EL HURMATINI QOZONGAN ShIFOKOR

Shifokorlik – jasorat! Bu kasb fidoyilikni, qalb va fikr sofligini taqozo etadi. Uning mehnati eng bebaho va xayrli mehnatdir. Chunki shifokor odamlarning sogʻligʻini saqlashi yoki qayta tiklashi orqali ularni jamiyatga qayta inʼom etadi.

Hayotining eng tahlikali, eng xavfli onlaridan hayotga qaytayotganlarni, dunyoga oʻzgacha nigoh bilan boqayotganlarni tuman Tibbiyot birlashmasiga qarashli shoshilinch tibbiy yordam shifoxonasi jonlantirish boʻlimida har kuni uchratish mumkin. Boʻlim 6-oʻringa moʻljallangan boʻlsa-da, bu yerda  sharoit taqozosiga koʻra, baʼzan 10 nafargacha bemorlarga shoshilinch yordam beriladi. Turli baxtsiz hodisalar, avtohalokatlar, surunkali kasalliklar xuruji, infarkt, insult roʻy berganda, ogʻir ahvolga tushganlarga  shoshilinch yordam shifoxonasining jonlantirish boʻlimida  tezkor, sifatli tibbiy yordam koʻrsatilganligi tufayli hayotga qaytayotganlar koʻpchilik. Ana shunday quvonarli natijalar qoʻlga kiritilishida  boʻlim reanimatolog-anesteziolog shifokori, oʻz kasbining fidoyisi I.Sariboyevning ham munosib hissasi bor.

U oʻrta maktabni tugatganidan soʻng Toshkent Tibbiyot institutining Nukus filialiga oʻqishga kirdi va muvaffaqiyatli bitirib chiqdi. 1997-1998-yillarda Nukus shahridagi respublika shifoxonasida internatura oʻtadi va oliy toifali, malakali shifokorlardan yoʻl-yoʻriq, maslahatlar olib, tajribasi oshdi. Keyinchalik tuman Tibbiyot  birlashmasining “Salomatlik markazi” shifokori boʻldi. 2011-yildan shu kungacha shoshilinch tibbiy yordam shifoxonasining jonlantirish boʻlimida reanimatolog-anesteziolog boʻlib ishlayapti. 2015-yildan tez tibbiy yordam boʻlimi reanimobil brigadasida ham navbatchi shifokor. Ushbu brigada eng ogʻir ahvoldagi bemorlar chaqiruviga yoʻnaltiriladi. Shunday damlarda murojaat qilingandan tibbiy brigada yetib borguncha boʻlgan vaqt oraligʻini shifokorlar “oltin vaqt” deyishadi. Hayoti qil ustida turgan insonga tez yetib borish, tezkor, sifatli tibbiy yordam berish  – qancha-qancha insonlarning hayoti saqlab qolinishiga sabab boʻladi. Bunda, albatta, shifokorning kasbiy mahorati ham muhim.

I.Sariboyev chaqiruvga kelgan xonadonidan tibbiy yordami tufayli doimo olqish olib kelayotganlardan biri.

– Koronavirusga chalinganimda yoshim saksonga yetib qolganiga yashashdan umidimni uzishimga sal qolgan. Dard iskanjaga olgan vaqtida Ikromjon kelib, ham muolajasi, ham shirin soʻzi bilan meni hayotga qaytardi. Oʻz xohishim bilan uy sharoitimda davolandim. Endi keksalikning ham oʻziga yarasha muammolari boʻladi. I.Sariboyev buni toʻgʻri anglab, uyda davolanish qarorimni maʼqulladi. Tavsiyasiga koʻra muolaja olib, kasallikdan forigʻ boʻldim. Tez-tez kelib xabar olib, ahvolimni nazorat qilib turdi. Bu mening oʻzimga ishonchimni oshirdi, Ikromjondan juda minnatdorman. Iloyim xalqimizning baxtiga sogʻ boʻlsin, kasbidan kamol topgay, – deydi u haqda matbuot faxriysi Saʼdulla Xoʻjaniyozov.

Aslida bu shifokordan minnatdor insonlar juda koʻp.

– Har kuni ishda eng ogʻir ahvoldagi bemorlarga qarash, jarrohlik amaliyotlari, tunlari navbatchiliklardagi bedorliklardan hech bezor ham boʻlasizmi? – qiziqib soʻradim undan.

– Kimdir yordamingga muhtoj ekanligi, unga yordam berish burching ekanligi shifokorga doim kuch berib turadi. Biroq baʼzan ogʻir shikastlanishlar bilan, insult, infarktga chalinib keltirilgan bemorlarning hammasining ham hayotini saqlab qolishning iloji boʻlmaydi. Shunday damlarda bundan juda oʻkinaman.

Aytishicha, u hayotida tanlagan kasbidan faqat bir marta afsuslangan ekan. Oʻsha kuni er-xotin, ikki shifokor – Ikrom Sariboyev va Nigora Erimbetovalarning turmush qurganlariga 20-yil toʻlgan kun ekan. Shu munosabat bilan farzandlari “syurpriz” tayyorlashgan: dasturxon tuzab, ota-onasining suratlarini qoʻydirib, nikoh uzugi ramzi, "20-yil" degan yozuvi bilan tort buyurtma qilishgan. Tantanaga yaqinlar ham taklif etilibdi. Hamma tantana sababchilari ishdan qaytishini kutib oʻtirsa, faqat ulardan biri – ona kirib kelibdi. Ota esa navbatchilikda qolgan. Shunda qizi unga yigʻlab qoʻngʻiroq qilganida uyiga kasbi taqozosiga koʻra borolmaganidan afsuslangan ekan.

Ikrom Sariboyev va Nigora Erimbetovalarning farzandlari ham voyaga yetib, hayotda oʻz yoʻnalishlarini tanlab olishgan. Shahzod boʻlgʻusi arxitektor, bu yil oxirgi bosqich talaba, Islombek veterinar boʻlib ishlayapti, Shoira NDPI talabasi, Ilhom – 11-sinf oʻquvchisi.

Ularning oilasi turmush tarziga nazar solgan odam havas qilishi tayin. Chindan-da, oʻz qoʻrgʻoning, oilang, hayotingni davom ettiruvchilaring boʻlsa, kimlargadir kerakligingni his qilib yashasang, xizmatingdan odamlar minnatdor boʻlsa, bu ulkan baxt!

I.Sariboyev ana shunday martabaga erishgan shifokor. Uni kasb bayrami bilan qutlab, kelgusi ishlarida ham muvaffaqiyatlar tilaymiz.

Oygul RAJABOVA.