40-sonli maktabning 6-sinfida oʻqiydi. 2019-yildan beri sportning karate turi bilan shugʻullanadi. Yoshligidan sportga boʻlgan qiziqishini payqagan otasi Karim aka Qoʻshnazarov qizini qoʻllab-quvvatlab kelayotgan edi. Oddiy oʻzbek xonadonining sevimli qizi boʻlgan Qunduzoy ham qisqa muddat ichida koʻplab yutuqlarga erishdi. Yosh sportchi qizning shijoatini koʻrgan sport murabbiysi uni dastlab tuman miqyosidagi musobaqalarga, keyinchalik Respublika miqyosidagi chempionatlarga yoʻnaltirdi.  Qunduzoy shu yil 1-2-3-may kunlari Qirgʻiziston Respublikasida boʻlib oʻtgan Osiyo chempionatida qatnashib, faxrli 2-oʻrinni egalladi. Shu sababli Qunduzoyning ota-onasiga Oʻzbekiston Respublikasi Xalq taʼlimi vazirligi hamda Mahalla va Nuroniylarni qoʻllab-quvvatlash vazirligi tomonidan tashakkurnoma taqdim qilindi.

Oygul RAJABOVA.